လါစဲးပထ့ဘၢၣ် ၂ သီ, ၂၀၂၂ နံၣ်, ခ့ၣ်အဲၣ်ယူၣ်-လီၢ်ခၢၣ်သး

ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဖၣ်အၣ်ကီၢ်ရ့ၣ် တၢ်ပၢဟီၣ်ကဝီၤ မီပၢၤခိၣ်သဝီပူၤ တၢ်မၤဝဲ တၢ်ဃုထၢထီၣ် ဒူသဝီခိၣ်နၢ်အမူး ၂ ၀ီတဝီ ဖဲလါစဲးပထ့ဘၢၣ် ၂ သီ ၂၀၂၂ နံၣ် အနံၤန့ၣ်လီၤ. တၢ်ဃုထၢ ဒူသဝီခိၣ်နၢ်အမူးအံၤ တၢ်မၤအီၤဖဲ ဖၣ်အၣ်ကီၢ်ရ့ၣ် သုးက့ (၇) တီၤထီကၠိ ဘျီၣ်ဒိၣ်အပူၤန့ၣ်လီၤ. တၢ်ဃုထၢဒူသဝီခိၣ်နၢ်အမူးအံၤ တၢ်မၤအီၤဒ် ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ တၢ်ဃုထၢထီၣ် ဒူသဝီခိၣ်နၢ် တၢ်မၤကျဲအိၣ်အသိး တဆီဘၣ်တဆီန့ၣ်လီၤ.

ဒ်မူးတၢ်ရဲၣ်လီၤကျဲၤလီၤအသိး ဒူသဝီခိၣ်နၢ် ဒီး ဟီၣ်ကဝီၤခိၣ်နၢ် လၢဟဲထီၣ်တဖၣ် စးထီၣ်ဝဲမူးအံၤ ခီဖျိ တၢ်ဟ့ၣ်ထီၣ်တၢ်ယူးယီၣ်ဆူ ကညီဒီကလုၥ် အနီၣ်တယၢ်ဝံၤ ပဒိၣ်စီၤလ့တီ ကတိၤပၥ်ဖျါဝဲ တၢ်ဃုထၢထီၣ်က့ၤ ဒူသဝီခိၣ်နၢ် တၢ်ရဲၣ်တၢ်ကျဲၤတဘျီအံၤ အတၢ်ပညိၣ်ကွၢ်စိ န့ၣ်လီၤ.

ဝံၤအလီၢ်ခံ ဖၣ်အၣ်ကီၢ်ရ့ၣ် ကီၢ်ရ့ၣ်စံၣ်ညီၣ်ကွီၢ်ခိၣ် ပဒိၣ်မါပါသံၣ် ကတိၤရှဲပၠးဝဲ ခ့ၣ်အဲၣ်ယူၣ် တၢ်သူၣ်ထီၣ်သဲစးတၢ်ဘျၢခိၣ်သ့ၣ် လၢအဘၣ်ထွဲဒီး တၢ်ဃုထၢထီၣ် ဒူသဝီခိၣ်နၢ် အဂ့ၢ်အကျိၤဝံၤ ဖၣ်အၣ်ကီၢ်ရ့ၣ် တၢ်ကရၢကရိဒီးတၢ်ဘိးဘၣ်ရၤလီၤဝဲၤကျိၤ ဝဲၤကျိၤခိၣ် ပဒိၣ်နီၢ်ရှံဝါ ကတိၤဟ့ၣ်ဂံၢ်ဟ့ၣ်ဘါဝဲ ဒူသဝီကမျၢၢ် ဒီး ဒူသဝီခိၣ်နၢ်တဖၣ်ဝံၤ မီပၢၤခိၣ်သဝီ သဝီသးပှၢ် ပၥ်ဖျါထီၣ်ဝဲ တၢ်ဖံးတၢ်မၤလၢ တၢ်မၤတ့ၢ်အီၤလၢ ၂ နံၣ်အတီၢ်ပူၤ တဖၣ်န့ၣ်လီၤ.


ဝံၤအလီၢ်ခံ ဒူသဝီခိၣ်နၢ်ခၢၣ်စး လၢဟဲထီၣ်တဖၣ်အကျါ တၢ်ကတိၤဆှၢနုၥ်ဝဲ ဒူသဝီထီဘိကမံးတံၥ်ပတြီၥ် ၂၀ ဂၤဝံၤ တၢ်ဃုထၢထီၣ်က့ၤဝဲ ဒူသဝီထီဘိကမံးတံၥ် ၁၅ ဂၤ လၢတၢ်ဖးခူသူၣ်အကျဲ န့ၣ်လီၤ. ဖဲ ဒူသဝီထီဘိကမံးတံၥ် ၁၅ ဂၤအကျါအံၤန့ၣ် တၢ်ဃုထၢထီၣ်က့ၤဝဲ ပှၤပၢၤလီၢ်ဆ့ၣ်နီၤတဂၤ, နဲၣ်ရွဲၣ်တဂၤ, စံၣ်ညီၣ်ကွီၢ်တဂၤ လၢတၢ်ဖးခူသူၣ်အကျဲ ဒီး မ့မ့ၢ် ဒူသဝီခိၣ်နၢ် ဒ်အမ့ၢ် ဘံၣ်ဘၢခိၣ်, ပှၤပၢၤစ့, ပှၤဂ့ၢ်ဝီမူဒါခိၣ်, တၢ်ကရၢကရိမူဒါခိၣ်, ကူၣ်သ့ခိၣ်, ဝံစိၥ်တီဆှၢခိၣ် ဒီး တၢ်ရဲၣ်သဲကတီၤခိၣ်ဃၢၤန့ဆၢၣ်မူဒါခိၣ် တဖၣ် တၢ်ဃုထၢထီၣ်အီၤလၢ ပှၤအါဂၤအမဲၥ်ညါ ဒ်အဘၣ်သူၣ်ဘၣ်သးဝဲအသိးန့ၣ်လီၤ.

တၢ်ဃုထၢထီၣ်ခိၣ်နၢ်သ့ၣ်တဖၣ်ဝံၤအလီၢ်ခံခိၣ်နၢ်လၢတၢ်ဃုထၢထီၣ်အီၤတဖၣ်အၢၣ်လီၤအီလီၤအသးလၢသဝီဖိဒီးခိၣ်နၢ်တဖၣ်အမဲၥ်ညါဝံၤဒူသဝီတၢ်ဃုထၢကမံးတံၥ်ဟ့ၣ်လီၤက့ၤမူဒါလၢခိၣ်နၢ်ထီၣ်သီတဖၣ်အံၤအစုပူၤန့ၣ်လီၤ၃တၢ်ဃုထၢဒူသဝီခိၣ်နၢ်မူးတဘျီအံၤဝံၤတၢ်ပျၢ်က့ၤဝဲမူးအတၢ်ရဲၣ်တၢ်ကျဲၤလၢကညီဒီကလုၥ်အတၢ်သးစံၣ်န့ၣ်လီၤ၃

လၢတၢ်ဃုထၢထီၣ် ဒူသဝီခိၣ်နၢ်အမူးတဘျီအံၤ ခိၣ်နၢ်လၢအဟဲထီၣ်တဖၣ် မ့ၢ်ဝဲ ဖၣ်အၣ်ကီၢ်ရ့ၣ် ပၢၤကီၢ်ခိၣ်, သုးက့ (၇) သုးရ့ၣ် (၂၁) သုးရ့ၣ်ခိၣ်ဖၣ်, အၣ်ကီၢ်ရ့ၣ် ကညီပိၥ်မုၣ်ကရၢ ကရၢခိၣ် ဃုၥ်ဒီး ဒူသဝီခိၣ်နၢ်ကမျၢၢ် (၁၁၅) ဂၤဟဲထီၣ်ဝဲန့ၣ်လီၤ. ဒ်ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ တၢ်သူၣ်ထီၣ်တၢ်ဘျၢသဲစးအိၣ်အသိး ဒူသဝီခိၣ်နၢ်တဖၣ် ပၢတၢ်အသးနံၣ်ယူၥ်ကၢ အိၣ်ဝဲ (၂) နံၣ်န့ၣ်လီၤ.