ပယီၤသုးမီၤစိရိၤ ဟံးန့ၢ်ဆူၣ် ထံကီၢ်တၢ်စိတၢ်ကမီၤ အသုးသိလ့ၣ်တဖၣ် ဘၣ်တၢ်ထုးဟးဂီၤအဝဲသ့ၣ် အသိလ့ၣ်ဒီးမ့ၣ်ပိၢ်အဃိ အသိလ့ၣ်ဟးဂီၤဝဲ ၂ ခိၣ် ဒီး အသုးဖိတဂၤ ဘၣ်ဒိဝဲနးနးကလဲၥ် အဂ့ၢ်

၂၀၂၁ နံၣ်, လါစဲးပထ့ဘၢၣ် ၄ သီ, ခ့ၣ်အဲၣ်ယူၣ်-လီၢ်ခၢၣ်သး

မီၤစိရိၤအသုး စကခ-၈ အသုး လၢအအိၣ်ဝဲဖဲ ပနွဲၢ်ကျါ သုးကလၢၤတဖၣ် ဒိးထီၣ်ဝဲ သုးသိလ့ၣ် (သုးကါ) ၄ ခိၣ် ဒီး လဲၤထီၣ်ဝဲဆူ လ့က့ၣ်သဝီ လၢအမ့ၢ် ဒူသထူၣ်ကီၢ်ရ့ၣ် ၀့တပၢ်ကရူၢ် တၢ်ပၢဟီၣ်ကဝီၤပူၤန့ၣ်လီၤ. သုးသိလ့ၣ် ၄ ခိၣ်အံၤ ဖဲအလဲၤလၢကျဲ အဆၢကတီၢ် ကညီဒီကလုၥ် တၢ်ထူၣ်ဖျဲးသုးမုၢ်ဒိၣ် အသုးတဖၣ် ခိးထုးအဝဲသ့ၣ် ဒီး မ့ၣ်ပိၢ် ဖဲဘံလ့ကီၢ်ဆၣ်, တးပီကရူၢ်အဃိ မီၤစိရိၤအသုးကါ ဟးဂီၤဝဲ ၂ ခိၣ် ဒီး အသုးဖိတဂၤ ဘၣ်ဒိဝဲ နးနးကလဲၥ်န့ၣ်လီၤ.
ခ့ၣ်အဲၣ်ယူၣ် လီၢ်ကဝီၤခိၣ်နၢ် ဘၣ်မူဘၣ်ဒါတဂၤ စံးဝဲဒၣ်လၢ "ဖဲအဟါကၢၥ် ဟါခီ ၃ နၣ်ရံၣ် ၄၀ မံးနံး အဆၢကတီၢ်န့ၣ် မီၤစိရိၤအသုးတဖၣ် အိၣ်ဟးထီၣ်ဝဲလၢ ပနွဲၢ်ကျါ သုးကလၢၤ ဒီး ဒိးထီၣ်ဝဲကါ ၄ ခိၣ် အဂ့ၢ်န့ၣ် ပဒိးန့ၢ်ဘၣ် တၢ်ကစီၣ်န့ၣ်လီၤ. ဒီး ခီဖျိအဝဲသ့ၣ်တဖၣ် ဟဲနုၥ်လီၤလၢ ပတၢ်လီၢ်တၢ်ကျဲအဃလၢကမျၢၢ်တဖၣ် အတၢ်ဘံၣ်တၢ်ဘၢအဂီၢ် ပဝဲဒၣ်သ့ၣ်တဖၣ် ပကဘၣ်တြီဆၢ မီၤစိရိၤအသုးတဖၣ်အံၤ န့ၣ်လီၤ." တချုးကါ ၄ ခိၣ်အံၤ ဟဲထီၣ်ဒံးဘၣ်န့ၣ် ဖဲလါစဲးပထ့ဘၢၣ် ၃ သီဂီၤခီ ၈ နၣ်ရံၣ်တခီ အဆၢကတီၢ် သုးခိးကီၢ်ဆၢ လၢအအိၣ်ဖဲ ဝ့တပၣ် သုးကလၢၤတဖၣ် အသုးလၢအမ့ၢ် စကခ (၈) စုတီၤဖီလၥ် သုးရ့ၣ် (၄၀၆) သုးကျိၤခိၣ် ၂ ကၠီၤထိၣ်ည့ တီခိၣ်ရိၣ်မဲ ဂံၢ်ဘါ ၃၅ ဂၤ ဒီး သုးခိးကီၢ်ဆၢ -၁၀၁၄, သုးဒ့ (၃) သုးစကီၤ ကၠ့ၤလိ တီခိၣ်ရိၣ်မဲ ဂံၢ်ဘါ ၂၀ ဂၤတဖၣ် ဟဲဟံးန့ၢ်ဝဲ ကျဲတၢ်ဘံၣ်တၢ်ဘၢ အဂ့ၢ်န့ၣ် သ့ၣ်ညါဘၣ်န့ၣ်လီၤ.

ဒ်န့ၣ်အသိး ဖဲမဟါတနံၤဂီၤခီ ၆ နၣ်ရံၣ် အဆၢကတီၢ် စ့ၢ်ကီး သုးမီၤစိရိၤအသုး ဒီး ကညီတၢ်ထူၣ်ဖျဲးသုးမုၢ်ဒိၣ် သုးအဘၢၣ်စၢၤ တၢ်ဒုးကဲထီၣ်ဝဲတဘျီ ဖဲ ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, ဒူသထူၣ်ကီၢ်ရ့ၣ်, ဖၣ်အၣ်ကီၢ်ဆၣ် အဟီၣ်ကဝီၤန့ၣ်လီၤ. ဒီး ဖဲတၢ်ဒုးတဘျီအံၤ သုးမီၤစိရိၤအသုးတဖၣ် သံဝဲ ၃ ဂၤ ဒီး ဘၣ်ဒိဝဲ ၅ ဂၤန့ၣ်လီၤ.