တၢ်ရ့လိၥ်ကမျၢၢ်ဒီး တၢ်ကစီၣ်ဘိးဘၣ်ရၤလီၤ တၢ်မၤကမံးတံၥ် (လီၢ်ခၢၣ်သး) မၤဝဲတၢ်ထံၣ်လိၥ်တၢၣ်ပီၣ်တဲသကိးဒီး ဝဲၤကျိၤ, ကီၢ်ရ့ၣ်, သဝခ ဒီး ဂဝခ

Notice

"From the Karen National Political Dialogue to ward the Political Will of the Karen National"

"From the Karen National Political Dialogue to establish a Federal Democratic Union"

တၢ်ဂ့ၢ်အလၢအပှဲၤ

တၢ်ရ့လိၥ်ကမျၢၢ်ဒီး တၢ်ကစီၣ်ဘိးဘၣ်ရၤလီၤ တၢ်မၤကမံးတံၥ် (လီၢ်ခၢၣ်သး) မၤဝဲတၢ်ထံၣ်လိၥ်တၢၣ်ပီၣ်တဲသကိးဒီး ဝဲၤကျိၤ, ကီၢ်ရ့ၣ်, သဝခ ဒီး ဂဝခ

၂၀၂၄ နံၣ် လါစဲးပထ့ဘၢၣ် ၈ သီ, ခ့ၣ်အဲၣ်ယူၣ်-လီၢ်ခၢၣ်သး

ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, အပူၤကွံၥ် တၢ်ကရၢကရိဒီးတၢ်ဘိးဘၣ်ရၤလီၤဝဲၤကျိၤဖီလၥ် တၢ်ကစီၣ်ဒီးတၢ်ဘိးဘၣ်ရၤလီၤဝဲၤဒ့အံၤ ဖဲ ခီကရဲး ၁၇ ဘျီတဘျီဝံၤန့ၣ် တၢ်ကရၢကရိဒုးအိၣ်ထီၣ်ဝဲ ထံရူၢ်ကီၢ်သဲးဒီးရိၣ်ဖှိၣ်ကမံးတံၥ်ဒီး ကမံးတံၥ်အံၤဖီလၥ် တၢ်မၤကမံးတံၥ်အိၣ်ဝဲ ၁၁ ခါအကျါ တၢ်ကစီၣ်ဒီးတၢ်ဘိးဘၣ်ရၤလီၤတၢ်မၤကတံးတံၥ်အံၤ မ့ၢ်ဝဲတၢ်မၤ ကမံးတံၥ်တခါစ့ၢ်ကီးန့ၣ်လီၤ. တၢ်ရ့လိၥ်ကမျၢၢ်ဒီးတၢ်ကစီၣ်ဘိးဘၣ်ရၤလီၤတၢ်မၤကမံးတံၥ် လီၢ်ခၢၣ်သး တီခိၣ်ရိၣ်မဲဒီး ရဲၣ်ကျဲၤမၤဝဲ တၢ်ထံၣ်လိၥ်တၢၣ်ပီၣ်တဲသကိးဒီး ဝဲၤကျိၤခၢၣ်စးတဖၣ်, ကီၢ်ရ့ၣ်တဖၣ်, ပၢပြးတဖၣ်, သုးဂ့ၢ်ဝီခိၣ်နၢ်တဖၣ် ဖဲ ၂၀၂၄ နံၣ် လါအီကူး ၂၆ သီတုၤ ၂၈ သီ လၢ ၃ သီအတီၢ်ပူၤန့ၣ်လီၤ.

လၢတၢ်အိၣ်ဖှိၣ်တၢၣ်ပီၣ်တဲသကိးဘျီဝဲအံၤ ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ကရၢခိၣ် ၂ - လၢအမ့ၢ်စ့ၢ်ကီး ကလုၥ်တၢ်ဘံၣ်တၢ်ဘၢဒီးသုးကီၣ်ကး ကမံးတံၥ် ကမံးတံၥ်ဖိ ပဒိၣ်စီၤဆၢဂ့ၤ, ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ နဲၣ်ရွဲၣ်ခိၣ်ကျၢၢ်သဃဲၤ (၂) - လၢအမ့ၢ်စ့ၢ်ကီး တၢ်ရ့လိၥ်ကမျၢၢ်ဒီးတၢ်ကစီၣ်ဘိးဘၣ်ရၤလီၤတၢ် မၤကမံးတံၥ် ကမံးတံၥ်ခိၣ် ပဒိၣ်စီၤလးထိ, တၢ်ရ့လိၥ်ကမျၢၢ်ဒီးတၢ်ကစီၣ်ဘိးဘၣ်ရၤလီၤတၢ်မၤကမံးတံၥ်လီၢ်ခၢၣ်သး ခိၣ်နၢ်ဘၣ်မူဘၣ်ဒါတဖၣ်, ကညီဒီကလုၥ်တၢ်ထူၣ်ဖျဲးသုးမုၢ်ဒိၣ် သုးဝဲၤလီၢ်ခိၣ်သ့ၣ် ခိၣ်နၢ်တဖၣ်, ကညီဒီကလုၥ်ဂၢၤသးကရၢ ဂၢၤသးသုးဝဲၤလီၢ်ခိၣ်သ့ၣ် ခိၣ်နၢ်တဖၣ်, လီၢ်ခၢၣ်သး ဝဲၤကျိၤခိၣ်နၢ် တဖၣ်, ကီၢ်ရ့ၣ်ခိၣ်နၢ်ခၢၣ်စးတဖၣ်, ကညီသးစၢ်ကရၢခိၣ်နၢ်ခၢၣ်စးတဖၣ်, ကညီပိၥ်မုၣ်ကရၢခိၣ်နၢ်ခၢၣ်စးတဖၣ်, ကီၢ်သူလ့ၤပှၤမၤတၢ်ဖိကရၢစၢဖှိၣ် ခိၣ်နၢ်ခၢၣ်စးတဖၣ်, တၢ်ဟ့ၣ်တၢ်သ့ၣ်ညါဒီးသူၣ်ထီၣ်ဆီလီၤဝဲၤဒ့ ခိၣ်နၢ်ခၢၣ်စးတဖၣ် ဒီး ဟီၣ်ခိၣ်ဖိခွဲးယၥ်ကမံးတံၥ် ခိၣ်နၢ်ခၢၣ်စးတဖၣ် ခဲလၢၥ် ခိၣ်နၢ်ခၢၣ်စးဟဲထီၣ်ဝဲ ၅၅ ဂၤန့ၣ် လီၤ.

လၢတၢ်အိၣ်ဖှိၣ်တၢၣ်ပီၣ်တဲသကိးဘျီဝဲအံၤ တၢ်ရ့လိၥ်ကမျၢၢ်ဒီးတၢ်ကစီၣ်ဘိးဘၣ်ရၤလီၤ တၢ်မၤကမံးတံၥ် ကမံးတံၥ်ခိၣ် ပဒိၣ်စီၤလးထိစံးဝဲဒၣ်လၢ ခ့ၣ်အဲၣ်ယူၣ် ခီကရဲးဝံၤအလီၢ်ခံ ၁ နံၣ်ဘျဲၣ်မးဒီး တၢ်ကိးဝဲတၢ်အိၣ်ဖှိၣ်ဒ်အံၤန့ၢ်ဝဲဒၣ်န့ၣ်လီၤ. ဒ်သိး တၢ်ရ့လိၥ်ကမျၢၢ်ဒီးတၢ်ကစီၣ်ဘိးဘၣ်ရၤလီၤ တၢ်မၤကမံးတံၥ် အတၢ်ဖံးတၢ်မၤ မူဒါတဖၣ် ကလဲၤသးဘၣ်ဂ့ၢ်ဘၣ်ဝီ, တၢ်ဆၢကျၢဆဲးကျိးလိၥ်သး ကဂ့ၤထီၣ်အဂီၢ် ဒီး ကီၢ်ရ့ၣ်ပတီၢ် တၢ်ရ့လိၥ်ကမျၢၢ်ဒီးတၢ်ကစီၣ်ဘိးဘၣ်ရၤလီၤတၢ်မၤကမံးတံၥ် ဒီး လီၢ်ခၢၣ်သး ပတီၢ် တၢ်ရ့လိၥ်ကမျၢၢ်ဒီးတၢ်ကစီၣ်ဘိးဘၣ်ရၤလီၤ တၢ်မၤကမံးတံၥ် တၢ်ဖီၣ်လိၥ်စုမၤသကိးတၢ်ကဂ့ၤထီၣ်အဂီၢ် တၢ်ကိးဝဲတၢ်အိၣ်ဖှိၣ်အံၤန့ၣ်လီၤ. ဒီးတၢ်အံၤမ့ၢ်ဒ်သိး တၢ်ကမၤဂ့ၤထီၣ် တၢ်ကစီၣ်ဘိးဘၣ်ရၤလီၤတၢ်ဖံးတၢ်မၤတဖၣ် ဒ်သိး ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ အထံရူၢ်ကီၢ်သဲး, သုးဂ့ၢ်ဝီ ဒီးတၢ်ပၢတၢ်ပြးဂ့ၢ်ဝီတဖၣ် တၢ်ကရၤလီၤဒုးသ့ၣ်ညါ ထံဖိကီၢ်ဖိကမျၢၢ်အဂီၢ်န့ၣ်လီၤ. ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ကရၢခိၣ် ၂ ပဒိၣ်စီၤဆၢဂ့ၤ စံးဝဲဒၣ်လၢ တၢ်ရ့လိၥ်ကမျၢၢ်ဒီးတၢ်ကစီၣ်ဘိးဘၣ်ရၤလီၤတၢ်မၤကမံးတံၥ်အံၤ အရ့ဒိၣ်ဝဲဒၣ်လၢ ကမၤသကိးတၢ်ဒီး ထံဖိကီၢ်ဖိကမျၢၢ်, ဝဲၤကျိၤဝဲၤဒ့တဖၣ် ဒီး သုးဂ့ၢ်ဝီအဂီၢ် တၢ်ဖံးတၢ်မၤမ့ၢ်ဂ့ၤန့ၣ်လီၤ. တၢ်မၤအံၤ တမ့ၢ်ထဲ ထံရူၢ်ကီၢ်သဲးဒီးရိၣ်ဖှိၣ်ကမံးတံၥ် အမူအဒါဧိၤဘၣ်. ကလုၥ်ဘံၣ်ဘၢဒီးသုးကီၣ်ကးကမံးတံၥ်စ့ၢ်ကီး အမူအဒါအိၣ် ဝဲဒၣ်န့ၣ်လီၤ. ဒ်သိးတၢ်မၤဖျါထီၣ်တၢ်ရ့လိၥ်မုၥ်လိၥ်ဒီးကမျၢၢ် ဒီး တၢ်မၤလၢပှဲၤကမျၢၢ်အတၢ်မိၣ်န့ၢ်သးလီကန့ၢ်အဂီၢ် မူဒါအိၣ်ဝဲဒၣ်လၢ တၢ်ကစီၣ်ဘိးဘၣ်ရၤလီၤကမံးတံၥ်သ့ၣ်တဖၣ်အစုပူၤအဂ့ၢ်, ဒ်သိး တၢ်မၤဖျါထီၣ်ကမျၢၢ်အတၢ်လိၣ်ဘၣ်ကန့ၢ်အဂီၢ် အလီၢ်အိၣ်လၢပကဘၣ်ပၥ်ဖှိၣ်မၤသကိးတၢ်ဃူဃူဖိးဖိးအဂ့ၢ် ဒီး တၢ်အိၣ်ဖှိၣ်အံၤ ဆၢမုၢ်လၢ်လၢ ကဟဲစိၥ်တၢ်အဆၢလၢအဂ့ၤ ကန့ၢ်အဂီၢ်, ပဒိၣ်စီၤဆၢဂ့ၤ ကတိၤဟ့ၣ်ဂံၢ်ဟ့ၣ်ဘါဒီး ဟံးစုနဲၣ်ကျဲဝဲဒၣ်န့ၣ်လီၤ.

လၢတၢ်အိၣ်ဖှိၣ်ဘျီဝဲအံၤ တၢ်တဲသကိးဝဲ ဘၣ်ဃး တၢ်ရ့လိၥ်ကမျၢၢ်ဒီးတၢ်ကစီၣ်ဘိးဘၣ်ရၤလီၤ တၢ်မၤကမံးတံၥ် အတၢ်သူၣ်ထီၣ်ဆီလီၤက့ၢ်ဂီၤ, တၢ်ဖံးတၢ်မၤမူဒါ, ခ့ၣ်အဲၣ်ယူၣ် Media Policy and Social Media Guideline သ့ၣ်တဖၣ် ဒီး ဒ်အလီၢ်အိၣ်အသိး တၢ်ဘှီဘၣ်မၤပှဲၤအီၤအိၣ်စ့ၢ်ကီးဝဲဒၣ်န့ၣ်လီၤ. တၢ်အိၣ်ဖှိၣ်ဘျီဝဲအံၤ တၢ်အၢၣ်လီၤဆၢတဲၥ်ဝဲ ခါဆူညါတၢ်မၤအိၣ်ဝဲဒၣ် ၁၅ ထံၣ်န့ၣ်လီၤ.