တကီၢ်ခါ တၢ်ဒုးကဲထီၣ်လၢ ကညီဒီကလုၥ် တၢ်ထူၣ်ဖျဲးသုးမုၢ်ဒိၣ် ဒီး သုးမီၤစိရိၤအဘၢၣ်စၢၤ

လါမ့ၤ ၂၆ သီ, ၂၀၂၁ နံၣ်
မုၢ်တြီၢ်ကီၢ်ရ့ၣ် သုးက့ ၅ အပူၤ တၢ်ဒုးကဲထီၣ်လၢ ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်ဒီး ပယီၤသုးတဖၣ်အဘၢၣ်စၢၤ ကိးမုၢ်နံၤဒဲးန့ၣ်လီၤ. တကးဒံးဘၣ် ပယီၤသုးတဖၣ် ခးလီၤကျိဖးဒိၣ်ဆူ သဝီဖိတဖၣ် တၢ်ဖံးအီၣ်မၤအီၣ်အလီၢ် ဒီး တၢ်အိၣ်တၢ်ဆိးအလီၢ်အကျဲ ကိးမုၢ်နံၤဒဲးစ့ၢ်ကီးန့ၣ်လီၤ.
စးထီၣ်ဖဲ လါမ့ၤ ၅ သီ, ၂၀၂၁ နံၣ် တုၤလါမ့ၤ ၂၆ သီ, ၂၀၂၁ နံၣ် တၢ်ဒုးကဲထီၣ်ဝဲလၢ ကညီဒီကလုၥ်တၢ်ထူၣ်ဖျဲးသုး မုၢ်ဒိၣ်ဒီး ပယီၤသုးတဖၣ်အဘၢၣ်စၢၤ ခဲလၢၥ်အိၣ်ဝဲ (၁၉၃) ဘျီန့ၣ်လီၤ. ဒ်န့ၣ်အသိး ပယီၤသုးသံခဲလၢၥ်အိၣ်ဝဲ (၁၂၈) ဂၤ, ဘၣ်ဒိခဲလၢၥ်အိၣ်ဝဲ (၁၈၀) ဂၤ, ပယီၤသုးကသ့ၣ်သံခဲလၢၥ် (၁၂) ဒု ဒီး အသိလ့ၣ်ဟးဂီၤ ခဲလၢၥ် (၉) ခိၣ်န့ၣ်လီၤ. တကးဒံးဘၣ် ပယီၤသုးသံခဲလၢၥ်အကျါ ပၣ်ဃုၥ်ဝဲဒၣ်ဒီး အသုးခိၣ် ၃ ဂၤဒ်အမ့ၢ် သုးစကီၤဖိ (၁) ဂၤ, သုးခိၣ်ဖိ (၁) ဂၤ ဒီး သုးခိၣ်စိ (၁) ဂၤန့ၣ်လီၤ. လၢကညီဒီကလုၥ်တၢ်ထူၣ်ဖျဲးသုးမုၢ်ဒိၣ်တကပၤ သံဝဲဒၣ် (၂) ဂၤ, ဘၣ်ဒိဝဲ (၉) ဂၤဒီး ကမျၢၢ်တခီသံဝဲဒၣ် (၁) ဂၤ ဒီး ဘၣ်ဒိ (၅) ဂၤန့ၣ်လီၤ.
ဒ်န့ၣ်အသိး ပယီၤသုးတဖၣ် ဟူးဂဲၤဝဲဒၣ်အကလုၥ်ကလုၥ် ဒ်အမ့ၢ် ဟံးန့ၢ်ဆူၣ်ကမျၢၢ်တၢ်ဖိတၢ်လံၤဒီး ခးလီၤဝဲကျိဖး ဒိၣ်တဖၣ်ဆူ ကမျၢၢ်တၢ်ဖံးအီၣ်မၤအီၣ်အလီၢ်ဒီး တၢ်အိၣ်တၢ်ဆိးအလီၢ်အကျဲ ကျိဒိၣ်ခဲလၢၥ်အိၣ်ဝဲ (၉၈) ဖျၢၣ်န့ၣ်လီၤ. အါန့ၢ်အန့ၣ် ဘုသိၣ်ကီၢ်ဆၣ်, ပၣ်ဟဲးကရူၢ် သဝီ (၃) ဖျၢၣ် ဘၣ်ပၥ်တ့ၢ်ကွံၥ်တၢ်ဖံးအီၣ်မၤအီၣ်အလီၢ် ဒ်အမ့ၢ်ခုး (၅၆) လီၢ်, ဒီး သဝီသ့ၣ်တဖၣ်မ့ၢ်ဝဲ ဖိမုၢ်ဒၢသဝီ ခုး (၂) လီၢ်, ဟံၣ်ဖိဒၢသဝီ ခုး (၂၇) လီၢ်, ဒီး ဆီဘှဲဒၢသဝီ ခုး (၂၇) လီၢ်န့ၣ်လီၤ.
ပသ့ၣ်ညါဘၣ် ဖဲပယီၤသုးထီၣ်ဟံးန့ၢ်ဆူၣ် တၢ်စိတၢ်ကမီၤဝံၤအလီၢ်ခံ အဝဲသ့ၣ်တဖၣ်ဟူးဂဲၤဝဲဒၣ်ထီဘိ ဒ်အမ့ၢ် ဆှၢအါထီၣ်တၢ်အီၣ်, ဆှၢအါထီၣ်အပှၤ ဒီး ခးလီၤကျိဆူ ကမျၢၢ် ဒူဖိသဝီဖိအအိၣ် ဖဲမုၢ်တြီၢ်ကီၢ်ရ့ၣ်, သုးက့ (၅) ဟီၣ် ကဝီၤအပူၤ တကးဒံးဘၣ် ဟဲခးလီၤတၢ်လၢကဘီယူၤအဃိ တၢ်ဒုးကဲထီၣ်ဝဲဒၣ်လၢ ကညီဒီကလုၥ်တၢ်ထူၣ်ဖျဲးသုး မုၢ်ဒိၣ်ဒီး ပယီၤသုးတဖၣ်အဘၢၣ်စၢၤ ကိးမုၢ်နံၤဒဲးန့ၣ်လီၤ.