ကီၢ်ရ့ၣ်တဖၣ်
ကြုၢ်တုကီၢ်ဆၣ် ခိၣ်နၢ်ဘၣ်မူဘၣ်ဒါတဖၣ် တီခိၣ်ရိၣ်မဲဒီး ရဲၣ်ကျဲၤမၤဝဲ တၢ်သ့ၣ်နီၣ်မၤလၤကပီၤ ကညီမၤထူရၤမုၢ်နံၤ ပှဲၤထီၣ် (၇၃) ဝီတဝီ
လါအီကူး ၁၃ သီ ၂၀၂၃ နံၣ်, ခ့ၣ်အဲၣ်ယူၣ်-လီၢ်ခၢၣ်သး
ဖဲ ၂၀၂၃ နံၣ် လါအီကူး ၁၂ သီအနံၤန့ၣ် ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, ဒူပျၥ်ယၥ်ကီၢ်ရ့ၣ်, ကြုၢ်တုကီၢ်ဆၣ် ကီၢ်ဆၣ်ပှၤဘၣ်မူဘၣ်ဒါတဖၣ် တီခိၣ်ရိၣ်မဲ ဒီးရဲၣ်ကျဲၤမၤလၤကပီၤဝဲ (၇၃) ဝီတဝီကညီမၤထူရၤမုၢ်နံၤအမူး ဖဲကြုၢ်တုကီၢ်ဆၣ် ထံဆီခံသဝီန့ၣ်လီၤ. လၢတၢ်မၤလၤကပီၤမူး အတၢ်ရဲၣ်တၢ်ကျဲၤတဘျီအံၤ ကီၢ်ဆၣ်ခိၣ်နၢ်ဘၣ်မူဘၣ်ဒါတဖၣ်, တမှံၤခိၣ်နၢ်တဖၣ်, သိၣ်မှံၤခိၣ်နၢ်တဖၣ် ဒီးထံဖိကီၢ်ဖိတဖၣ် ဟဲထီၣ်မၤလၤကပီၤသကိးဝဲဒၣ်န့ၣ်လီၤ. တၢ်မၤလၤကပီၤမူးတၢ်ရဲၣ်တၢ်ကျဲၤတဘျီအံၤ ပှၤဟဲထီၣ်အိၣ်ဝဲ (၅၀၀) ဘျဲၣ်န့ၣ်လီၤ.
တၢ်မၤလၤကပီၤမူး တၢ်ရဲၣ်တၢ်ကျဲၤအံၤ ဘၣ်တၢ်နီၤဖးအီၤ ၂ ပတီၢ်န့ၣ်လီၤ. တၢ်ရဲၣ်တၢ်ကျဲၤ ၁ တပတီၢ်အပူၤန့ၣ် ကြုၢ်တုကီၢ်ဆၣ် ကညီဒီကလုၥ်ပၢၤကီၢ်သုး သုးခိၣ် စီၤဒံၣ်မိ ဟ့ၣ်တၢ်ကလုၢ်လၢ တၢ်ဟ့ၣ်ထီၣ်သကိးဝဲ တၢ်ယူးယီၣ်ဆူ ကညီဒီကလုၥ်နီၣ်တယၢ်ဝံၤ, တၢ်ဟ့ၣ်ထီၣ်ဝဲ တၢ်ယူးယီၣ်ဆူ ကီၢ်ခိၣ်စီၤဘးအူကၠံ ဃုၥ်ဒီးခိၣ်နၢ်, သိၣ်ဒူဒီးထံဖိကီၢ်ဖိ မၤထူရၤလၢ အလုၢ်ထီၣ်တ့ၢ်အသးမူလၢ ထံကီၢ်ဒီးကလုၥ်အဂီၢ် ဒီးတၢ်ပၥ်လီၤဝဲ တၢ်သးအုးအဖီကွီၤ လၢမၤထူရၤအလၢၢ်ထူၣ်အလိၤန့ၣ်လီၤ.
တၢ်ရဲၣ်တၢ်ကျဲၤ ၂ ပတီၢ်တပတီၢ်အပူၤ ကြုၢ်တုကီၢ်ဆၣ် ကညီဒီကလုၥ်ပၢၤကီၢ်သုး သုးခိၣ်စီၤဒံၣ်မိ ဟ့ၣ်တၢ်ကလုၢ်လၢ တၢ်ကဟ့ၣ်ထီၣ်တၢ်ယူးယီၣ်ဆူ ကညီဒီကလုၥ်နီၣ်တယၢ်န့ၣ်လီၤ. ဝံၤအလီၢ်ခံ သုးခိၣ်စီၤဒံၣ်မိ ဟ့ၣ်ကဒီးတၢ်ကလုၢ်လၢ တၢ်ကဟ့ၣ်ထီၣ်တၢ်ယူးယီၣ်ဆူ ကီၢ်ခိၣ်စီၤဘးအူကၠံ ဒီးခိၣ်နၢ်, သိၣ်ဒူ, ကမျၢၢ်လၢအလုၢ်ထီၣ်တ့ၢ်သးသမူလၢ ထံကီၢ်ဒီးကလုၥ်အဂီၢ် တဖၣ်န့ၣ်လီၤ. ဝံၤဒီး ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, ဒူပျၥ်ယၥ်ကီၢ်ရ့ၣ်, ကြုၢ်တုကီၢ်ဆၣ် ကီၢ်ဆၣ်ခိၣ် ပဒိၣ်မါကၠၣ်ညိၤ ကတိၤအိးထီၣ်ဝဲ မူးအတၢ်ရဲၣ်တၢ်ကျဲၤဝံၤ တၢ်ဖးဖျါထီၣ်ဝဲ ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ လီၢ်ခၢၣ်သးအလံၥ်ဟ့ၣ်ယုၢ် လၢအဟ့ၣ်ယုၢ်ဝဲဖဲ ၇၃ ၀ီတဝီ ကညီမၤထူရၤမုၢ်နံၤ အံၤန့ၣ်လီၤ. ပိၥ်ထွဲထီၣ်အခံလၢ တၢ်သးဝံၣ်ဝဲ တၢ်ပၢၢ်ဆၢတၢ်သးဝံၣ်, ကညီဒီကလုၥ်တၢ်သးဝံၣ်ဝံၤ တၢ်ဘူၣ်တၢ်ဘါခိၣ်နၢ်, သိၣ်မှံၤကရၢအခိၣ်အနၢ်တဖၣ် ကတိၤဟ့ၣ်ဂံၢ်ဟ့ၣ်ဘါဝဲ ခိၣ်နၢ်, သိၣ်ဒူ ဒီး ကမျၢၢ် လၢအဟဲတဖၣ်န့ၣ်လီၤ.
ပိၥ်ထွဲထီၣ်အခံလၢ တၢ်မၤလၤကပီၤတၢ်ပၢၢ်ဆၢခိၣ်နၢ်, သိၣ်ဒူလီၢ်လံၤ ဃုၥ်ဒီးခိၣ်နၢ်, သိၣ်ဒူ လၢအဟ့ၣ်လီၤတ့ၢ်အသးသမူလၢ ထံကီၢ်ဒီးကလုၥ်ဂီၢ်တဖၣ် အဟံၣ်ဖိဃီဖိန့ၣ်လီၤ. ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ကြုၢ်တုကီၢ်ဆၣ် ကီၢ်ဆၣ်နဲၣ်ရွဲၣ် ပဒိၣ်စီၤသယုၢ်မူ ကတိၤဒိၣ်ဝဲ တၢ်ပၢၢ်ဆၢခိၣ်နၢ်, သိၣ်ဒူလီၢ်လံၤ ဒီးတၢ်ပၢၢ်ဆၢခိၣ်နၢ်, သိၣ်ဒူလၢဟ့ၣ်လီၤအသးသမူတဖၣ် အဟံၣ်ဖိဃီဖိတဖၣ်ဝံၤ ခိၣ်နၢ်, သိၣ်ဒူလီၢ်လံၤ လၢတၢ်မၤလၤကပီၤအီၤတဖၣ် အခၢၣ်စး ၁ ဂၤ ကတိၤစံးဘျူးဝံၤ, တၢ်မၤလၤကပီၤ ကညီမၤထူရၤမုၢ်နံၤအဂီၢ် တၢ်လိၥ်ခိၣ်လိၥ်ကွဲ တၢ်ပြၢကတီၢ် ပှၤလၢမၤန့ၢ်ခိၣ်ဖးတဖၣ် တၢ်ဟ့ၣ်လီၤကွံၥ်ဝဲခိၣ်ဖးဝံၤ မူးတၢ်ကဲထီၣ်လိၣ်ထီၣ်ကမံးတံၥ်ခိၣ် စရဲယ့ၣ်အီၣ် ကတိၤစံးဘျူးဝဲ ပှၤဂီၢ်မုၢ်ဝံၤ, ကညီဒီကလုၥ်ဂၢၤသးကရၢ ဂၢၤသးသုးရ့ၣ် (၆) သုးရ့ၣ်ခိၣ် သုးခိၣ်ဒိၣ်ဂီၢ်ဂ့ၢ် မါညိၣ်မီၤ ကတိၤလီၤတၢ်ဝံၤ တၢ်ပျၢ်ကွံၥ် တၢ်မၤလၤကပီၤမူး အတၢ်ရဲၣ်တၢ်ကျဲၤလၢ ကညီဒီကလုၥ် တၢ်သးဝံၣ်န့ၣ်လီၤ.
တၢ်ဟူးတၢ်ဂဲၤလၢအဘၣ်ထွဲတဖၣ်
