ကီၢ်ရ့ၣ်တဖၣ်
ဒူပျၥ်ယၥ်ကီၢ်ရ့ၣ်, သုးက့ခိၣ်နၢ်တဖၣ် တီခိၣ်ရိၣ်မဲဒီး မၤလၤကပီၤဝဲ (၇၃) ဝီတဝီ ကညီမၤထူရၤမုၢ်နံၤ
လါအီကူး ၁၃ သီ ၂၀၂၃ နံၣ်, ခ့ၣ်အဲၣ်ယူၣ်-လီၢ်ခၢၣ်သး
ဖဲ ၂၀၂၃ နံၣ် လါအီကူး ၁၂ သီအနံၤန့ၣ် ဒူပျၥ်ယၥ်ကီၢ်ရ့ၣ် ကီၢ်ရ့ၣ်ခိၣ်နၢ်ဒီး သုးက့ (၆) သုးက့ခိၣ်နၢ်တဖၣ် ပၥ်ဖှိၣ်ထီၣ်အသး ဒီးတီခိၣ်ရိၣ်မဲ ရဲၣ်ကျဲၤမၤလၤကပီၤဝဲ ကညီမၤထူရၤမုၢ်နံၤ ပှဲၤထီၣ် (၇၃) ဝီတဝီအမူး ဖဲဒူပျၥ်ယၥ်ကီၢ်ရ့ၣ်, နိၣ်တကီကီၢ်ဆၣ်, မဲၢ်ကသၣ်ကရူၢ်ပူၤန့ၣ်လီၤ.
လၢတၢ်မၤလၤကပီၤမူး တၢ်ရဲၣ်တၢ်ကျဲၤတဘျီအံၤ မဲၢ်ကသၣ်ကရူၢ်ပူၤ ထံဖိကီၢ်ဖိတဖၣ်, ကီၢ်ရ့ၣ်ခိၣ်နၢ်တဖၣ်, သုးက့ခိၣ်နၢ်တဖၣ်, သိၣ်မှံၤခိၣ်နၢ်တဖၣ် ဒီးကၠိဖိမုၣ်ခွါတဖၣ် ခဲလၢၥ် (၅၀၀) ဘျဲၣ်ဟဲထီၣ်မၤလၤကပီၤဝဲဒၣ်န့ၣ်လီၤ.
တၢ်မၤလၤကပီၤ မူးတၢ်ရဲၣ်တၢ်ကျဲၤအဆၢကတီၢ် ပှၤကယၢကယဲမူး ဖးဖျါထီၣ်ဝဲ တၢ်ရဲၣ်လီၤကျဲၤလီၤဝံၤ, တၢ်ဟ့ၣ်ထီၣ်တၢ်ယူးယီၣ်ဆူ ကညီဒီကလုၥ်နီၣ်တယၢ်န့ၣ်လီၤ. ဝံၤအလီၢ်ခံ တၢ်ဟ့ၣ်ထီၣ်ကဒီးဝဲ တၢ်ယူးယီၣ်ဆူ ကီၢ်ခိၣ်စီၤဘးအူကၠံ ဃုၥ်ဒီးမၤထူရၤခိၣ်နၢ်, သိၣ်ဒူ ဒီးကမျၢၢ်ထံဖိကီၢ်ဖိ လၢအလုၢ်ထီၣ်တ့ၢ်သးသမူလၢ ထံကီၢ်ဒီးပှၤကလုၥ်ဂီၢ် တဖၣ်န့ၣ်လီၤ. ဝံၤဒီး တၢ်ဖးဖျါထီၣ်ဝဲ ခ့ၣ်အဲၣ်ယူၣ်လီၢ်ခၢၣ်သး အလံၥ်ဟ့ၣ်ယုၢ်, တၢ်ပၥ်လီၤဝဲ တၢ်သးအုးဖီကွီၤ, ဒီးကီၢ်ရ့ၣ်ခိၣ်နၢ် ဒီး သုးက့ခိၣ်နၢ်တဖၣ် ကတိၤတၢ်ဂံၢ်ဟ့ၣ်ဘါဝဲ ခိၣ်နၢ်, သိၣ်ဒူ ဒီးထံဖိကီၢ်ဖိ လၢဟဲထီၣ်တဖၣ်န့ၣ်လီၤ. ဝံၤအလီၢ်ခံ ကၠိဖိမုၣ်ခွါတဖၣ် သးဝံၣ်မၤလၤကပီၤဝဲ ကညီမၤထူရၤတဖၣ် လၢမၤထူရၤအတၢ်သးဝံၣ်န့ၣ်လီၤ.
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, ဒူပျၥ်ယၥ်ကီၢ်ရ့ၣ် ကီၢ်ရ့ၣ်နဲၣ်ရွဲၣ် ကတိၤဟ့ၣ်ဂံၢ်ဟ့ၣ်ဘါ ဆီၣ်သခူထီၣ် ခိၣ်နၢ်, သိၣ်ဒူ, ဒီးထံဖိကီၢ်ဖိတဖၣ်လၢ မ်ပကသ့ၣ်နီၣ်ထီၣ်က့ၤ ကီၢ်ခိၣ်စီၤဘးအူကၠံ အတၢ်ကတိၤ အတၢ်ဖံးတၢ်မၤတဖၣ် ဒီးဟံးထီၣ်မၤက့ၤ ပမူပဒါ လၢတၢ်ကမၤလၢပှဲၤ မၤထူရၤတဖၣ် အတၢ်မိၣ်န့ၢ်သးလီ ဒီး တၢ်မၤလၢပှဲၤ ကညီဒီကလုၥ် အတၢ်မိၣ်န့ၢ်သးလီတဖၣ် အဂီၢ်န့ၣ်လီၤ. တၢ်မၤလၤကပီၤ တၢ်ရဲၣ်တၢ်ကျဲၤအံၤ တၢ်ပျၢ်ကွံၥ်အီၤလၢ ကညီဒီကလုၥ်အတၢ်သးဝံၣ်န့ၣ်လီၤ.
တၢ်ဟူးတၢ်ဂဲၤလၢအဘၣ်ထွဲတဖၣ်
