၂၀၂၂ နံၣ်, လါမ့ၤ ၂၉ သီ, ဒူသထူၣ် ကီၢ်ရ့ၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဒူသထူၣ်ကီၢ်ရ့ၣ်, ကၠဲၣ်ထိၣ်ကီၢ်ဆၣ် ဟီၣ်ကဝီၤ သုးမီၤစိရိၤအသုးတဖၣ် ခးနါစိၤဝဲကျိဖးဒိၣ် ဒီး ဖီၣ်ဝဲကမျၢၢ် လၢတၢ်ဂ့ၢ်တၢ်ကျိၤ တအိၣ်နီတမံၤဘၣ်အဃိ ဒူသဝီကမျၢၢ်တနီၤ ဘၣ်ဃ့ၢ်ပူၤဖျဲးကွံၥ်အသး အဂ့ၢ်သ့ၣ်ညါဘၣ်န့ၣ်လီၤ.

ဖဲလါမ့ၤ ၂၇ သီ န့ၣ် ခ့ၣ်အဲၣ်ယူၣ်-ကၠဲၣ်ထိၣ်ကီၢ်ဆၣ်, ပြ့ကဒိကိကရူၢ်ပူၤ သုးမီၤစိရိၤအသုး သုးတြိၤနီၣ်ဂံၢ် ၂၂, သုးတြိၤနီၣ်ဂံၢ် ၄၄, သုးတြိၤနီၣ်ဂံၢ် ၇၇, ဒီး ပၠူၤစီထံၣ် (ပျူစေၥထီး) သုးပၥ်ဖှိၣ် ဂံၢ်ဘါခဲလၢၥ် ကအိၣ် ၇၀ ဂၤတဖၣ် ဟဲထီၣ်ဝဲ တလၢတၢ်ပၥ်ပနီၣ်အလီၢ်အဃိ တၢ်သုးကဲထီၣ်ဝဲ ဒီး ကညီဒီကလုၥ်တၢ်ထူၣ်ဖျဲးသုးမုၢ်ဒိၣ် တစိၢ်ဖိန့ၣ်လီၤ.

တၢ်ဒုးကဲထီၣ်အံၤ လၢခံခီခံကပၤ တၢ်ဘၣ်ဒိဘၣ်ထံး တအိၣ်ဝဲဘၣ် ဘၣ်ဆၣ် သုးမီၤစိရိၤအသုးတဖၣ် ဖဲနုၥ်လီၤဝဲဒၣ်လၢ သ့ၣ်စ့ၣ်ပ့ၤသဝီ ဒီး ဖီၣ်ဝဲသဝီဖိ (၁) ဂၤ မၢဝဲလၢ ကလဲၤဝံစၢၤအတၢ် အသိး ဖဲလါမ့ၤ (၂၆) သီ အနံၤစ့ၢ်ကီး ဖီၣ်ဝဲ လဲၣ်ပံပ့ၣ်သဝီဖိ မီၣ်ဘိဝ့ကၠီၣ် ဒီး အ့ဘိၤသဝီမုၢ်ထီၣ် မီၣ်ပ့ၣ် သ့ၣ်တဖၣ် တုၤခဲအံၤ တပျၢ်ကွံၥ်ဒံးဝဲဘၣ် အဂ့ၢ် ခ့ၣ်အဲၣ်ယူၣ်-ကၠဲၣ်ထိၣ်ကီၢ်ဆၣ် တၢ်ကစီၣ်မူဒါခိၣ် စံးဝဲဒၣ်န့ၣ်လီၤ.

ကၠဲၣ်ထိၣ်ကီၢ်ဆၣ် ပြ့ကတိကိကရူၢ်အံၤ သုးမီၤစိရိၤတဖၣ် ခးနါစိၤဝဲကျိဖးဒိၣ် ဒုးကိၥ်ဒုးကိၥ် ဒီး ဖီၣ်ဝဲသဝီဖိ လၢတၢ်ဂ့ၢ်တၢ်ကျိၤတအိၣ်နီတမံၤဘၣ်အဃိ သဝီဖိတဖၣ် ပျံၤတၢ်ဖုးတၢ် ဒီး ဘၣ်ဃ့ၢ်ပူၤဖျဲးကွံၥ်အသး အိၣ်ဝဲအဂ့ၢ် သ့ၣ်ညါဘၣ်န့ၣ်လီၤ.