လါမးရှး ၃ သီ ၂၀၂၀ နံၣ်

ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ကီၢ်ရ့ၣ်ဒူပျၥ်ယၥ် မၤဝဲ ၁၆ ဘျီတဘျီ ကီၢ်ရ့ၣ်ခီကရဲး ဝံၤအလီၢ်ခံ ကီၢ်ရ့ၣ် သ့ၣ်ပှၢ်ဝဲၤကျိၤ မၤဝဲ ၀ဲၤကျိၤတၢ်အိၣ်ဖှိၣ် အဆိကတၢၢ်တဘျီ ဒီး လၢတၢ်အိၣ်ဖှိၣ်ပူၤ ပဒိၣ်စီၤန့ၢ်ကီၢ်သီ လၢအမ့ၢ် ကီၢ်ရ့ၣ်သ့ၣ်ပှၢ်ဝဲၤကျိၤ နဲၣ်ရွဲၣ် ကတိၤဟ့ၣ်စုနဲၣ်ကျဲဝဲ ပှၤထီၣ်တၢ်အိၣ်ဖှိၣ်တဖၣ် လၢအဘၣ်ဃးဒီး တၢ်ကဘၣ်ကတဲၥ်ကတီၤက့ၤ သ့ၣ်ပှၢ် ဒီး ကဘၣ်သူၣ်လီၤအါထီၣ်သ့ၣ် အတၢ်ဟူးတၢ်ဂဲၤတဖၣ် တၢ်ကဘၣ်မၤအါထီၣ်အီၤ အဂ့ၢ်န့ၣ်လီၤ. ကီၢ်ရ့ၣ်ပတီၢ် သ့ၣ်ပှၢ်ဝဲၤကျိၤ ဝဲၤကျိၤတၢ်အိၣ်ဖှိၣ်အံၤ ဘၣ်တၢ်မၤအီၤဖဲ လါမးရှး ၃ သီ တုၤ ၄ သီ ဖဲကီၢ်ရ့ၣ် ဒူပျၥ်ယၥ် သ့ၣ်ပှၢ်ဝဲၤကျိၤ အဝဲၤဒၢးန့ၣ်လီၤ.

လၢတၢ်အိၣ်ဖှိၣ်အပူၤ တၢ်တဲသကိးဘၣ်ဃး ဒူသဝီသ့ၣ်ပှၢ်ပျံၤကွီၤတဖၣ် တၢ်ကမၤအါထီၣ်အီၤ အဂ့ၢ်အကျိၤ, တၢ်ကဘၣ်ကတီၤက့ၤ သ့ၣ်ပှၢ် ဒီး သူၣ်အါထီၣ်သ့ၣ် အဂ့ၢ်အကျိၤ, သ့ၣ်ပှၢ်ပျံၤကွီၤတဖၣ် တၢ်ကဘၣ်က့ၤထိၣ်ကွၢ်က့ၤအီၤ အဂ့ၢ်အကျိၤ ဒီး ထံဖိကီၢ်ဖိလၢ အလဲၤအိၣ်လဲၤဆိးလၢ သ့ၣ်ပှၢ်ပျံၤကွီၤအပူၤတဖၣ်အဂီၢ် တၢ်ကဘၣ်ရဲၣ်ကျဲၤထုးထီၣ်န့ၢ်အဝဲသ့ၣ် တၢ်ဖံးအီၣ်မၤအီၣ်တစိၢ်တလီၢ် အလံၥ်အုၣ်သး, ဒီး တၢ်ကဘၣ်ကဟုကယၥ်က့ၤ ဆၣ်ဖိကီၢ်ဖိ တဖၣ်အဂ့ၢ် န့ၣ်လီၤ.

လၢထံဖိကီၢ်ဖိ ကမျၢၢ်တဖၣ်အဂီၢ် ဂံၢ်ခီၣ်ထံးတၢ်လိၣ်တဖၣ် ဒ်အမ့ၢ် တၢ်သူၣ်ထီၣ်ဟံၣ်ဃီ, တၢ်သူၣ်ထီၣ်ကၠိ ဒီး တၢ်သူၣ်ထီၣ်တၢ်ဘူၣ်တၢ်ဘါတၢ်လီၢ်တဖၣ်အဂီၢ် တၢ်လိၣ်မ့ၢ်အိၣ်နီၢ်နီၢ်ဒီး ကဘၣ်လဲၤပၥ်ဖျါထီၣ်ဝဲလၢ ကီၢ်ရ့ၣ်သ့ၣ်ပှၢ်ဝဲၤကျိၤ ဒီး တၢ်ကဘၣ်ရဲၣ်ကျဲၤအီၤ လီၤတံၢ်လီၤဆဲး အဂ့ၢ်န့ၣ် တၢ်တဲသကိး စ့ၢ်ကီးန့ၣ်လီၤ.

ဘၣ်ဃး တၢ်ထုးထီၣ်သ့ၣ်လၢ မုၢ်ကျိၤဝဲၤကွၥ်အဂီၢ် ဒီး တၢ်ထုးထီၣ်သ့ၣ်လၢ အတဖိးမံဒီး သဲစးဘၣ် တၢ်ဟူးတၢ်ဂဲၤတဖၣ် ကီၢ်ရ့ၣ်သ့ၣ်ပှၢ်ဝဲၤကျိၤ လ့ၤတက့ၤ တဟ့ၣ်ဝဲအခွဲးဘၣ် ဒီး တၢ်ဟူးတၢ်ဂဲၤဒ်အံၤတကလုၥ် မ့ၢ်အိၣ်ထီၣ်န့ၣ် တၢ်ကပိၥ်ထွဲဒၣ်ဒ် ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ သ့ၣ်ပှၢ်ဝဲၤကျိၤ အတၢ်သိၣ်တၢ်သီ တၢ်ဘျၢ အိၣ်ဝဲအသိးန့ၣ်လီၤ. ဒ်န့ၣ်အသိး ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ သ့ၣ်ပှၢ်ဝဲၤကျိၤအဖီလ်စံၣ် ဒီး တၢ်သိၣ်တၢ်သီတၢ်ဘျၢလၢ တၢ်ကဘၣ်ကတဲၥ်ကတီၤက့ၤ သ့ၣ်ပှၢ် ဒီး ဆၣ်ဖိကီၢ်ဖိတဖၣ် အဂ့ၢ်အကျိၤန့ၣ် ဒ်သိး ထံဖိကီၢ်ဖိကသ့ၣ်ညါ လဲၢ်လဲၢ်ကွၥ်ကွၥ်အဂီၢ် တၢ်ကရဲၣ်ကျဲၤဖံးမၤအီၤ စ့ၢ်ကီးလီၤအဂ့ၢ်န့ၣ် သ့ၣ်ညါဘၣ်န့ၣ်လီၤ.

ကီၢ်ရ့ၣ် သ့ၣ်ပှၢ်ဝဲၤကျိၤအံၤ ဖဲ ၂၀၁၉ နံၣ် အပူၤ မၤအါထီၣ်ဝဲ ပှၤတ၀ၢသ့ၣ်ပှၢ် (၃၉) ပှၢ် လၢအအိၣ်ဝဲ (၆၈၄၀၉.၇၇၃) အံၤကၢး န့ၣ်လီၤ. ဒ်န့ၣ်အသိး သ့ၣ်ပှၢ်ပျံၤကွီၤစ့ၢ်ကီး အိၣ်ဝဲ (၂၉) ကွီၤ ဒီး လၢ (၂၉) ကွီၤ အပူၤ တၢ်ထိၣ်ကွၢ်ဝဲ သ့ၣ်ပှၢ်ပျံၤကွီၤ ဝံၤဝဲဒၣ်ထဲ (၁၉) ကွီၤ ဒီး လၢတၢ် (၁၉) ကွီၤအပူၤ သ့ၣ်ပှၢ်ပျံၤကွီၤ အံးကၢးခဲလၢၥ် အိၣ်ဝဲ (၂၈၃၄၁၁၆.၆၉၃ အံးကၢး) န့ၣ်လီၤ.

တၢ်ပျဲပူၤ ဆၣ်ဖိကီၢ်ဖိ သ့ၣ်ပှၢ်ပျံၤကွီၤတခီ အိၣ်ဝဲ (၃) ကွီၤ ဒ်အမ့ၢ် မဲၢ်ကသၣ် တၢ်ပျဲပူၤဆၣ်ဖိကီၢ်ဖိ သ့ၣ်ပှၢ်ပျံၤကွီၤ (၉၃၃၅၉ အံးကၢး), တူၢ်သလီး တၢ်ပျဲပူၤဆၣ်ဖိကီၢ်ဖိ သ့ၣ်ပှၢ်ပျံၤကွီၤ (၁၂၀၃၂၆ အံးကၢး) ဒီး ခွံခိၣ် တၢ်ပျဲပူၤဆၣ်ဖိကီၢ်ဖိ သ့ၣ်ပှၢ်ပျံၤကွီၤ (၂၅၄၇၆၆ အံးကၢး) တဖၣ်န့ၣ်လီၤ. လၢ ခွံခိၣ် တၢ်ပျဲပူၤဆၣ်ဖိကီၢ်ဖိ သ့ၣ်ပှၢ်ပျံၤကွီၤအပူၤ အိၣ်စ့ၢ်ကီးဒီး ကသံၣ်သ့ၣ်ဂံၢ်၀ၣ်စဲ သ့ၣ်ပှၢ်ပျံၤကွီၤ တကွီၤ လၢအမ့ၢ်ဝဲ ဖါဝံ ကသံၣ်သ့ၣ်ဂံၢ်၀ၣ်စဲ ပျံၤကွီၤ (၂၆၆၅.၉၁ အံးကၢး) န့ၣ်လီၤ. ဆၣ်ဖိကီၢ်ဖိ လၢအအိၣ်လၢ တၢ်ပျဲပူၤဆၣ်ဖိကီၢ်ဖိ သ့ၣ်ပှၢ်ပျံၤကွီၤတဖၣ် ဒ်အမ့ၢ် ကဆီ, ဘီၣ်သိၣ်, တၤသူ, ခ့စံၣ်ဖိၣ်, တၤဒိၣ် ဒီး ဆၣ်ဖိကီၢ်ဖိ မံၤလၥ်ခဲလၢၥ် တၢ်ထိၣ်တယး ကအိၣ်ဝဲ အကလုၥ် (၁၀၀) ဘျဲၣ် တဖၣ် အိၣ်ဆိးဝဲလၢ တၢ်ပျဲပူၤဆၣ်ဖိကီၢ်ဖိ သ့ၣ်ပှၢ်ပျံၤကွီၤ တဖၣ်အံၤအပူၤ ဒီး တၢ်ကဟုကယၥ်ဒီသဒၢအဝဲသ့ၣ်လီၤအဂ့ၢ်န့ၣ် သ့ၣ်ညါဘၣ်န့ၣ်လီၤ.

ဒ်သိး ထံတၢ်ဂ့ၢ်ကီ တအိၣ်ထီၣ်တဂ့ၤအဂီၢ်, ဆၣ်ဖိကီၢ်ဖိမံၤလၥ် လၢအစှၤတဖၣ် အကလုၥ်တလီၤတူၥ်ကွံၥ်တဂ့ၤအဂီၢ်, ခိၣ်ဃၢၤန့ဆၢၣ် တၢ်ဘၣ်ဒိဘၣ်ထံးတအိၣ်တဂ့ၤအဂီၢ်, တၢ်မၤဟးဂုၤဟးဂီၤသ့ၣ်ပှၢ် သုတအိၣ်တဂ့ၤအဂီၢ်, သ့ၣ်ပှၢ်ကအိၣ်အါထီၣ်အဂီၢ် ဒီး တၢ်မၤဟုၣ်သ့ၣ်တဖၣ် သုတအိၣ်တဂ့ၤအဂီၢ် တၢ်ဂ့ၢ်တၢ်ကျိၤတဖၣ် တၢ်တဲသကိးအီၤ ဒီး ထံဖိကီၢ်ဖိကမျၢၢ်တဖၣ်စ့ၢ်ကီး ကပၥ်ဖှိၣ်မၤသကိးတၢ်ဒီး ကီၢ်ရ့ၣ်သ့ၣ်ပှၢ်ဝဲၤကျိၤအဂီၢ် အရ့ဒိၣ်ဝဲအဂ့ၢ် တၢ်တဲသကိးဝဲဒၣ်န့ၣ်လီၤ.

ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဒ်ကီၢ်ရ့ၣ်ပတီၢ် တၢ်သူၣ်ထီၣ်ဆီလီၤ က့ၢ်ဂီၤအိၣ်ဝဲအသိး ဒူပျၥ်ယၥ်ကီၢ်ရ့ၣ်ပူၤ ဝဲၤကျိၤအိၣ်ဝဲအါဘိ ဒ်အမ့ၢ် တၢ်ကရၢကရိဒီးတၢ်ဘိးဘၣ်ရၤလီၤဝဲၤကျိၤ, ဆူၣ်ချ့မၤစၢၤဝဲၤကျိၤ, ကူၣ်သ့ဆဲးလၤဝဲၤကျိၤ, စံၥ်ပှဲၤသူၣ်ဖျးဝဲၤကျိၤ, သ့ၣ်ပှၢ်ဝဲၤကျိၤ, ခိသွဲကျိၣ်စ့ဝဲၤကျိၤ, ဝံစိၥ်တီဆှၢဒီးတၢ်ဆဲးကျိးကျဲဝဲၤကျိၤ, ဘုၣ်ဖီၣ်မၤညၣ်ဝဲၤကျိၤ ဒီး ကညီဒီကလုၥ်ပၢၤကီၢ်သုးတဖၣ်န့ၣ်လီၤ.
ဒ်န့ၣ်အသိး ကီၢ်ရ့ၣ်ဒူပျၥ်ယၥ်ပူၤ ကမံးတံၥ်အိၣ်ဝဲ ဒ်အမ့ၢ် စံၣ်ညီၣ်ပီတ့ ကမံးတံၥ်, ဖီၣ်ကျၢၤကယၥ်တၢ်ဘျၢ ကမံးတံၥ်, သုးဂ့ၢ်ဝီ ကမံးတံၥ်, ကျိၣ်စ့ဂ့ၢ်ဝီ ကမံးတံၥ် သ့ၣ်တဖၣ်န့ၣ်လီၤ.

လါမးရှး ၃ သီ ၂၀၂၀ နံၣ် ဒူပျၥ်ယၥ်