ကီၢ်ပဒိၣ်သုး ခးသံ ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ မုၢ်တြီၤကီၢ်ရ့ၣ် သ့ၣ်ပှၢ် ဝဲၤကျိၤ ပှၤမၤတၢ်ဖိတဂၤ ဖဲလါမးရှး (၅) သီ

၂၀၂၀ နံၣ်, လါမးရှး (၅) သီ

ဖဲ ၂၀၂၀ နံၣ်, လါမးရှး (၅) သီ မုၢ်ထူၣ်ခါ ၁၂း၄၅ နၣ်ရံၣ် အဆၢကတီၢ် ကီၢ်ပဒိၣ်သုး လၢအအိၣ်ဖဲ မုၢ်တြီၤကီၢ်ရ့ၣ်, ဒွဲၣ်လိကီၢ်ဆၣ်, မဲၤဝ့ၤသဝီ ကပၤ သုးကလၢၤ ခလရ-၃၃၈ လၢအဘၣ်တၢ်တီခိၣ်ရိၣ်မဲအီၤလၢ သုးရ့ၣ်ခိၣ် ၂ ဒီး အသုးသ့ၣ်တဖၣ် ခးသံဝဲ မုၢ်တြီၤကီၢ်ရ့ၣ်, သ့ၣ်ပှၢ်ပှၤမၤတၢ်ဖိတဂၤ လၢအမံၤမ့ၢ် စီၤမီၣ်အ့သါ န့ၣ်လီၤ. သ့ၣ်ပှၢ်ဝဲၤကျိၤ ပှၤမၤတၢ်ဖိ စီၤမီၣ်အ့သါ ဒီး အသကိး ၂ ဂၤ ဒ်ဝဲၤကျိၤဟ့ၣ်အီၤမူဒါအသိး ကလဲၤလီၤဝဲဒၣ်လၢ ချၢၣ်မုၢ်သိပျ့ၣ် သ့ၣ်ပှၢ်ပျံၤကွီၤအဂီၢ် လဲၤဒိးဝဲ ဆဲးကၢး အဆၢကတီၢ် ဘၣ်တၢ်ခးအဝဲသ့ၣ် န့ၣ်လီၤ. ကျဲလၢအဝဲသ့ၣ်လဲၤဝဲအံၤ မ့ၢ်ကျဲလၢ ပယီၤသုးမုၢ်ဒိၣ် အသုးကလၢၤ အိၣ်ဘူးစီၤစုၤ ၂၀၀ (ကဲး) ဒီး ဖဲကီၢ်ပဒိၣ်သုး ခးအဝဲသ့ၣ်အဆၢကတီၢ် တၢ်ခးဘၣ်ဝဲ စီၤမီၣ်အ့သါ အသးနါပှၢ် ဒီး ဖျိသဂၢၢ်ဝဲ အမဲၥ်ညါတၢ်ခးဘၣ်စ့ၢ်ကီး အခီၣ်ကံၣ်ဒုၣ် ၃ ထံၣ် အဃိ လၢတၢ်ဆၢကတီၢ်ဖုၣ်ကိၥ်အပူၤ အသးသမူ ဟးထီၣ်ကွံၥ်ဝဲန့ၣ်လီၤ.

ခီဖျိ ပယီၤသုးမုၢ်ဒိၣ် ခးသံဝဲ စီၤမီၣ်အ့သါ အံၤအဃိ ပဝဲသ့ၣ်တဖၣ် ပသးတမုၥ်ဘၣ် အါမး ဒီး ကီၢ်ပဒိၣ်သုး အတၢ်ဖံးတၢ်မၤဒ်အံၤ ပတူၢ်တန့ၢ် ခီၣ်တကဲဘၣ် န့ၣ်လီၤ. ကီၢ်ပဒိၣ်သုး ဆီလီၤအသုးကလၢၤလၢ ဒူသဝီခိၣ်ဃၢၤ ဘၣ်ဆၣ် ပဝဲသ့ၣ်တဖၣ် ပလဲၤမၤတံၥ်တၥ်အဝဲသ့ၣ် တအိၣ်နီတဘျီဘၣ် အမဲၥ်ညါ ဒူဖိသဝီဖိသ့ၣ်တဖၣ်စ့ၢ်ကီး ဃ့ထီၣ်တ့ၢ်ဝဲလၢ တၢ်ကသုးကွံၥ် သုးကလၢၤအံၤန့ၣ်လီၤ. ပသ့ၣ်ပှၢ်ဝဲၤကျိၤပှၤမၤတၢ်ဖိ ၃ ဂၤအံၤစ့ၢ်ကီး လၢတၢ်လဲၤကွၢ်စူၣ်ကယၥ် သ့ၣ်ပှၢ်ပျံၤကွီၤအဂီၢ် လဲၤဒိးဝဲ ဆဲးကၢး ဒီး ကျဲလၢအဝဲသ့ၣ်လဲၤဝဲအံၤ မ့ၢ်စ့ၢ်ကီးကျဲလၢ အဝဲသ့ၣ်လဲၤညီနုၢ်ဝဲ န့ၣ်လီၤ. ဘၣ်ဆၣ် ခီဖျိကီၢ်ပဒိၣ်သုး တၢ်ဖံးတၢ်မၤဒ်အံၤအဖီခိၣ် မ့ၢ်တၢ်မၤလၢ အမၤတရီတပါ ပဝဲသ့ၣ်တဖၣ် ဒီး မ့ၢ်အမၤအါထီၣ် တၢ်ဘၣ်ဂံၥ်ဂုၥ်န့ၣ်လီၤ.