Notice
လီၢ်ခၢၣ်သး
ကညီဒီကလုၥ်မၤထူရၤမုၢ်နံၤ ပှဲၤထီၣ် (၇၄) ဝီတဝီ ဘၣ်တၢ်မၤအီၤဖဲ ယိၤကီၢ်-ကီၢ်ပယီၤကီၢ်ဆၢ တၢ်လီၢ်တတီၤ
၂၀၂၄ နံၣ် လါအီကူး ၁၃ သီ, ခ့ၣ်အဲၣ်ယူၣ်-လီၢ်ခၢၣ်သး
ဖဲ ၂၀၂၄ နံၣ် လါအီကူး ၁၂ သီအနံၤန့ၣ် တၢ်မၤလၤကပီၤဝဲ ကညီဒီကလုၥ်တၢ်ပၢၢ်ဆၢမုၢ်နံၤ ပှဲၤထီၣ် ၇၄ ဝီတဝီ ဖဲ ကီၢ်ပယီၤ-ယိၤကီၢ် ကီၢ်ဆၢတၢ်လီၢ်တတီၤန့ၣ် လီၤ. တၢ်မၤလၤကပီၤမူးတၢ်ရဲၣ်တၢ်ကျဲၤအံၤ တၢ်စးထီၣ်အီၤဖဲ ဂီၤခီ ၈ နၣ်ရံၣ်အဆၢကတီၢ် ဒီး ပှၤကယၢကယဲမူးမ့ၢ်ဝဲ ပဒိၣ်စီၤကၠဲၣ်ပစံၣ် ဒီး ပှၤပၢၤလီၢ်ဆ့ၣ်နီၤမ့ၢ်ဝဲ သရၣ်စီၤဆူၣ်ခဲၣ် န့ၣ်လီၤ.
တၢ်စးထီၣ် တၢ်မၤလၤကပီၤမူးတၢ်ရဲၣ်တၢ်ကျဲၤ ခီဖျိ တၢ်ဟ့ၣ်ထီၣ်တၢ်ယူးယီၣ်ဆူ ကညီဒီကလုၥ်နီၣ်တယၢ်ဝံၤ, တၢ်ဟ့ၣ်ထီၣ်ကဒီးတၢ်ယူးယီၣ်ဆူ ခိၣ်နၢ်, သိၣ်ဒူ, ကမျၢၢ်ထံဖိကီၢ်ဖိလၢ အဟ့ၣ်လီၤတ့ၢ်အသးလၢ ထံကီၢ်ဒီးကလုၥ်ဂီၢ်တဖၣ်န့ၣ်လီၤ. ဝံၤအလီၢ်ခံ ပှၤပၢၤလီၢ်ဆ့ၣ်နီၤ ကတိၤအိးထီၣ်ဝဲမူးတၢ်ရဲၣ်တၢ်ကျဲၤဝံၤ သရၣ်စီၤအဲၣ်တၢ်မူ ဖးဖျါထီၣ်ဝဲ ကီၢ်ခိၣ်စီၤဘးအူကၠံ အသးသမူအဂ့ၢ်အကျိၤဖုၣ်ကိၥ်န့ၣ်လီၤ. ဝံၤအလီၢ်ခံ သရၣ်စီၤသ့ဒိၣ် ဖးဖျါထီၣ်ဝဲ ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ကရၢခိၣ် ပဒိၣ်စီၤကွဲၤထူဝ့ အလံၥ်ဟ့ၣ်ယုၢ်, စီၤလ့ခလ့ ဖးဖျါထီၣ်ဝဲ ကညီဒီကလုၥ်ဂၢၤသးကရၢ အလံၥ်ဟ့ၣ်ယုၢ်, သရၣ်မုၣ်နီၢ်ဟဲဘျူးစိ ဖးဖျါထီၣ်ဝဲ ကညီသးစၢ် ကရၢအလံၥ်ဟ့ၣ်ယုၢ်, ဒီး သရၣ်မုၣ် နီၢ်အဲၣ်ဆၢခုၣ် ဖးဖျါထီၣ်ဝဲ ကညီပိၥ်မုၣ်ကရၢ အလံၥ်ဟ့ၣ်ယုၢ်တဖၣ် န့ၣ်လီၤ.
ဝံၤအလီၢ်ခံ ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ခိၣ်နၢ်တဖၣ် ဒ်အမ့ၢ် ပဒိၣ်စီၤအဲၣ်ကလုၥ်စ့ (ခ့ၣ်အဲၣ်ယူၣ် ပၢဆှၢတၢ်ကမံးတံၥ်), ပဒိၣ်စီၤကျၢၤစ့ (ခ့ၣ်အဲၣ်ယူၣ် ထီဘိကမံးတံၥ်, မ့ၢ်စ့ၢ်ကီး ပှၤကတိၤတၢ်ပၢ), သုးခိၣ်ဒိၣ်ဂီၢ်ဂ့ၢ် စီၤန့ၢ်ဒိၣ်မူ (ကညီဒီကလုၥ်ဂၢၤသးကရၢ သုးဂ့ၢ်ဝီခိၣ်), သရၣ်မုၣ်နီၢ်စ့ထူ ဒီး တၢ်ဘူၣ်တၢ်ဘါခိၣ်နၢ် တဖၣ် ကတိၤဟ့ၣ်ဂံၢ်ဟ့ၣ်ဘါဝဲ ထံဖိကီၢ်ဖိကမျၢၢ်တဖၣ်န့ၣ်လီၤ.
ဝံၤအလီၢ်ခံ သရၣ်စီၤရ့ကၠၢ ကတိၤစံးဘျူးစံးဖှိၣ်ဝဲ ပှၤကိးဂၤဒဲးဝံၤ ပှၤပၢၤလီၢ်ဆ့ၣ်နီၤ သရၣ်စီၤဆူၣ်ခဲၣ် ကတိၤကျၢၢ်တံၢ်က့ၤမူးဝံၤ တၢ်သးဝံၣ်ပျၢ်က့ၤမူးလၢ ကညီဒီကလုၥ်တၢ်သး၀ံၣ် ဒီး တၢ်ထုကဖၣ်ဆၢဂ့ၤဆၢဝါ န့ၣ်လီၤ.
လၢတၢ်မၤလၤကပီၤမူးတၢ်ရဲၣ်တၢ်ကျဲၤတဘျီအံၤ ကညီသးစၢ်ပှၤသးဝံၣ်တၢ်ဖိတဖၣ်စ့ၢ်ကီး သးဝံၣ်မၤလၤကပီၤမၤထူရၤတဖၣ်လၢ တၢ်သူၣ်ဝံၣ်သးဆၢစ့ၢ်ကီးန့ၣ်လီၤ. တၢ်မၤလၤကပီၤမူးအံၤ ပှၤဟဲထီၣ်ဝဲ ကအိၣ် ၅၀၀ ဂၤဃၣ်ဃၣ်န့ၣ်လီၤ.
တၢ်ဟူးတၢ်ဂဲၤလၢအဘၣ်ထွဲတဖၣ်
