တၢ်လီၤဟ့ၣ် တၢ်သ့ၣ်ညါနၢ်ပၢၢ် ဘၣ်ထွဲ တၢ်ဒီသဒၢ (Covid-19) တၢ်ဆါအၢ ကျိၤကျဲ

၂၅-၆-၂၀၂၀, သူလ့ၤတၢ်ကစီၣ်
ဖဲ ၂၀၂၀ နံၣ် လါယူၤ ၂၄ သီအနံၤ ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ကီၢ်ရ့ၣ်ချၢၣ်လွံၢ်ထူၣ် မူကီၢ်ဆၣ် လီၢ်ကဝီၤပှၤဂ့ၢ်ဝီကရၢတဖၣ် ပၥ်ဖှိၣ်ထီၣ်သကိးအသးဒီး မူကီၢ်ဆၣ်ခိၣ်နၢ် ပှၤဘၣ်မူဘၣ်ဒါသ့ၣ်တဖၣ် ဃုၥ်ဒီး (CIDKP) ကညီပှၤလီၢ်အိၣ်ကမှံကမံးတံၥ် ပှၤဘၣ်မူဘၣ်ဒါတဖၣ် လီၤဟ့ၣ်ဝဲဒၣ် တၢ်သ့ၣ်ညါနၢ်ပၢၢ် ဘၣ်ထွဲတၢ်ဒီသဒၢ (Covid-19) တၢ်ဆါအၢ အကျိၤအကျဲတဖၣ် ဖဲမူကီၢ်ဆၣ် ဟီၣ်ကဝီၤန့ၣ်လီၤ.

တၢ်ရဲၣ်တၢ်ကျဲၤအံၤ ဘၣ်တၢ်နီၤဖးလီၤအီၤ တၢ်လီၢ် (၁၂) တီၤ လၢသဝီ (၂၄) ဖျၢၣ် ဒီး ဒူသဝီခၢၣ်စးခဲလၢၥ် ဟဲထီၣ်ဝဲ ၁၉၂ ဂၤန့ၣ်လီၤ. တၢ်ရဲၣ်တၢ်ကျဲၤအံၤ ဒ်သိးအသုတမၤထီဒါဘၣ် တၢ်ပၥ်လီၤတၢ်ဒီသဒၢ (Covid-19) တၢ်ဆါအၢ အတၢ်သိၣ်တၢ်သီတဂ့ၤအဂီၢ် ခိၣ်နၢ်ဘၣ်မူဘၣ်ဒါတဖၣ် နီၤဖးလီၤဝဲ တၢ်လီၢ် (၁၂) တီၤ ဒီး လၢတၢ်လီၢ်တတီၤအပူၤ ခၢၣ်စးအိၣ်ဝဲ (၁၆) ဂၤစုၥ်စုၥ် န့ၣ်လီၤ.

တကတီၢ်ဃီ ထံရူၢ်ကီၢ်သဲးတၢ်အိၣ်သးအဖီခိၣ် ဒ်သိးဒူသဝီ ကမျၢၢ်ဖိတဖၣ် ကသ့ၣ်ညါနၢ်ပၢၢ် (NCA) လံၥ်ဃံးဃၥ် အဂ့ၢ်အကျိၤဒီး ကသ့ပၥ်ဖှိၣ်မၤသကိးတၢ်လၢ တၢ်ဒုးလိၥ်ထီၣ်ဖးထီၣ် (NCA) လံၥ်ဃံးဃၥ် တၢ်အၢၣ်လီၤသ့ၣ်တဖၣ်အဂီၢ် ခိၣ်နၢ်သ့ၣ်တဖၣ် တဲနၢ်ပၢၢ်ဒုးသ့ၣ်ညါအီၤလၢ (NCA) အဂ့ၢ်အကျိၤန့ၣ်လီၤ.

ကတီၢ်အံၤ ခီဖျိလၢ (Covid-19) တၢ်ဆါအၢ တပတုၥ်ကွံၥ်အသးလၢ ကီၢ်ပယီၤပူၤဒံးဘၣ်အဃိ ဒ်သိး (Covid-19) တၢ်ဆါအၢ သုတဟဲနုၥ်လီၤလၢ ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ကီၢ်ရ့ၣ်ချၢၣ်လွံၢ်ထူၣ် အဟီၣ်ကဝီၤပူၤတဂ့ၤ ဒီး ဒူသဝီကမျၢၢ်ဖိတဖၣ် သုတကွၢ်ဆၢၣ်မဲၥ်ဘၣ်ဒီး တၢ်အီၣ်တၢ်အီ တၢ်ဃံးတၢ်စ့ၤတဂ့ၤအဂီၢ် ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ကီၢ်ရ့ၣ်ချၢၣ်လွံၢ်ထူၣ် ခိၣ်နၢ်သ့ၣ်တဖၣ်, လီၢ်ကဝီၤ ပှၤဂ့ၢ်ဝီကရၢ ဃုၥ်ဒီး လီၢ်ကဝီၤပှၤဘၣ်မူဘၣ်ဒါတဖၣ် ဂုၥ်ကျဲးစၢးဝဲအဂ့ၤကတၢၢ် လၢတၢ်ဒီသဒၢမ့ၢ်ဂ့ၤ, တၢ်ဆီၣ်ထွဲမၤစၢၤမ့ၢ်ဂ့ၤ န့ၣ်လီၤ.