ခ့ၣ်အဲၣ်ယူၣ်-လီၢ်ခၢၣ်သး
၂၀၂၂ နံၣ်, လါမ့ၤ (၂၉) သီ

ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ကီၢ်သူလ့ၤ တၢ်ပၢဟီၣ်ကဝီၤပူၤ သုးမီၤစိရိၤအသုး ဒီး သုးခိးကီၢ်ဆၢ  (BGF) သုးတဖၣ် ဟူးဂဲၤဝဲ သုးဂ့ၢ်ဝီတၢ်ဟူးတၢ်ဂဲၤ လၢကဟံးန့ၢ် ဟီၣ်ကဝီၤတၢ်ဒိၣ်စိအဃိ တၢ်ဒုးကဲထီၣ်ဝဲလၢ သုးမီၤစိရိၤအသုး ဒီး ကညီဒီကလုၥ် တၢ်ထူၣ်ဖျဲးသုးမုၢ်ဒိၣ် (KNLA), ကညီဒီကလုၥ် ဂၢၤသးကရၢ (KNDO) သုးတဖၣ် အဘၢၣ်စၢၤ ကိးနံၤဒဲးန့ၣ်လီၤ.

သုးမီၤစိရိၤအသုးတဖၣ် ဒ်သိးကမၤန့ၢ်ဝဲ ဟီၣ်ကဝီၤတၢ်ဒိၣ်စိအဂီၢ် ခးနါစိၤဝဲ ကျိဖးဒိၣ်, ဟဲခးတၢ်လၢ ကဘီယူၤ အဃိ ဒူဖိသဝီဖိတဖၣ် အိၣ်လၢသဝီပူၤ တဘူၣ်လၢၤဘၣ် ဒီး ဘၣ်ပၥ်တ့ၢ်ကွံၥ် ဒူသဝီ, တၢ်ဖံးတၢ်မၤ ဘၣ်ဃ့ၢ်အိၣ်ကဒုလၢ တၢ်ပူၤဖျဲးအလီၢ်န့ၣ်လီၤ.

တကီၢ်ခါ သုးက့လၢ တၢ်ဒုးကဲထီၣ်တဖၣ် မ့ၢ်ဝဲ ဒူသထူၣ်ကီၢ်ရ့ၣ် သုးက့ (၁), ချၢၣ်လွံၢ်ထူၣ် ကီၢ်ရ့ၣ် သုးက့ (၃), ဘျံးဒဝဲၢ် ကီၢ်ရ့ၣ် သုးက့ (၄), မုၢ်တြီၢ်ကီၢ်ရ့ၣ် သုးက့ (၅) ဒီး ဒူပျၥ်ယၥ်ကီၢ်ရ့ၣ် သုးက့ (၆) တဖၣ်န့ၣ်လီၤ. ကတီၢ်ခဲအံၤ ခီဖျိလၢမ့ၢ်ဝဲ တၢ်စူၤခါအဆၢကတီၢ်အဃိ ပှၤဃ့ၢ်မှံဟးဖျိးတဖၣ် လိၣ်ဘၣ်ဝဲ ပှၤဂ့ၢ်ဝီ တၢ်ဆီၣ်ထွဲမၤစၢၤ ဒ်အမ့ၢ် တၢ်အိၣ်ဆူၣ်အိၣ်ချ့, တၢ်အီၣ်တၢ်အီ ဒီး တၢ်အိၣ်ဆိးလီၢ်ကျဲ တဖၣ်န့ၣ်လီၤ. လီၤဆီဒၣ်တၢ် သုးက့ (၁), သုးက့ (၃), သုးက့ (၄) ဒီး သုးက့ (၅) ဟီၣ်ကဝီၤလၢ တၢ်လဲၤတၢ်က့ၤ ကီခဲတဖၣ် ကမျၢၢ်လၢ ဃ့ၢ်မှံဟးဖျိးတဖၣ် လိၣ်ဘၣ်ဝဲ ပှၤဂ့ၢ်ဝီတၢ်မၤစၢၤ ဒိၣ်မးန့ၣ်လီၤ.