ပယီၤသုးခးလီၤကျိဖးဒိၣ်လၢ ကမျၢၢ်တၢ်ဖံးအီၣ်မၤအီၣ်အလီၢ်

လါမ့ၤ ၂၅ သီ ၂၀၂၁ နံၣ်
ဖဲမဟါတနံၤ ဟါလီၤခီ ၂း၃၀ မံးနံးဆၢကတီၢ် ပယီၤသုးကလၢၤ (တပခ-ခမရ-၂၀) အိၣ်ဆီလီၤအသး ကိကီၢ်ဒ့ ခးလီၤဝဲကျိဖးဒိၣ် ၂ ဖျၢၣ်လၢ လူၤသီကီၢ်ဆၣ်, စီၤမုၢ်ပျီကရူၢ်, ဝါခိၣ်ထၣ် ဟီၣ်ကဝီၤပူၤန့ၣ်လီၤ.
ပယီၤသုးခးလီၤကျိဖးဒိၣ်အံၤ ဘၣ်ဝဲကမျၢၢ် တၢ်ဖံးအီၣ်မၤအီၣ်အလီၢ် လၢအဘူးဒီး ဝါခိၣ်ထၣ်သဝီအဃိ ဝါခိၣ်ထၣ် သဝီပှၤနီၣ်ဂံၢ်အိၣ်ဝဲ ၃၉၃ ဂၤ ဘၣ်အိၣ်ဝဲလၢ တၢ်ပျံၤတၢ်ဖုးဒီး တၢ်ဘၣ်ယိၢ်ဘၣ်ဘှီအပူၤဒိၣ်မးန့ၣ်လီၤ.
ပှၤလီၢ်ကဝီၤဖိတဂၤ လၢအမ့ၢ် စီၤဒံးဆၢ စံးဝဲ "ပယီၤသုးခးကျိဖးဒိၣ်အဆၢကတီၢ် ဘၣ်ဖဲ ဖီအီၣ်တ့ၤအီၣ် ဒီး ကျိဖးဒိၣ်လီၤတဲၥ်လၢ သဝီကပၤအဃိ ပဘၣ်ပျံၤဘၣ်ဖုးတၢ် တုၤဒၣ်လဲၣ် ဖီအီၣ်တ့ၤအီၣ်က့ၤ တဘူၣ်လၢၤဘၣ်."
ပယီၤသုးကလၢၤလၢ မုၢ်တြီၢ်ကီၢ်ရ့ၣ်, လူၤသီကီၢ်ဆၣ်တဖၣ် ဟူးဂဲၤအါထီၣ်ဝဲ ကိးမုၢ်နံၤဒဲး ဆှၢအါထီၣ်အပှၤဂံၢ်ဘါ စုကဝဲၤဂံၢ်ဘါ ဆှၢအါထီၣ်ဝဲ တၢ်အီၣ်ကိးမုၢ်နံၤဒဲးန့ၣ်လီၤ.