ကညီဒီကလုၥ် တၢ်ထူၣ်ဖျဲးသုးမုၢ်ဒိၣ် ရဲၣ်ကျဲၤမၤဝဲ ၃၄ ၀ီတဝီ ဂံၢ်ခီၣ်ထံး ကသံၣ်တၢ်မၤလိပျၢ်အမူး

၂၀၂၂ နံၣ် လါယနူၤအါရံၤ ၁၀ သီ, ခ့ၣ်အဲၣ်ယူၣ်-လီၢ်ခၢၣ်သး
ကညီဒီကလုၥ် တၢ်ထူၣ်ဖျဲးသုးမုၢ်ဒိၣ် ရဲၣ်ကျဲၤမၤဝဲ ၃၄ ၀ီတဝီ ဂံၢ်ခီၣ်ထံးကသံၣ်တၢ်မၤလိပျၢ်အမူး တကတီၢ် ဖဲ ၂၀၂၂ နံၣ် လါယနူၤအါရံၤ ၁၀ သီ ဖဲခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ လီၢ်ခၢၣ်သးဝဲၤလီၢ်ခိၣ်သ့ၣ် န့ၣ်လီၤ.

ဂံၢ်ခီၣ်ထံးကသံၣ်တၢ်မၤလိပျၢ်အမူးတဘျီအံၤ ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ လီၢ်ခၢၣ်သး နဲၣ်ရွဲၣ်ခိၣ်ကျၢၢ်သဃဲၤ (၂) ပဒိၣ်စီၤလးထိ, လီၢ်ခၢၣ်သး ပၢဆှၢတၢ်ကမံးတံၥ် ပဒိၣ်နီၢ်ဒါဒါ, လီၢ်ခၢၣ်သး စံၣ်ညီၣ်ကွီၢ်ခိၣ်ကျၢၢ် ပဒိၣ်နီၢ်မၠဲၣ်ဖိ, လီၢ်ခၢၣ်သးဆူၣ်ချ့မၤစၢၤဝဲၤကျိၤခိၣ် ပဒိၣ်ဒဲမၢၣ်ခ့ၣ်, ဖၣ်အၣ်ကီၢ်ရ့ၣ်ခိၣ် ပဒိၣ်အီၣ်မီၣ်အ့, ကညီဒီကလုၥ် တၢ်ထူၣ်ဖျဲးသုးမုၢ်ဒိၣ် သုးဝဲၤလီၢ်ခိၣ်သ့ၣ် သုးဂ့ၢ်ဝီခိၣ် သုးခိၣ်ကျၢၢ်ဖိ မါရှးထုးဂီၤ, တၢ်သိၣ်လိမူဒါခိၣ် သုးခိၣ်ဒိၣ်စိ မါကၠၤယိၤ, သုးကသံၣ်ဝဲၤဒ့ခိၣ် သုးခိၣ်ဒိၣ်စိ နီၢ်စ့ဒ့ကဲ, ဃုၥ်ဒီးသိၣ်မှံၤကရၢခိၣ်နၢ်တဖၣ် ဒီး ဂံၢ်ခီၣ်ထံးကသံၣ်တၢ်မၤလိဖိတဖၣ် ဟဲထီၣ်ဝဲဒၣ်န့ၣ်လီၤ.
နဲၣ်ရွဲၣ်ခိၣ်ကျၢၢ်သဃဲၤ ၂ ပဒိၣ်စီၤလးထိ, ဖၣ်အၣ်ကီၢ်ရ့ၣ်ခိၣ် ပဒိၣ်စီၤအီၣ်မီၣ်အ့, သုးဂ့ၢ်ဝီခိၣ် သုးခိၣ်ကျၢၢ်ဖိ မါရှးထုးဂီၤ, သုးခိၣ်ဒိၣ်စိ နီၢ်စ့ဒ့ကဲ သ့ၣ်တဖၣ် ကတိၤဟ့ၣ်ဂံၢ်ဟ့ၣ်ဘါတၢ်ဝံၤ တၢ်မၤလိဖိတဖၣ် လဲၤဟံးန့ၢ်က့ၤ ဖျိကၠိလံၥ်အုၣ်သးဒီးခိၣ်ဖးသ့ၣ် တဖၣ်န့ၣ်လီၤ. ကညီဒီကလုၥ် တၢ်ထူၣ်ဖျဲးသုးမုၢ်ဒိၣ်အံၤ ရဲၣ်ကျဲၤမၤဝဲ ဂံၢ်ခီၣ်ထံးကသံၣ်တၢ်မၤလိ ကိးနံၣ်ဒဲးန့ၣ်လီၤ.