ချၢၣ်လွံၢ်ထူၣ်ကီၢ်ရ့ၣ်-ကညီပိၥ်မုၣ်ကရၢ ရဲၣ်ကျဲၤမၤ၀ဲ (ခီကရဲး)တၢ်အိၣ်ဖှိၣ်ဖးဒိၣ် (၁၀) ဘျီတဘျီ ၀ံၤ၀ဲဂ့ၤဂ့ၤ ဘၣ်ဘၣ်

လါမ့ၤ (၂) သီ, ၂၀၂၅ နံၣ်, ခ့ၣ်အဲၣ်ယူၣ်-လီၢ်ခၢၣ်သး

ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, ချၢၣ်လွံၢ်ထူၣ်ကီၢ်ရ့ၣ်အပူၤ ကီၢ်ရ့ၣ်ပတီၢ်-ကညီပိၥ်မုၣ်ကရၢ (K.W.O) ရဲၣ်ကျဲၤမၤ၀ဲ (ခီကရဲး)တၢ်အိၣ်ဖှိၣ်ဖးဒိၣ် ဖဲ ၂၀၂၅ နံၣ်, လါအ့ဖြ့ၣ် (၂၂) သီ အနံၤ၀ံၤ၀ဲဂ့ၤဂ့ၤဘၣ်ဘၣ်န့ၣ်လီၤ. လၢတၢ်ရဲၣ် တၢ်ကျဲၤတဘျီအံၤ လီၢ်ခၢၣ်သး-ကညီပိၥ်မုၣ်ကရၢ, ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ချၢၣ်လွံၢ်ထူၣ်ကီၢ်ရ့ၣ် ခိၣ်နၢ် ဒီး ကီၢ်ရ့ၣ်-ကညီသးစၢ်ကရၢ ခိၣ်နၢ်တဖၣ် လၢတၢ်ကွဲမုၥ်အဖီခိၣ် ဟဲထီၣ်ဟ့ၣ်ဂံၢ်ဟ့ၣ်ဘါဒီး ဟံးစုနဲၣ်ကျဲၤလၢ တၢ်အိၣ်ဖှိၣ် ဖးဒိၣ်ဘျီ၀ဲအံၤန့ၣ်လီၤ. လၢတၢ်ရဲၣ်တၢ်ကျဲၤအပူၤ တၢ်ပၥ်ဖျါထီၣ်၀ဲ ချၢၣ်လွံၢ်ထူၣ်ကီၢ်ရ့ၣ်, ကညီပိၥ်မုၣ်ကရၢ (၃) နံၣ်အတီၢ်ပူၤ တၢ်ပၥ်ဖျါဒီး တၢ်ပၥ်လီၤဃၣ် တၢ်ဖံးတၢ်မၤသ့ၣ်တဖၣ်အဖီခိၣ် တၢ်တၢၣ်ပီၣ်တၢၣ်ပီသကိးလၢအဂ့ၢ်၀ံၤ တၢ်ပၥ်ဂၢၢ်ပၥ်ကျၢၤန့ၣ်လီၤ. တၢ်ရဲၣ်တၢ်ကျဲၤတဘျီအံၤ ခိၣ်နၢ်ဒီး ခၢၣ်စးလၢတၢ်ကွဲမုၥ်အီၤသ့ၣ်တဖၣ် ခဲလၢၥ်ဟဲထီၣ်၀ဲ (၅၄) ဂၤန့ၣ်လီၤ.

တၢ်အိၣ်ဖှိၣ်ဖးဒိၣ်(ခီကရဲး) တၢ်ရဲၣ်တၢ်ကျဲၤ၀ံၤအလီၢ်ခံ ကညီပိၥ်မုၣ်ကရၢ ရဲၣ်ကျဲၤမၤ၀ဲတၢ်မၤလိ (၂) သီ လၢအဘၣ်ထွဲ တၢ်ဂ့ၢ်ခိၣ်တီ ကညီပိၥ်မုၣ်ကရၢ ဂံၢ်ခီၣ်ထံးသဲစးတၢ်ဘျၢခိၣ်သ့ၣ်, ကျဲသနူ, မုၣ်/ခွါတၢ်ထဲသိးတုၤသိးဒီး တၢ်ဘှါရှဲတၢ်မူး တၢ်ရၢ်တၢ်သ့တၢ်ဘၣ် တၢ်မၤလိန့ၣ်လီၤ.