လါယူၤ ၂ သီ, ၂၀၂၂ နံၣ်
ခ့ၣ်အဲၣ်ယူၣ်-လီၢ်ခၢၣ်သး

ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ချၢၣ်လွံၢ်ထူၣ်ကီၢ်ရ့ၣ် လၢၢ်ဒိၣ်ကီၢ်ဆၣ် တၢ်ပၢဟီၣ်ကဝီၤပူၤ ကမျၢၢ်ကၠိ လၢအမ့ၢ် လီၢ်မူပဲၤသဝီ တီၤဖုၣ်ကၠိ, လီၢ်မူသီသဝီ တီၤခၢၣ်သးကၠိ ဒီး ကီၢ်သးစ့သဝီ တီၤခၢၣ်သးကၠိတဖၣ် ဖဲတနံၤအံၤ ၈ သီအနံၤန့ၣ် အိးထီၣ်ဝဲ ကၠိလံန့ၣ်လီၤ. ကမျၢၢ်ကၠိတဖၣ် အိးထီၣ်ဝဲန့ၢ် ဘၣ်ဆၣ် ကၠိတၢ်ပီးတၢ်လီ ဒီး တၢ်သိၣ်လိပီးလီတဖၣ် တအိၣ်လၢလၢလီၣ်လီၣ်ဘၣ်အဂ့ၢ် သ့ၣ်ညါဘၣ်န့ၣ်လီၤ.

ကွဲခၠၤသဝီ ကမျၢၢ်ထံဖိကီၢ်ဖိ လၢတအဲၣ်ဒိးအိၣ်လၢ သုးမီၤစိရိၤ အတၢ်ကူၣ်ဘၣ်ကူၣ်သ့ဝဲၤကျိၤ အဖီလၥ်ဘၣ်တဖၣ် ဂုၥ်ကျဲးစၢးဝဲ လၢကသူၣ်ထီၣ်ဝဲ ကမျၢၢ်ကၠိ ဘၣ်ဆၣ် ဘၣ်ကွၢ်ဆၢၣ်မဲၥ်ဝဲဒၣ်ဒီး သုးမီၤစိရိၤတဖၣ် အတၢ်မၤပျံၤမၤဖုးန့ၣ်လီၤ.

ဖဲတနံၤအံၤဂီၤခီ (၈) နၣ်ရံၣ် အဆၢကတီၢ်န့ၣ် သုးမီၤစိရိၤအသုး ခလရ-၆၀ သုးခိၣ်စိ စ့ၤယၤလ့ ကိးထံၣ်ဝဲ ကွဲခၠၤသဝီဖိ စီၤမီၣ်ဒီ ဒီး မၢဆူၣ်ဝဲလၢ တၢ်ကဘၣ်အိးထီၣ် သုးကီၣ်ကးအကၠိ အဂ့ၢ်န့ၣ်လီၤ. တၢ်မ့ၢ်တအိးထီၣ်ကၠိအံၤဘၣ်ဒီး ကၠိဖိမ့ၢ်တဟဲထီၣ်ကၠိဘၣ်န့ၣ် အဝဲသ့ၣ် ကနီဟးထီၣ်ကွံၥ် ပှၤသဝီဖိ ဒီး ကဒွဲၣ်အူကွံၥ်ဝဲ သဝီအံၤအဂ့ၢ်န့ၣ် ကတိၤပျံၤကတိၤဖုးဝဲ သဝီဖိန့ၣ်လီၤ.