တၢ်တဲနၢ်ပၢၢ် တၢ်ပတုၥ်တၢ်ခး လံၥ်ဃံးဃၥ်အမူး

မုၢ်နံၤ - လါနိၣ်ဝ့ဘၢၣ် ၂ သီ, ၂၀၁၉ နံၣ်

စုကဝဲၤ တၢ်ဘၣ်ဂံၥ်ဂုၥ်တဖၣ် ပတုၥ်ကွံၥ်သး ကန့ၢ်အဂီၢ် ဒီး တၢ်ပတုၥ်တၢ်ခး ကဂၢၢ်ကျၢၤခၢၣ်သနၢၣ်အဂီၢ် ခိၣ်နၢ်ဘၣ်မူဘၣ်ဒါတဖၣ် တီခိၣ်ရိၣ်မဲ ဒီး မၤဝဲ တၢ်ကတိၤရှဲပၠး ဘၣ်ဃး တၢ်အၢၣ်လီၤဘၣ်သး လၢတၢ်ပတုၥ်တၢ်ခး လံၥ်ဃံးဃၥ်အပူၤ တဖၣ်န့ၣ်လီၤ. တၢ်ရဲၣ်တၢ်ကျဲၤတဘျီအံၤ ဘၣ်တၢ်မၤအီၤဖဲ ချၢၣ်လွံၢ်ထူၣ် ကီၢ်ရ့ၣ်, သုးက့ (၃) သုးဝဲၤလီၢ်ခိၣ်သ့ၣ် ဖဲ လါနိၣ်ဝ့ဘၢၣ် ၂ သီ ၂၀၁၉ နံၣ် န့ၣ်လီၤ. တၢ်တၢၣ်ပီၣ်တဲသကိး တဘျီအံၤ သုးက့ပူၤ သုးခိၣ်သုးနၢ်တဖၣ်, သိၣ်ဒူတဖၣ် ဒီး ခိၣ်နၢ်ဘၣ်မူဘၣ်ဒါတဖၣ် ခဲလၢၥ်ဟဲထီၣ်ဝဲ (၇၀) ဂၤန့ၣ်လီၤ.

တၢ်ရဲၣ်လီၤကျဲၤလီၤအသိး တၢ်တၢၣ်ပီၣ်တဲသကိးတဘျီအံၤ အတၢ်ပညိၣ်တဖၣ် ဘၣ်တၢ်တဲဖျါထီၣ်အီၤလၢ သုးခိၣ်ဒိၣ်ဂီၢ်ဂ့ၢ် စီၤအဲၣ်ကလုၥ်ဖိ ဒီး ဘၣ်ဃးကညီဒီကလုၥ်စၢဖှိၣ်ကရၢ အတၢ်ဂဲၤလိၥ်လၢ ထံလီၢ်ကီၢ်ပူၤ တၢ်မုၥ်တၢ်ခုၣ် အဂ့ၢ်အကျိၤတဖၣ် တခီ ဘၣ်တၢ်ကတိၤရှဲပၠးအီၤလၢ ပဒိၣ်စီၤဘၢၣ်ဘွဲကၠီၣ် (ဆီထံးကီၢ်ဆၣ်) န့ၣ်လီၤ. ဒ်န့ၣ်အသိး ဘၣ်ဃးတၢ်ပတုၥ်တၢ်ခး အဂ့ၢ်အကျိၤတဖၣ်စ့ၢ်ကီး ပဒိၣ်စီၤဆၣ်ဝါ (ချၢၣ်လွံၣ်ထူၣ် ကီၢ်ရ့ၣ်) ဒီး ပဒိၣ်စီၤဘၢၣ်ဘွဲကၠီၣ် တဖၣ် ပၥ်ဖျါရှဲပၠးဝဲ စ့ၢ်ကီးန့ၣ်လီၤ.

တၢ်ဘၢၣ်စၢၤအဆၢကတီၢ် တၢ်ဖံးတၢ်မၤ တၢ်ရဲၣ်တၢ်ကျဲၤ အဂ့ၢ်အခၢးတဖၣ် ပဒိၣ်နီၢ်သီစ့ (ချၢၣ်လွံၢ်ထူၣ်ကီၢ်ရ့ၣ်, ကီၢ်ရ့ၣ်ထီဘိကမံးတံၥ်) ဒီး ပဒိၣ်စီၤဟူသီ (မူကီၢ်ဆၣ်, ကီၢ်ဆၣ်နဲၣ်ရွဲၣ်) တဖၣ် ကတိၤရှဲပၠးဝဲဒၣ် န့ၣ်လီၤ. လၢလီၢ်ခံကတၢၢ် သုးခိၣ်ဒိၣ်စိ စီၤအဲၣ်ကလုၥ်ဖိ ရှဲပၠးဝဲ တၢ်ပတုၥ်တၢ်ခး လံၥ်ဃံးဃၥ် အဂ့ၢ်အကျိၤ ဒီး အတၢ်ဘၣ်ထွဲဒီး ကမျၢၢ်ဖိတဖၣ် အိၣ်ဒ်လဲၣ်အဂ့ၢ်န့ၣ်လီၤ. တၢ်ထံၣ်လိၥ်တၢၣ်ပီၣ် တဲသကိးတဘျီအံၤ တၢ်မၤကတၢၢ်က့ၤအီၤလၢ တၢ်သံကွၢ်စံးဆၢ အတၢ်ရဲၣ်တၢ်ကျဲၤန့ၣ်လီၤ.