၂၀၂၁ နံၣ် လါအီကၢး(စ်) တလါအကတီၢ်ပူၤ တၢ်ဒုးကစီၣ် ဒီး သုးမီၤစိရိၤ အသုးတၢ်ဟူးတၢ်ဂဲၤ လၢ ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ တၢ်ပၢဟီၣ်ကဝီၤပူၤ

လါစဲးပထ့ဘၢၣ် ၃ သီ, ၂၀၂၁ နံၣ်. ခ့ၣ်အဲၣ်ယူၣ်-လီၢ်ခၢၣ်သး
၂၀၂၁ နံၣ် လါအီကၢး(စ်) တလါအကတီၢ်ပူၤ ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ တၢ်ပၢဟီၣ်ကဝီၤပူၤ ဒ်အမ့ၢ် ဒူသထူၣ်ကီၢ်ရ့ၣ် သုးက့ (၁), တီအူကီၢ်ရ့ၣ် သုးက့ (၂), ချၢၣ်လွံၢ်ထူၣ်ကီၢ်ရ့ၣ် သုးက့ (၃), မုၢ်တြီၢ်ကီၢ်ရ့ၣ် သုးက့ (၅), ဒူပျၥ်ယၥ်ကီၢ်ရ့ၣ် သုးက့ (၆) ဟီၣ်ကဝီၤပူၤသ့ၣ်တဖၣ် ခီဖျိလၢ သုးမီၤစိရိၤအသုး သ့ၣ်တဖၣ် ဟူးဂဲၤဝဲ ဒုးယၤအတၢ်ရဲၣ်တၢ်ကျဲၤအဃိ ကညီဒီကလုၥ် တၢ်ထူၣ်ဖျဲးသုးမုၢ်ဒိၣ် (KNLA), ကညီဒီကလုၥ်ဂၢၤသးကရၢ (KNDO) ဒီး သုးမီၤစိရိၤအသုးသ့ၣ်တဖၣ် အဘၢၣ်စၢၤ တၢ်ဒုးကဲထီၣ်ဝဲဒၣ်န့ၣ်လီၤ. ဒူသထူၣ်ကီၢ်ရ့ၣ် သုးက့ (၁) ဟီၣ်ကဝီၤ တၢ်ဒုးကဲထီၣ်ဝဲ (၂၄) ဘျီ, တီအူကီၢ်ရ့ၣ် သုးက့ (၂) ဟီၣ်ကဝီၤ တၢ်ဒုးကဲထီၣ်ဝဲ (၆) ဘျီ, ချၢၣ်လွံၢ်ထူၣ်ကီၢ်ရ့ၣ် သုးက့ (၃) တၢ်ဒုးကဲထီၣ်ဝဲ (၂) ဘျီ, မုၢ်တြီၢ်ကီၢ်ရ့ၣ် သုးက့ (၅) တၢ်ဒုးအကလုၥ်ကလုၥ် ကဲထီၣ်ဝဲ (၁၈၁) ဘျီ, ဒူပျၥ်ယၥ်ကီၢ်ရ့ၣ် သုးက့ (၆) တၢ်ဒုးကဲထီၣ်ဝဲ (၄) ဘျီ န့ၣ်လီၤ. တလါအကတီၢ်ပူၤ တၢ်ဒုးကဲထီၣ်ဝဲ ခဲလၢၥ် (၂၁၇) ဘျီ ဒီး သုးမီၤစိရိၤအသုး သံဝဲခဲလၢၥ် (၁၆၆) ဂၤ ဒီး ဘၣ်ဒိဝဲ (၁၀၁) ဂၤန့ၣ်လီၤ.

သုးမီၤစိရိၤ အသုးသ့ၣ်တဖၣ် မၤသံကမျၢၢ် မၤပျံၤမၤဖုးကမျၢၢ် ဒီး ဟံးန့ၢ်ဆူၣ် မၢန့ၢ်ဆူၣ် ကမျၢၢ်လၢ လါအီကၢး(စ်) တလါအကတီၢ်ပူၤ.

ခ့ၣ်အဲၣ်ယူၣ် ကီၢ်ရ့ၣ်ဒူသထူၣ် သုးက့ (၁) ဟီၣ်ကဝီၤ
၁၁-၈-၂၀၂၁ နံၤ သုးမီၤစိရိၤအသုး (စကခ-၈-ခမရ-၄၀၆) သုးခိၣ်ဒိၣ်ဖိ ကျေၥ်ထွန်းငြိမ်း ဒီး (BGF-၁၀၁၄) သုးစကီၤ ကၠ့ၣ်လိ ဒီး အသုးတဖၣ် နုၥ်လီၤဆူ ထံဖးဒိၣ်ထၣ်သဝီပူၤ ဒီး ထီၣ်ဃိတၢ်လၢ ကမျၢၢ်အဟံၣ်ပူၤ ဒီး ဟံးန့ၢ်ဆူၣ်ဝဲ တဒဲးဖီမိ အဟုးသး (၂) သလီး, ဒးမံတဖျၢၣ်, တလူကူမိ အ (Phone) တဖျၢၣ်, မၤလဲလ့မိ အ (Phone) တဖျၢၣ်, သဘျုၣ်လၣ် (၃) ပီၢ် ဒီး မၤဘဲလ့ အ (Phone) တဖျၢၣ်န့ၣ်လီၤ. တကတီၢ်ဃီ ဟးကိးဃုၥ်စ့ၢ်ကီးဝဲ မၤဘဲလ့ ဒီး အပါန့ၣ်လီၤ.
ဖဲ ၁၄-၈-၂၀၂၁ နံၤ သုးမီၤစိရိၤ အသုး တပ်မ-၄၄ စုဒုၣ်တီၤဖီလၥ် ခမရ-၁၁၈ အသုးသ့ၣ်တဖၣ် ဟဲနုၥ်လီၤလၢ (မိုးကေၥင်း) ကရူၢ် ဒီး ဟဲနုၥ်လီၤတုၤဖဲ (ပဒိန်ရုံး) ကၠိမဲၥ်ညါအခါ ခးသံဝဲ ကမျၢၢ် (၂) ဂၤ လၢအမ့ၢ်ဝဲ စီၤအဲၣ်သူၣ် ဒီး စီၤအဲၣ်ဒိၣ် န့ၣ်လီၤ. တကတီၢ်ဃီ ဖီၣ်စ့ၢ်ကီးဝဲ ကမျၢၢ် (၂) ဂၤ လၢအမ့ၢ် စီၤသ့သါ ဒီး စီၤခၠါသၣ် န့ၣ်လီၤ.

ခ့ၣ်အဲၣ်ယူၣ်-ကီၢ်ရ့ၣ်တီအူ သုးက့ (၂) ဟီၣ်ကဝီၤ
၇-၈-၂၀၂၁ နံၤ သုးမီၤစိရိၤ အသုး စကခ-၅-ခမရ-၇၀၄ အသုးရ့ၣ်ခိၣ် (၂) ထွန်းလင်းအေၥင် မၢဆူၣ်ဝဲ ကီၢ်သ့ဒၢ သဝီဖိ အဆဲၣ်ကဲၣ် (၆) ခိၣ် လၢ ကဘၣ်တီန့ၣ်ဝဲ အပှၤသုးဖိ အတၢ်ဝံတၢ်စိၥ် စးထီၣ် ကီၢ်သ့ဒၢ တုၤကျ့ၤစိခံ န့ၣ်လီၤ.

ခ့ၣ်အဲၣ်ယူၣ်-မုၢ်တြီၢ်ကီၢ်ရ့ၣ် သုးက့ (၅) ဟီၣ်ကဝီၤ
မုၢ်တြီၢ်ကီၢ်ရ့ၣ် ဟီၣ်ကဝီၤပူၤ သုးမီၤစိရိၤ အသုး ဒ်အမ့ၢ် စကခ-(၈) ခမရ (၄၀၇), ခမရ (၄၀၈), ခမရ (၃၄၁), ခမရ (၄၀၁), ခလရ (၁၉) ဒီး (BGF-၁၀၁၄) အသုးသ့ၣ်တဖၣ် လၢတလါအကတီၢ်ပူၤ ခးလီၤဝဲကျိဖးဒိၣ် လၢကမျၢၢ် အဒူသဝီ, တၢ်ဖံးအီၣ်မၤအီၣ်အလီၢ်အကျဲ ခဲလၢၥ်အိၣ်ဝဲ (၁၂၀) ဖျၢၣ် ဒီး ကမျၢၢ်အဟံၣ်အူအီၣ်ဝဲ (၆) ဖျၢၣ် န့ၣ်လီၤ. သုးမီၤစိရိၤ အသုးတဖၣ် မၤဆူးမၤဆါ တီၢ်ဝဲကမျၢၢ် ခဲလၢၥ် (၃) ဂၤ ဒီး ကမျၢၢ် ဘၣ်ဒိဝဲလၢ သုးမီၤစိရိၤ ခးလီၤကျိဖးဒိၣ် အဃိ (၂) ဂၤဒီး သံဝဲတဂၤ န့ၣ်လီၤ. လၢမုၢ်တြီၢ်ကီၢ်ရ့ၣ် ဟီၣ်ကဝီၤပူၤ သုးမီၤစိရိၤ ဟဲဃုသ့ၣ်ညါတၢ်လီၢ်တၢ်ကျဲ ဟဲဆှၣ်တၢ်လၢ ကဘီယူၤ ခဲလၢၥ်အိၣ်ဝဲ (၅) ဘျီန့ၣ်လီၤ. သုးမီၤစိရိၤ အသုးသ့ၣ်တဖၣ် ဟးဒိးဝဲမ့ၣ်ပိၢ် လၢကမျၢၢ် လဲၤထီၣ်က့ၤလီၤအကျဲ, တၢ်ဖံးအီၣ်မၤအီၣ်လီၢ်ကျဲအဃိ ကမျၢၢ်ယီၢ်ဘၣ်ဝဲ သုးမီၤစိရိၤအမ့ၣ်ပိၢ် တဂၤ ဒီး ဘၣ်ဒိဝဲ နးနးကလဲၥ် န့ၣ်လီၤ. ကမျၢၢ်သ့ၣ်တဖၣ် ဘၣ်အိၣ်မူဝဲလၢ တၢ်ပျံၤတၢ်ဖုး တၢ်ဘၣ်ယိၣ်ဘၣ်ဘှီ အပူၤန့ၣ်လီၤ.

ခ့ၣ်အဲၣ်ယူၣ်-ကီၢ်ရ့ၣ်ဒူပျၥ်ယၥ် သုးက့ (၆) ဟီၣ်ကဝီၤ
၂၆-၈-၂၀၂၁ နံၤ သုးမီၤစိရိၤ အသုး ဒ်အမ့ၢ် ခလရ (၃၂), ခလရ (၂၈၃), ခလရ (၂၈၄), ခမရ (၃၅၈) ဒီး (BGF-၁၀၂၃) သုးရ့ၣ်သ့ၣ်တဖၣ် နုၥ်လီၤဝဲလၢ တကုၢ်ခံသဝီ ဟံၣ်တဖျၢၣ်လၢအမ့ၢ် နီၢ်မိလ့က့အဟံၣ် ဒီး ဖီအီၣ်ဝဲအဆီ အဘ့ၣ် (၄၀) ဆံ ဒီး ဟံစ့ၢ်ကီးဝဲ အသပၢၤဟၢမ့ၤတဖျၢၣ်, နီၣ်တၢၤဖးဒိၣ် (၂) ဘ့ၣ်, ထံခွး (၃) ဖျၢၣ်န့ၣ်လီၤ.

လၢ ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ အဟီၣ်ကဝီၤပူၤ ကမျၢၢ်လၢ ဘၣ်ဃ့ၢ်မှံဟးဖျိ လၢတၢ်ဒုးတၢ်ယၤအဃိ ခဲလၢၥ်အနီၢ်ဂံၢ်ကအိၣ်လၢ (၇၇၀၀၀) ဘျဲၣ်န့ၣ်လီၤ. ကမျၢၢ်တဖၣ် ဘၣ်ကွၢ်ဆၢၣ်မဲၥ်ဒီး တၢ်ကီတၢ်ခဲ တၢ်ဃံးတၢ်စ့ၤ အါမးန့ၣ်လီၤ.