ကညီတၢ်ထူၣ်ဖျဲးသုးမုၢ်ဒိၣ် သုးက့ (၅) ဒီး သုးမီၤစိရိၤအဘၢၣ်စၢၤ တၢ်ခးလိၥ်သး ကဲထီၣ်ဝဲ (၃၀) ဘျီ လၢ (၄) သီအကတီၢ်ပူၤ

သူလ့ၤတၢ်ကစီၣ်, လါအီကူး ၂၁ သီ, ၂၀၂၁ နံၣ်
လါအီကူး ၁၇ သီတုၤ ၂၀ သီ လၢလွံၢ်သီအကတီၢ်ပူၤ ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ မုၢ်တြီၢ်ကီၢ်ရ့ၣ် သုးက့ (၅) အဟီၣ်ကဝီၤပူၤ ကညီတၢ်ထူၣ်ဖျဲး သုးမုၢ်ဒိၣ် ဒီး သုးမီၤစိရိၤအသုးသ့ၣ်တဖၣ် ဘၣ်သဂၢၢ် ခးလိၥ်သး ခဲလၢၥ်အိၣ်ဝဲ အဘျီ (၃၀) န့ၣ်လီၤ. သုးမီၤစိရိၤ အသုးသံဝဲဒၣ် (၂၀) ဂၤ ဒီး ဘၣ်ဒိဝဲ (၃) ဂၤန့ၣ်လီၤ.
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ကီၢ်ရ့ၣ် ဒူသထူၣ် သုးက့ (၁), ကီၢ်ရ့ၣ် တီအူ သုးက့ (၂), ကီၢ်ရ့ၣ် ချၢၣ်လွံၢ်ထူၣ် သုးက့ (၃) အဟီၣ်ကဝီၤပူၤစ့ၢ်ကီး သုးမီၤစိရိၤအသုးသ့ၣ်တဖၣ် ဟူးဂဲၤဝဲ ဒုးယၤဂ့ၢ်ဝီ အတၢ်ရဲၣ်တၢ်ကျဲၤအဃိ ကညီတၢ်ထူၣ်ဖျဲး သုးမုၢ်ဒိၣ် ဒီး သုးမီၤစိရိၤအသုးတဖၣ် အဘၢၣ်စၢၤ တၢ်ဘၣ်သဂၢၢ် ခးလိၥ်သး အိၣ်ထီၣ်စ့ၢ်ကီးဝဲ ခဲအံၤခဲအံၤန့ၣ်လီၤ.
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ မုၢ်တြီၢ်ကီၢ်ရ့ၣ်အဟီၣ်ကဝီၤပူၤ သုးမီၤစိရိၤတဖၣ် သူဝဲကဘီယူၤ လၢဟးကွၢ်ဃုဝဲ တၢ်လီၢ်တၢ်ကျဲ လၢကမျၢၢ်ဖိတဖၣ် ဃ့ၢ်အိၣ်ခူသူၣ်အလီၢ် ဒီး တကတီၢ်ဃီ ခးလီၤစ့ၢ်ကီးဝဲ ကျိဖးဒိၣ် လၢကမျၢၢ်ဖိ အတၢ်ဖံးအီၣ်မၤအီၣ်အလီၢ်အကျဲ ဒီး ကမျၢၢ်ဖိတဖၣ် ဃ့ၢ်အိၣ်ခူသူၣ်အလီၢ်န့ၣ်လီၤ.
သုးမီၤစိရိၤတဖၣ် ဆှၢအါထီၣ်ဝဲ အသုးဂံၢ်ဘါ လၢကီၢ်သူလ့ၤ ကညီတၢ်ပၢၢ်ဆၢ အဟီၣ်ကဝီၤပူၤ ဒီး ဒုးအိၣ်ထီၣ်ဝဲ တၢ်ဒုးအမဲၥ်သၣ် န့ၣ်လီၤ. လၢတၢ်ဒီသဒၢ လီၤက့ၤဟီၣ်ကဝီၤမ့ၢ်ဂ့ၤ, ကမျၢၢ်ဖိသ့ၣ်တဖၣ်မ့ၢ်ဂ့ၤ ကညီတၢ်ထူၣ်ဖျဲး သုးမုၢ်ဒိၣ် ဒီး ကညီဒီကလုၥ် ဂၢၤသးကရၢ ကျဲးစၢးဟံးန့ၣ်ဝဲ မူဒါ ဒီး ကွၢ်ဆၢၣ်မဲၥ်ဝဲ သုးမီၤစိရိၤ လၢတၢ်သူၣ်ဒူသးဒူအပူၤန့ၣ်လီၤ.