Myanmar Military activities in KNU control area (July 2021)

၂၀၂၁ နံၣ် လါယူၤလံဒီတလါအကတီၢ်ပူၤ ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ တၢ်ပၢဟီၣ်ကဝီၤ ဒ်အမ့ၢ် ကီၢ်ရ့ၣ် ဒူသထူၣ် သုးက့ (၁) ကီၢ်ရ့ၣ်တီအူ သုးက့ (၂) ကီၢ်ရ့ၣ်ချၢၣ်လွံၢ်ထူၣ် သုးက့ (၃) မုၢ်တြီၢ်ကီၢ်ရ့ၣ် သုးက့ (၅) ဟီၣ်ကဝီၤပူၤသ့ၣ်တဖၣ် ခီဖျိလၢ သုးမီၤစိရိၤအသုး ဒီး သုးခိးကီၢ်ဆၢ သ့ၣ်တဖၣ် ဟူးဂဲၤဝဲ ဒုးယၤဂ့ၢ်ဝီ အတၢ်ရဲၣ်တၢ်ကျဲၤအဃိ လၢတၢ်ဒီသဒၢ ဒီး ကၢၤက့ၤဟီၣ်ကဝီၤအဂီၢ် ကညီတၢ်ထူၣ်ဖျဲးသုးမုၢ်ဒိၣ် ဒီး ကညီဒီကလုၥ်ဂၢၤသးကရၢ လီၢ်ကဝီၤ သုးသ့ၣ်တဖၣ် ဘၣ်သဂၢၢ်ခးလိၥ်အသးဒီး သုးမီၤစိရိၤ ဒီး သုးခိးကီၢ်ဆၢသ့ၣ်တဖၣ် ခဲအံၤခဲအံၤန့ၣ်လီၤ. လၢတလါအကတီၢ်ပူၤ တၢ်ခးလိၥ်သး ကအိၣ်ဝဲအဘျီလၢ (၁၈၀) ဃၣ်ဃၣ်န့ၣ်လီၤ. သုးမီၤစိရိၤ ဒီး သုးခိးကီၢ်ဆၢ အသုးသ့ၣ်တဖၣ် သံဒီးဘၣ်ဒိဝဲ ကအိၣ်လၢ (၂၅၀) ဃၣ်ဃၣ်န့ၣ်လီၤ. သုးမီၤစိရိၤအသုးဖိ ဃ့ၢ်ဖျိးစ့ၣ်ကီးဝဲ (၁၁) ဂၤန့ၣ်လီၤ.
သုးမီၤစိရိၤ အသုးသ့ၣ်တဖၣ် ဒီး သုးခိးကီၢ်ဆၢ အသုးတဖၣ် ခးလီၤဝဲကျိဖးဒိၣ် လၢကမျၢၢ်ဖိ အဒူသဝီ တၢ်ဖံးအီၣ်မၤအီၣ်အလီၢ်အကျဲ ခဲလၢၥ်အိၣ်ဝဲ (၅၈) ဖျၢၣ်ဒီး ဒွဲၣ်အူကွံၥ်ဝဲ ကမျၢၢ်ဖိအဟံၣ် (၅) ဖျၢၣ်န့ၣ်လီၤ. သုးမီၤစိရိၤအသုးတဖၣ် မၤဟးဂီၤစ့ၢ်ကီးဝဲ ကမျၢၢ်ဖိ အတၢ်ဖိတၢ်လံၤ တၢ်ပီးတၢ်လီသ့ၣ်တဖၣ် ဒီး ဟံးန့ၢ်ဆူၣ်ဝဲ ကမျၢၢ်ဖိအတၢ်အီၣ်တၢ်အီ တၢ်ဖိတၢ်လံၤသ့ၣ်တဖၣ် အါမးန့ၣ်လီၤ. ပမ့ၢ်ဒွးက့ၤလၢ ဆၢကတီၢ်ခဲအံၤ အလုၢ်အပှ့ၤန့ၣ် ကလီၤလဲဝဲလၢ စ့ပယီၤ အကလီၢ်တကယၤဃၣ်ဃၣ် န့ၣ်လီၤ. သုးမီၤစိရိၤအသုးသ့ၣ်တဖၣ် ဟးဒိးလီၤဝဲ မ့ၣ်ပိၢ် လၢကမျၢၢ်ဖိအတၢ်လဲၤတၢ်က့ၤကျဲ န့ၣ်လီၤ. ကမျၢၢ်ဖိဘၣ်ဒိဝဲလၢ ယီၢ်ဘၣ်သုးမီၤစိရိၤ အမ့ၣ်ပိၢ်မ့ၢ်ဂ့ၤ, ဘၣ်ဒိဝဲလၢ သုးမီၤစိရိၤ ဒီး သုးခိးကီၢ်ဆၢ ခးလီၤကျိဖးဒိၣ်မ့ၢ်ဂ့ၤ ခဲလၢၥ်အိၣ်ဝဲ (၆) ဂၤန့ၣ်လီၤ. ကမျၢၢ်ဖိအဆၣ်ဖိကီၢ်ဖိတဖၣ်စ့ၢ်ကီး သံဒီးဘၣ်ဒိဝဲ လၢယီၢ်ဘၣ်ဝဲ သုးမီၤစိရိၤအမ့ၣ်ပိၢ်အဃိ အိၣ်စ့ၣ်ကီးဝဲဒၣ်န့ၣ်လီၤ.
ကီၢ်ရ့ၣ်ဒူသထူၣ် သုးက့ (၁) ဟီၣ်ကဝီၤပူၤ သုးမီၤစိရိၤဒီး သုးခိးကီၢ်ဆၢ အသုးသ့ၣ်တဖၣ် ပၥ်ဖှိၣ်ထီၣ်လိၥ်အသးဒီး ကိးဖှိၣ်ဝဲ ဒူဖိသဝီဖိသ့ၣ်တဖၣ် ဒီး တဲဝဲလၢ သဝီတဖျၢၣ် အစှၤကတၢၢ်တဂၤ ကဘၣ်လဲၤကဲ အဝဲသ့ၣ်အသုးန့ၣ်လီၤ. သဝီတဖျၢၢ်တဂၤ မ့ၢ်တလဲၤကဲသုးဘၣ်န့ၣ် ကမၤကီးမၤခဲဝဲ ဒူသဝီဖိသ့ၣ်တဖၣ် န့ၣ်လီၤ. ကမျၢၢ်ဖိတဖၣ် ဘၣ်ပျံၤဘၣ်ဖုးဝဲ သုးမီၤစိရိၤ ဒီး သုးခိးကီၢ်ဆၢ အသုးသ့ၣ်တဖၣ်န့ၣ်လီၤ.
ကီၢ်ရ့ၣ်တီအူ သုးက့ (၂) ဟီၣ်ကဝီၤပူၤ ကမျၢၢ်ဖိသ့ၣ်တဖၣ် ခီဖျိလၢ တၢ်ဆါခိဝံး (၁၉) အါထီၣ်အဃိ လၢတၢ်တြီဆၢ ဒီသဒၢ တၢ်ဆါအဂီၢ် ကမျၢၢ်ဖိတဖၣ် လဲၤအိၣ်ဝဲလၢ အကျိးပူၤန့ၣ်လီၤ. သုးမီၤစိရိၤအသုးသ့ၣ်တဖၣ် တဲဝဲကမျၢၢ်ဖိလၢ လဲၤအိၣ်လၢ ကျိးပူၤသ့ၣ်တဖၣ် ကဘၣ်ဟဲက့ၤအိၣ်လၢ အသဝီပူၤန့ၣ်လီၤ. မ့ၢ်တဟဲက့ၤအိၣ်လၢ သဝီပူၤဒီး မ့အိၣ်လၢအကျီးပူၤန့ၣ် သုးမီၤစိရိၤအသုးသ့ၣ်တဖၣ် မ့ထံၣ်အီၤဒီး ကခးသံဝဲဒၣ်န့ၣ်လီၤ. ခီဖျိသုးမီၤစိရိၤ တဲကမျၢၢ်ဖိ ဒ်အံၤအဃိ ကမျၢၢ်ဖိတဖၣ် ဘၣ်ပျံၤဘၣ်ဖုးတၢ်န့ၣ်လီၤ.
ကီၢ်ရ့ၣ်ချၢၢ်လွံၢ်ထူၣ် သုးက့ (၃) အဟီၣ်ကဝီၤ သုးမီၤစိရိၤအသုးသ့ၣ်တဖၣ် ကိးဖှိၣ်ဝဲ ကမျၢၢ်ဖိ လၢအန့ၢ်ပၢ မၤဘၣ်ဝဲ ထံနိၣ်တဖၣ် ဒီး တဲဝဲလၢ တၢ်ကဘၣ်ဟ့ၣ်အီၤ တၢ်မၤထံနိၣ် အခိအသွဲ, နိၣ်တဖျၢၣ် စ့ပယီၤအကလီၢ် (၅၀) န့ၣ်လီၤ. ပှၤလၢတဟ့ၣ်အဝဲသ့ၣ် တၢ်ခိဘၣ်တဂၤလၢ်လၢ် မ့လဲၤမၤအီၣ်အနိၣ်န့ၣ် ကခးသံဝဲဒၣ်န့ၣ်လီၤ. သုးမီၤစိရိၤ အသုးသ့ၣ်တဖၣ် တမၢဝဲကမျၢၢ်ဖိ ဟးထီၣ်က့ၤလီၤဘၣ် ဒီး တမၢစ့ၢ်ကီးဝဲ ကမျၢၢ်ဖိလဲၤမၤအီၣ်အစံၥ်ဘၣ်န့ၣ်လီၤ. သုးမီၤစိရိၤအသုးသ့ၣ်တဖၣ် ဖီၣ်ဝဲကမျၢၢ်ဖိ (၇၀) ဂၤ ဒီး တဲဝဲလၢ အဝဲသ့ၣ်တဖၣ် ဟးတဖိးမံဒီး တၢ်သိၣ်တၢ်သီဘၣ်အဃိ ဃ့အီၣ်လီးဝဲ နီၢ်တဂၤစ့ပယီၤ (၂၅) ကလီၢ်န့ၣ်လီၤ. ကမျၢၢ်ဖိသ့ၣ်တဖၣ် တတူၢ်လိၥ်ဝဲ သုးမီၤစိရိၤ ပၢတၢ်ဘၣ်အဃိ ဘၣ်အိၣ်မူဝဲလၢ တၢ်ပျံၤတၢ်ဖုးအဖီခိၣ်န့ၣ်လီၤ.
မုၢ်တြီၢ်ကီၢ်ရ့ၣ် သုးက့ (၅) ဟီၣ်ကဝီၤပူၤ ခီဖျိလၢ သုးမီၤစိရိၤတဖၣ် အကဘီယူၤ ဟဲဆှၣ်တၢ် လၢကမျၢၢ်ဖိ ဃ့ၢ်မှံဟးဖျိးအလီၢ်အကျဲ ဒီး ဟဲဆှၣ်တၢ်လၢ ကမျၢၢ်ဖိ အဒူသဝီပူၤခဲအံၤခဲအံၤအဃိ ကဲထီၣ်တၢ်လီၤပျံၤလီၤဘၣ်ယိၣ်လၢ ကမျၢၢ်ဖိသ့ၣ်တဖၣ် အဂီၢ်န့ၣ်လီၤ. ကမျၢၢ်ဖိလၢ အိၣ်ဘူးဒီးဝ့ၢ်ပူၤသ့ၣ်တဖၣ် သုးမီၤစိရိၤ ဒီး သုးခိးကီၢ်ဆၢ အသုးသ့ၣ်တဖၣ် တဲပျံၤတဲဖုး မၤပျံၤမၤဖုး ဃ့ဆူၣ်ဃ့စိး ကမျၢၢ်ဖိအတၢ်ဖိတၢ်လံၤ အိၣ်ဝဲအါမးန့ၣ်လီၤ.
တကီၢ်ခါခဲအံၤ ကီၢ်ရ့ၣ်ချၢၣ်လွံၢ်ထူၣ် သုးက့ (၃) ဒီး မုၢ်တြီၢ်ကီၢ်ရ့ၣ် သုးက့ (၅) အဟီၣ်ကဝီၤပူၤ ကမျၢၢ်ဖိလၢ ဘၣ်ဃ့ၢ်မှံဟးဖျိး လၢတၢ်ဒုးတၢ်ယၤအဃိ ခဲလၢၥ် အနီၣ်ဂံၢ် ကအိၣ်လၢ (၇၇၀၀၀) ဘျဲၣ်လံန့ၣ်လီၤ. ကမျၢၢ်ဖိတဖၣ် ဘၣ်ကွၢ်ဆၢၣ်မဲၥ် ဒီး တၢ်ကီတၢ်ခဲ တၢ်ဃံးတၢ်စ့ၤ အါမးန့ၣ်လီၤ.
နမ့ၢ်အဲၣ်ဒိး သ့ၣ်ညါအါထီၣ် တၢ်ဂ့ၢ်တၢ်ကျိၤတခီ ဆဲးကျိးဘၣ် ဒီး

စီၤယွၤခွံၣ်ဒူ
တၢ်ကစီၣ် ဒီး တၢ်ဘိးဘၣ်ရၤလီၤဝဲၤဒ့
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ
လီၢ်ခၢၣ်သး
Phone + 66926184061