ဆီထံးကီၢ်ဆၣ် ခိၣ်နၢ်တဖၣ် လဲၤထံၣ်လိၥ်အိၣ်သကိး ဒီး ကတိၤဟ့ၣ်ဂံၢ်ဟ့ၣ်ဘါဝဲ ပှၤဘၣ်ဒိဘၣ်ထံးတဖၣ်ဝံၤ ဟ့ၣ်နီၤလီၤဝဲ ဂံၢ်ခီၣ်ထံးတၢ်အီၣ်မိၢ်ပှၢ်တဖၣ်

လါစဲးပထ့ဘၢၣ် ၃ သီ ၂၀၂၃ နံၣ်, ခ့ၣ်အဲၣ်ယူၣ်-လီၢ်ခၢၣ်သး

ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ကီၢ်သူလ့ၤတၢ်ပၢ ဟီၣ်ကဝီၤပူၤ ချၢၣ်လွံၢ်ထူၣ်ကီၢ်ရ့ၣ်, ဆီထံးကီၢ်ဆၣ်ပူၤ ခီဖျိသုးမီၤစိရိၤအသုးတဖၣ် ခးကျိဖးဒိၣ်အဃိ ပၠ့ၤယ့ၤ သဝီမုၢ်နုၥ် ဟံၣ်ဖိဃီဖိ (၅) ဒူၣ် ဒီး ခၠိၤအ့သဝီ ဟံၣ်ဖိဃီဖိ (၁) ဒူၣ် ဘၣ်ဒိဘၣ်ထံး ဒီးဟံၣ်ဖိဃီဖိအကျါတနီၤ ဘၣ်သံဘၣ်ပှၢ် ဒီးတၢ်စုလီၢ်ခီၣ်ခိၣ်တဖၣ် ဟးဂုၥ်ဟးဂီၤဝဲဒၣ်န့ၣ်လီၤ. လၢတၢ်န့ၣ်အဃိ ဖဲ ၂၀၂၃ နံၣ် လါအီကူး ၁ သီအနံၤန့ၣ် ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, ချၢၣ်လွံၢ်ထူၣ်ကီၢ်ရ့ၣ်, ဆီထံးကီၢ်ဆၣ် ကီၢ်ဆၣ်ပှၤဘၣ်မူဘၣ်ဒါတဖၣ် လဲၤထံၣ်လိၥ်ဝဲ ထံဖိကီၢ်ဖိ လၢအဘၣ်ဒိဘၣ်ထံးတဖၣ် ဒီး ကတိၤဟ့ၣ်ဂံၢ်ဟ့ၣ်ဘါဝဲ၀ံၤ ဟ့ၣ်နီၤလီၤဝဲ တၢ်ဆီၣ်ထွဲမၤစၢၤ လၢအလိၣ်တဖၣ်န့ၣ်လီၤ.

တၢ်လဲၤထံၣ်လိၥ် ကမျၢၢ်ဘၣ်ဒိဘၣ်ထံးတဘျီအံၤ ဘၣ်တၢ်တီခိၣ်ရိၣ်မဲအီၤလၢ ဆီထံးကီၢ်ဆၣ် ပှၤဘၣ်မူဘၣ်ဒါတဖၣ်, လဲၤဃုၥ်စ့ၢ်ကီးဒီး ဆီထံးကီၢ်ဆၣ် ကညီဂ့ၢ်ဂီၢ်အူ တၢ်ဆီၣ်ထွဲမၤစၢၤကရူၢ် ပှၤဘၣ်မူဘၣ်ဒါ တဖၣ်န့ၣ်လီၤ. တၢ်ထံၣ်လိၥ်ဒီးကမျၢၢ် အဆၢကတီၢ် တၢ်ကတိၤဟ့ၣ်ဂံၢ်ဟ့ၣ်ဘါ အဝဲသ့ၣ်ဝံၤ တၢ်နီၤလီၤဂံၢ်ခီၣ်ထံးတၢ်အီၣ်မိၢ်ပှၢ် ဒ်အမ့ၢ် ဘုသး, သိ, အံသၣ် ဒီး ကျိၣ်စ့တနီၤ ဒ်သိးကကဲထီၣ် တၢ်ဆီၣ်ထွဲမၤစၢၤလၢ ကမျၢၢ်သ့ၣ်တဖၣ် အဂီၢ်န့ၣ်လီၤ.