တၢ်ထုးထီၣ်ရၤလီၤ ပယီၤသုးမုၢ်ဒိၣ် တၢ်မၤဘၣ်ဒိတၢ်မၤပယွဲ ပှၤဂ့ၢ်ဝီခွဲးယၥ် အလံၥ်ပၥ်ဖျါ အတၢ်ရဲၣ်တၢ်ကျဲၤ

လါမးရှး ၂၇ သီ, ၂၀၂၃ နံၣ်. ခ့ၣ်အဲၣ်ယူၣ်-လီၢ်ခၢၣ်သး
ဖဲလါမးရှး ၂၇ သီ ၂၀၂၃ နံၣ်အနံၤ ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ လီၢ်ခၢၣ်သး တီခိၣ်ရိၣ်မဲ ဒီး မၤဝဲတၢ်ရဲၣ်တၢ်ကျဲၤ လၢအမ့ၢ် ပယီၤသုးမုၢ်ဒိၣ် ဟံးန့ၢ်ဆူၣ် ထံကီၢ်တၢ်စိတၢ်ကမီၤ ဝံၤအလီၢ်ခံ စးထီၣ် ၂၀၂၁ နံၣ် လါဖ့ၤဘြူၤအါရံၤ ၁ သီ, တုၤ ၂၀၂၂ နံၣ် လါဒံၣ်စ့ဘၢၣ် ၃၁ သီ လၢ (၂၃) လါ အကတီၢ်ပူၤ ပယီၤသုးမုၢ်ဒိၣ် အတၢ်မၤထီဒါ ပှၤဟီၣ်ခိၣ်ဖိခွဲးယၥ် တၢ်မၤနီၣ်မၤဃါ အလံၥ်ပၥ်ဖျါတဘ့ၣ် လၢအခိၣ်တီမ့ၢ်ဝဲ "ပယီၤသုးမုၢ်ဒိၣ် တၢ်မၤဘၣ်ဒိ တၢ်မၤပယွဲ ပှၤဂ့ၢ်ဝီခွဲးယၥ် အလံၥ်ပၥ်ဖျါ" တၢ်ဒုးသ့ၣ်ညါ အတၢ်ရဲၣ်တၢ်ကျဲၤန့ၣ်လီၤ. တၢ်ရဲၣ်တၢ်ကျဲၤအံၤ ဘၣ်တၢ်မၤအီၤဖဲ ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ လီၢ်ခၢၣ်သး ဒီး ဝဲၤကျိၤခိၣ်နၢ်တဖၣ်, ကညီဒီကလုၥ် တၢ်ထူၣ်ဖျဲးသုးမုၢ်ဒိၣ် သုးခိၣ်သုးနၢ်တဖၣ်, ဂံၢ်ခီၣ်ထံး တၢ်ကရၢကရိခိၣ်နၢ်တဖၣ် ဒီးတၢ်ကစီၣ်သန့ ခၢၣ်စးတဖၣ် ခဲလၢၥ်ပှၤအဂၤ ၆၀ ဘျဲၣ် ဟဲထီၣ်ဝဲ တၢ်ဒုးသ့ၣ်ညါလီၤလံၥ်ပၥ်ဖျါ အတၢ်ရဲၣ်တၢ်ကျဲၤအံၤန့ၣ်လီၤ.
ဒ်တၢ်ရဲၣ်လီၤကျဲၤလီၤအိၣ်ပၥ်အသိး တၢ်ကတိၤတူၢ်လိၥ်မုၥ် ခိၣ်နၢ်လၢဟဲထီၣ်တဖၣ် ဃုၥ်ဒီး တၢ်ပၥ်ဖျါထီၣ် တၢ်ရဲၣ်တၢ်ကျဲၤတဘျီအံၤ အတၢ်ပညိၣ်န့ၣ် နဲၣ်ရွဲၣ်ခိၣ်ကျၢၢ်သဃဲၤ (၁) ပဒိၣ်စီၤဆၢပှဲၤ ကတိၤရှဲပၠးဝဲဒၣ်န့ၣ်လီၤ. လံၥ်ပၥ်ဖျါတဘ့ၣ်အံၤ တၢ်ဘၣ်ထုးထီၣ်အီၤအဂ့ၢ်အကျိၤ ဒီး လံၥ်ပၥ်ဖျါအံၤ အတၢ်ပညိၣ် မ့ၢ်မနုၤလဲၣ်န့ၣ် ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ပှၤဟီၣ်ခိၣ်ဖိခွဲးယၥ်ကမံးတံၥ် နဲၣ်ရွဲၣ် ပဒိၣ်နီၢ်ဖီဂ့ၤခုၣ် ကတိၤရှဲပၠးဝဲဒၣ်န့ၣ်လီၤ.

ဒ်သိးလံၥ်ပၥ်ဖျါ (Report) တဘ့ၣ်အံၤ ကကဲထီၣ်အဂီၢ် တၢ်ရဲၣ်ကျဲၤဖံးမၤအီၤ အပတီၢ် တပတီၢ်ဘၣ်တပတီၢ်အဂ့ၢ်န့ၣ် တၢ်ကရၢကရိဒီးတၢ်ဘိးဘၣ်ရၤလီၤဝဲၤကျိၤ တၢ်တီခိၣ်ရိၣ်မဲဖီလၥ် တၢ်ဃိထံဃုသ့ၣ်ညါဝဲၤဒ့ ဝဲၤဒ့ခိၣ်ပတြီၥ် သရၣ်မုၣ်နီၢ်ဆါသမူ ပၥ်ဖျါဒုးသ့ၣ်ညါဝဲဒၣ်န့ၣ်လီၤ. ၀ံၤအလီၢ်ခံ စၢၤသွဲၣ်သီကၠိဖိတဖၣ် ဟ့ၣ်တၢ်ဝဲ အတၢ်သးဝံၣ် လၢအခိၣ်တီမ့ၢ်ဝဲ (We Need Peace-ပလိၣ်ဘၣ်တၢ်မုၥ်တၢ်ခုၣ်) န့ၣ်လီၤ.
လံၥ်ပၥ်ဖျါအပူၤ တၢ်ဂ့ၢ်တၢ်ကျိၤလၢအပၣ်ဃုၥ်တဖၣ် အဂ့ၢ်န့ၣ် သရၣ်စီၤသီၣ်မိအဲၣ် ကတိၤရှဲပၠးဝဲဒၣ်န့ၣ်လီၤ. လံၥ်ပၥ်ဖျါ တဘ့ၣ်အံၤအပူၤ တၢ်ဃ့ထီၣ်တဖၣ် ဘၣ်တၢ်တဲဖျါဒုးသ့ၣ်ညါအီၤလၢ တၢ်ကရၢကရိဒီးတၢ်ဘိးဘၣ်ရၤလီၤဝဲၤကျိၤ ဝဲၤကျိၤခိၣ်-၂ ပဒိၣ်စီၤကျၢၤစ့ လၢအမ့ၢ်စ့ၢ်ကီး လီၢ်ခၢၣ်သးထီဘိကမံးတံၥ် တဂၤန့ၣ်လီၤ.
ဝံၤအလီၢ်ခံ တၢ်ဒုးနဲၣ်ဝဲတဂီၤမူ လၢအဘၣ်ထွဲဒီး လံၥ်ပၥ်ဖျါတဘ့ၣ်အံၤအပူၤ တၢ်ဂ့ၢ်တၢ်ကျိၤတဖၣ်န့ၣ်လီၤ. တၢ်ရဲၣ်တၢ်ကျဲၤတပတီၢ်အံၤ ဘၣ်တၢ်တီခိၣ်ရိၣ်မဲအီၤလၢ တၢ်ကစီၣ်ဒီးတၢ်ဘိးဘၣ်ရၤလီၤဝဲၤဒ့န့ၣ်လီၤ. ဒီးပိၥ်ထွဲထီၣ်အခံလၢ တၢ်သံကွၢ်စံးဆၢ လၢခိၣ်နၢ်လၢဟဲထီၣ်တဖၣ်န့ၣ်လီၤ.
တၢ်သံကွၢ်စံးဆၢ ဝံၤအလီၢ်ခံ ပိၥ်ထွဲထီၣ်အခံလၢ တၢ်ဒုးနဲၣ်ဝဲ တၢ်ဂီၤသံ လၢအဘၣ်ထွဲဒီး လံၥ်ပၥ်ဖျါအပူၤ တၢ်ဂ့ၢ်တၢ်ကျိၤတဖၣ်န့ၣ်လီၤ. ဒီးတၢ်ရဲၣ်တၢ်ကျဲၤတပတီၢ်အံၤစ့ၢ်ကီး ဘၣ်တၢ်တီခိၣ်ရိၣ်မဲအီၤလၢ တၢ်ကစီၣ်ဒီးတၢ်ဘိးဘၣ်ရၤလီၤဝဲၤဒ့န့ၣ်လီၤ.

တၢ်ဒုးနဲၣ်တၢ်ဂီၤသံ ဝံၤအလီၢ်ခံ လၢပှၤတူၢ်ဘၣ်တၢ် ဒီး ပှၤဃ့ၢ်မှံၤဟးဖျိးသ့ၣ်တဖၣ်အဂီၢ် တၢ်အိၣ်ဘှၣ့်ဝဲ (၁ မံးနံး) ဒီး ဃ့ဘါထုကဖၣ်တၢ်လၢအဂီၢ် လၢတဂၤလၢ ခၢၣ်စးတဖၣ် အတၢ်စူၥ်တၢ်နၥ် ဒၣ်ဝဲနၣ့်လီၤ. ၀ံၤအလီၢ်ခံ တၢ်သးဝံၣ်ဝဲ (ပမူဒါ-ဒို့တၥ၀န်) အတၢ်သးဝံၣ်ဝံၤ ပဒိၣ်စီၤလးထိ လၢအမ့ၢ် နဲၣ်ရွဲၣ်ခိၣ်ကျၢၢ်သဃဲၤ (၂) ကတိၤစံးဘျူးဝဲ ခၢၣ်စးလၢဟဲထီၣ်တဖၣ်ဝံၤ တၢ်ပျၢ်ကွံၥ်ဝဲ တၢ်ရဲၣ်တၢ်ကျဲၤတဘျီအံၤန့ၣ်လီၤ.
ဘၣ်ထွဲဒီးလံၥ်ပၥ်ဖျါတဘ့ၣ်အံၤ တၢ်မ့ၢ်အဲၣ်ဒိးသ့ၣ်ညါအါထီၣ်န့ၣ် ဆဲးကျိးသံကွၢ်သ့ဖဲ တၢ်ဆဲးကျိးလၢလၥ်တဖၣ်အံၤန့ၣ်လီၤ.
ပဒိၣ်စီၤကျၢၤစ့ - +၆၆၆၁၄၃၇၀၄၅၇
သရၣ်မုၣ်နီၢ်ဖီဂ့ၤခုၣ် - +၆၆၈၇၂၁၁၃၀၃၅
Benedict - +၆၆ ၉၆၂၈၇၅၇၆၉, +၆၆ ၆၅၂၇၂၈၆၅၁