သုးမီၤစိရိၤ ခးလီၤကျိဖးဒိၣ် ဒီး ကဘီယူၤဒုးသုး ဟဲဃုသ့ၣ်ညါတၢ်

၂၆. ၅. ၂၀၂၁
တနံၤအံၤ လါမ့ၤထီၣ် ၂၆ သီ, ၂၀၂၁ နံၣ် အနံၤ ပယီၤသုး ကဘီယူၤဒုးသုး ဟးထီၣ်လၢ တီအူကဘီယူၤပျီ တဘ့ၣ်ဒီး တုၤလီၤ မုၢ်တြီၢ်ကီၢ်ရ့ၣ် ဟီၣ်ကဝီၤ ဖဲဟါခီ ၈း၁၄ မံးနံး ဆၢကတီၢ်န့ၣ်လီၤ. တကးဒံးဘၣ် ပယီၤသုးတဖၣ် ခးလီၤဝဲကျိဖးဒိၣ် အါမးန့ၣ်လီၤ.
ပယီၤသုး ကဘီယူၤဒုးသုးတဘ့ၣ်အံၤ ပသ့ၣ်ညါဘၣ်လၢ အဟဲဆှၣ်တၢ် ဒီး မၤလီၤတံၢ်တၢ်လၢ သုးက့ကီၢ်ရ့ၣ် ကိးဘ့ၣ်ဒဲးဃၣ်ဃၣ် လၢအအိၣ်လၢ ကီၢ်သူလ့ၤ ပူၤသ့ၣ်တဖၣ်န့ၣ်လီၤ. အါန့ၢ်အန့ၣ် လဲၤဆှၣ်စ့ၢ်ကီးတၢ်လၢ ကရ့ၣ်နံၣ်တၢ်လီၢ်တဖၣ် စ့ၢ်ကီး ဒ်သိးဒီး ကမၤလီၤတံၢ်စ့ၢ်ကီး တၢ်လီၢ်တဖၣ်န့ၣ်လီၤ.
ဒ်န့ၣ်အသိး လူၤသီကီၢ်ဆၣ်အပူၤ ကရူၢ် ၃ ဘ့ၣ် လၢအမ့ၢ် စီၤမုၢ်ပျီကရူၢ်, လၢၢ်မုၢ်ပျီကရူၢ် ဒီး ခ့ပူၤကရူၢ်တဖၣ် ထံဖိကီၢ်ဖိတဖၣ် ဘၣ်ကွၢ်ဆၢၣ်မဲၥ်ဒီး တၢ်ကီတၢ်ခဲ အကလုၥ်ကလုၥ် ဒ်အမ့ၢ် တၢ်အိၣ်တၢ်ဆိး အလီၢ်အကျဲ တဘၣ်လီၢ်ဘၣ်စးဘၣ် အဃိ ဒူဖိသဝီဖိတဖၣ် ဘၣ်ကွၢ်ဆၢၣ်မဲၥ်ဒီး တၢ်အိၣ်ဆူၣ်အိၣ်ချ့ တၢ်ဂ့ၢ်ကီတဖၣ် အဒိၣ်ကတၢၢ် ဒီး အါန့ၢ်အန့ၣ် တၢ်ဖံးအီၣ်မၤအီၣ်အလီၢ်အကျဲ တဘၣ်လီၢ်ဘၣ်စးဘၣ် ခီဖျိပယီၤသုး ခးလီၤကျိဒိၣ်လၢ အဝဲသ့ၣ်တၢ်ဖံးအီၣ်မၤအီၣ်အလီၢ်အကျဲ အဃိ ကဲထီၣ်တၢ်ကီတၢ်ခဲလၢ အဝဲသ့ၣ်တဖၣ် ကဖံးအီၣ်မၤအီၣ်ဘၣ်က့ၤတၢ် ဘျ့ဘျ့ဆှီဆှီ အဂီၢ်န့ၣ်လီၤ.
ဘၣ်ဃးဒီးတၢ်ဂ့ၢ်အဝဲအံၤ ပသံကွၢ်စ့ၢ်ကီး စီၤမုၢ်ပျီကရူၢ်ခိၣ် စီၤဒါဘံး စံးဝဲ "ထံဖိကီၢ်ဖိကမျၢၢ်တဖၣ် ဘၣ်ကွၢ်ဆၢၣ်မဲၥ် ဒီး တၢ်အီၣ်တၢ်အီ, တၢ်အိၣ်တၢ်ဆိး အလီၢ်အကျဲ တဘၣ်လီၢ်ဘၣ်စးဘၣ် အဒိၣ်ကတၢၢ်န့ၣ်လီၤ."
ပသ့ၣ်ညါဘၣ်လၢ ပယီၤသုးကဘီယူၤ ဒုးသုးဟဲဆှၣ်တၢ်လၢ မုၢ်တြီၢ်ကီၢ်ရ့ၣ်အပူၤ ထီဘိဒီး ပယီၤသုးခးလီၤကျိဖးဒိၣ်ဆူ ကမျၢၢ်တၢ်ဖံးအီၣ်မၤအီၣ်အလီၢ် ကိးမုၢ်နံၤဒဲး စ့ၢ်ကီးန့ၣ်လီၤ.