တၢ်ဟ့ၣ်တၢ်သ့ၣ်ညါဒီးသူၣ်ထီၣ်ဆီလီၤဝဲၤဒ့ (လီၢ်ခၢၣ်သး) တီခိၣ်ရိၣ်မဲဒီးရဲၣ်ကျဲၤမၤဝဲ ထံရူၢ်ကီၢ်သဲးတၢ်တၢၣ်ပီၣ်တဲသကိးလၢအခိၣ်တီမ့ၢ်ဝဲ (သူၣ်ထီၣ်ကီၢ်သူလ့ၤလၢအဂၢၢ်အကျၢၤခီဖျိဖံးမၤတၢ်လၢကမျၢၢ်ဂီၢ်)

တၢ်ဟ့ၣ်တၢ်သ့ၣ်ညါဒီးသူၣ်ထီၣ်ဆီလီၤဝဲၤဒ့ (လီၢ်ခၢၣ်သး) တီခိၣ်ရိၣ်မဲဒီးရဲၣ်ကျဲၤမၤဝဲ ထံရူၢ်ကီၢ်သဲးတၢ်တၢၣ်ပီၣ်တဲသကိးလၢအခိၣ်တီမ့ၢ်ဝဲ (သူၣ်ထီၣ်ကီၢ်သူလ့ၤလၢအဂၢၢ်အကျၢၤခီဖျိဖံးမၤတၢ်လၢကမျၢၢ်ဂီၢ်)

၂၀၂၄ နံၣ် လါစဲးပထ့ဘၢၣ် ၁ သီ, ခ့ၣ်အဲၣ်ယူၣ်-လီၢ်ခၢၣ်သး

ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, ထံရူၢ်ကီၢ်သဲးဒီးရိၣ်ဖှိၣ်ကမံးတံၥ် တၢ်တီခိၣ်ရိၣ်မဲဖီလၥ် တၢ်မၤကမံးတံၥ်တဖၣ်အကျါ တၢ်ဟ့ၣ်တၢ်သ့ၣ်ညါဒီးသူၣ်ထီၣ်ဆီ လီၤတၢ်မၤကမံးတံၥ်အံၤ မ့ၢ်ဝဲဒၣ်တၢ်မၤကမံးတံၥ်အကျါတခါန့ၣ်လီၤ. ဖဲ ၂၀၂၄ နံၣ် လါအီကူး ၃၁ သီအနံၤန့ၣ် တၢ်ဟ့ၣ်တၢ်သ့ၣ်ညါဒီးသူၣ်ထီၣ်ဆီလီၤတၢ်မၤက မံးတံၥ် (လီၢ်ခၢၣ်သး) တီခိၣ်ရိၣ်မဲဒီး ရဲၣ်ကျဲၤမၤဝဲ ထံရူၢ်ကီၢ်သဲးတၢ်တၢၣ်ပီၣ်တဲသကိးတခါ လၢအခိၣ်တီမ့ၢ်ဝဲ သူၣ်ထီၣ်ကီၢ်သူလ့ၤလၢအဂၢၢ်အကျၢၤခီဖျိတၢ်ဖံးမၤ တၢ်လၢကမျၢၢ်အဂီၢ်, တၢ်တၢၣ်ပီၣ်တဲသကိးအံၤ တၢ်ရဲၣ်ကျဲၤမၤအီၤဖဲ ခ့ၣ်အဲၣ်ယူၣ် လီၢ်ခၢၣ်သး န့ၣ်လီၤ.

ထံရူၢ်ကီၢ်သဲး တၢ်တၢၣ်ပီၣ်တဲသကိးဘျီဝဲအံၤ ဘၣ်တၢ်တီခိၣ်ရိၣ်မဲပၢဆှၢအီၤလၢ ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, တၢ်ဟ့ၣ်တၢ်သ့ၣ်ညါဒီးသူၣ်ထီၣ်ဆီလီၤ တၢ်မၤကမံးတံၥ် (လီၢ်ခၢၣ်သး) ပှၤဘၣ်မူဘၣ်ဒါ သရၣ်မုၣ်နီၢ်အဲၣ်ဖီဝါ န့ၣ်လီၤ. ပှၤလၢအပၣ်ဃုၥ်လၢ တၢ်တၢၣ်ပီၣ်တဲသကိးဘျီဝဲအံၤတဖၣ်မ့ၢ်ဝဲ ဒူသထူၣ်ကီၢ်ရ့ၣ် ကညီသးစၢ်ကရၢ ကရၢခိၣ် သရၣ်လွါမိနဲၣ်, ဘျံးဒဝဲၢ်ကီၢ်ရ့ၣ် ကညီသးစၢ်ကရၢ ခၢၣ်စး သရၣ်မုၣ်နီၢ်သူလ့ၤဖီ, ကညီဆူၣ်ချ့မၤစၢၤဝဲၤကျိၤခၢၣ်စး သရၣ်စီၤမုၢ်ပှဲၤသီ, ကညီပိၥ်မုၣ်ကရၢခၢၣ်စး သရၣ်မုၣ်နီၢ်ဖီသ့ၣ်ဒ့ ဒီး ကညီကူၣ်သ့ဆဲးလၤဝဲၤကျိၤခၢၣ်စး သရၣ်စီၤထဲၣ်သူၤရၣ် သ့ၣ်တဖၣ်န့ၣ်လီၤ.

လၢတၢ်တၢၣ်ပီၣ်တဲသကိးတဘျီအံၤ ပှၤလၢအတီခိၣ်ရိၣ်မဲ တၢၣ်ပီၣ်တဲသကိးတၢ်တဖၣ် တၢၣ်ပီၣ်တဲသကိးဝဲဘၣ်ဃး အဝဲသ့ၣ်အတၢ်ဖံးတၢ်မၤလၢပျီပူၤအတၢ်လဲၤခီ ဖျိဒီးတၢ်ဘၣ်ကွၢ်ဆၢၣ်မဲၥ်တဖၣ် တကးဒံးဘၣ် ဒ်သိးတၢ်သူၣ်ထီၣ်ကီၢ်သူလ့ၤလၢအဂၢၢ်အကျၢၤကန့ၢ်ကသ့အဂီၢ် တၢ်ကဘၣ်မၤန့ၢ်ကမျၢၢ်သ့ၣ်တဖၣ် တၢ်မနုၤလဲၣ် ဒီး ကမျၢၢ်အတၢ်လိၣ်ဘၣ်မ့ၢ်တၢ်မနုၤလဲၣ်တဖၣ် တၢၣ်ပီၣ်တဲသကိးဝဲဒၣ်န့ၣ်လီၤ. လၢတၢ်တၢၣ်ပီၣ်တဲသကိးဘျီဝဲအံၤ ခိၣ်နၢ်သးစၢ်လၢ အမၤတၢ်လၢ တၢ်ပၢတၢ်ပြး, သုးဂ့ၢ်ဝီ ဒီး ဝဲၤကျိၤဝဲၤဒ့ ဘၣ်ထွဲတဖၣ် ခဲလၢၥ်အဂၤ (၅၀) ဘျဲၣ်ဟဲထီၣ်ဝဲဒၣ်န့ၣ်လီၤ.

ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, တၢ်ဟ့ၣ်တၢ်သ့ၣ်ညါဒီးသူၣ်ထီၣ်ဆီလီၤတၢ်မၤကမံးတံၥ် လီၢ်ခၢၣ်သး ရဲၣ်ကျဲၤမၤဝဲ တၢ်တၢၣ်ပီၣ်တဲသကိး ၂ ဘျီလံ, ဖဲအပူၤကွံၥ် ၂၀၂၄ နံၣ် လါယူၤလံ ၃၀ သီအနံၤန့ၣ် တၢ်မၤဝဲတၢ်တၢၣ်ပီၣ်တဲသကိးတခါ လၢအခိၣ်တီမ့ၢ်ဝဲ တၢ်သူၣ်ထီၣ်ကီၢ်သူလ့ၤခီဖျိ တၢ်ဖီလၥ်ဆူထး - Bottom-Up Federalism အက့ၢ်အဂီၤန့ၣ်လီၤ.