ကီၢ်ရ့ၣ်တဖၣ်
တၢ်ရဲၣ်ကျဲၤမၤဝဲ ကညီလုၢ်လၢ်ထူသနူ လါခူးကံၢ်စုအမူး (၃၆) ဝီတဝီ ဖဲကြုၢ်တုကီၢ်ဆၣ် ဖါကၠၣ်သဝီ
လါအီကူး (၂၅) သီ ၂၀၂၃ နံၣ်, ခ့ၣ်အဲၣ်ယူၣ်-လီၢ်ခၢၣ်သး
ဖဲ ၂၀၂၃ နံၣ် (ကညီနံၣ်
၂၇၆၂ နံၣ်) လါအီကူး ၂၄ သီအနံၤန့ၣ် ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ
ဒူပျၥ်ယၥ်ကီၢ်ရ့ၣ် ကြုၢ်တုကီၢ်ဆၣ်, ဖါကၠၣ်သဝီန့ၣ်
တၢ်ရဲၣ်ကျဲၤမၤဝဲ ကညီလုၢ်လၢ်ထူသနူ တၢ်ကံၢ်စုကွဲကလၤအမူး ပှဲၤထီၣ်ဝဲ (၃၆) ဝီတဝီ
မူးအတၢ်ရဲၣ်တၢ်ကျဲၤ န့ၣ်လီၤ.
တၢ်ကံၢ်စုကွဲကလၤ မူးအတၢ်ရဲၣ်တၢ်ကျဲၤအံၤ မ့ၢ်ဝဲကညီကလုၥ်အလုၢ်လၢ်ထူသနူတခါ လၢတၢ်ရဲၣ်ကျဲၤမၤအီၤ ကိးမုၢ်နံၣ်ဒဲး, လၢတၢ်လီၢ်အါတီၤ ဖဲပယီၤလါ (ဝါခေါင်) လါအဆၢကတီၢ်န့ၣ်လီၤ. လၢတၢ်မၤလၤကပီၤ မူးတၢ်ရဲၣ်တၢ်ကျဲၤတဘျီအံၤ ကီၢ်ဆၣ်ပှၤဘၣ်မူဘၣ်ဒါတဖၣ်, သုးခိၣ်သုးနၢ်ဘၣ်မူဘၣ်ဒါတဖၣ်, ဒူသဝီကမျၢၢ်တဖၣ် ဒီးကၠိဖိမုၣ်ခွါတဖၣ် ဟဲထီၣ်မၤလၤကပီၤ ပၣ်ဃုၥ်ပၣ်ဂီၢ်ဝဲဒၣ်န့ၣ်လီၤ. တၢ်ရဲၣ်တၢ်ကျဲၤအံၤ ပှၤဟဲထီၣ်ပၣ်ဃုၥ်ပၣ်ဂီၢ် အိၣ်ဝဲ (၄၀၀) ဘျဲၣ်န့ၣ်လီၤ.
လၢတၢ်မၤကလၤကပီၤ မူးတၢ်ရဲၣ်တၢ်ကျဲၤတဘျီအံၤ ခ့ၣ်အဲၣ်ယူ-ကညီဒီကလုၥ်စၢဖှိၣ်ကရၢ, ဒူပျၥ်ယၥ်ကီၢ်ရ့ၣ် ကီၢ်ရ့ၣ်ပၢၤကီၢ်ခိၣ် သုးခိၣ်ဒိၣ်ဂီၢ်ဂ့ၢ် စီၤန့ၢ်ထူ ကတိၤဒုးသ့ၣ်ညါဝဲ တၢ်မၤလၤကပီၤ ကညီလုၢ်လၢ်ထူသနူ တၢ်ကံၢ်စုကွဲကလၤအမူး အတၢ်ပညိၣ်, ကညီဒီကလုၥ်တၢ်ထူၣ်ဖျဲးသုးမုၢ်ဒိၣ် သုးက့နီၣ်ဂံၢ် (၆), ဂၢၤသးသုးရ့ၣ် (၆) သုးရ့ၣ်ခိၣ် သုးခိၣ်ဒိၣ်ဂီၢ်ဂ့ၢ် မါညိၣ်မီၣ် ကတိၤဒုးသ့ၣ်ညါဝဲ တကီၢ်ခါ ထံရူၢ်ကီၢ်သဲးတၢ်အိၣ်သး ဒီး ဒူပျၥ်ယၥ်ကီၢ်ရ့ၣ် ကီၢ်ရ့ၣ်စံၣ်ညီၣ်ကွီၢ်ခိၣ် ပဒိၣ်နါခ့ၣ်လၣ် ကတိၤဒုးသ့ၣ်ညါဝဲ ထံဖိကီၢ်ဖိတဖၣ်လၢ မ်ပကပၢၤဃၥ်သကိး ကညီလုၢ်လၢ်ထူသနူ ဒီးဟ့ၣ်ခီဟ့ၣ်နီၤဆူ ပဖိပလံၤလၢခံတစိၤ, တကးဒံးဘၣ် ကတိၤဒုးသ့ၣ်ညါစ့ၢ်ကီးဝဲ တၢ်ကံၢ်စုကွဲကလၤ အတၢ်ပညိၣ် ဒီးအခီပညီ တဖၣ်န့ၣ်လီၤ.
တၢ်ဟူးတၢ်ဂဲၤလၢအဘၣ်ထွဲတဖၣ်
