Civilian demostration against Tamadaw in KNU Mutraw District

မုၢ်နံၤ ၂၀၂၀ နံၣ်, လါဒံၣ်စ့ဘၢၣ် ၃၀ သီ
ဖဲ လါဒံၣ်စ့ဘၢၣ် ၃၀ သီ ၂၀၂၀ နံၣ် အနံၤန့ၣ် လူၤသီကီၢ်ဆၣ် ကမျၢၢ်တဖၣ် ပၥ်ဖျါထီၣ်အတၢ်ဘၣ်သးလၢ တၢ်လီၢ် ၃ တီၤ, ပၥ်ဖျါဃ့ထီၣ်ဝဲ အတၢ်ဘၣ်သးတဖၣ် ဒီး ထီဒါဝဲ ပယီၤသုးမုၢ်ဒိၣ် အတၢ်ဟဲနုၥ်လီၤ ဟူးဂဲၤမၤဘၣ်ဒိ ပှၤဂ့ၢ်ဝီခွဲးယၥ်တဖၣ် ဖဲမုၢ်တြီၢ်ကီၢ်ရ့ၣ် ဟီၣ်ကဝီၤပူၤအံၤန့ၣ်လီၤ.
ဘၣ်ထွဲဒီး ကမျၢၢ်တၢ်ပၥ်ဖျါသး တၢ်ဟူးတၢ်ဂဲၤတဘျီအံၤန့ၣ် ပသ့ၣ်ညါဘၣ်လၢ လူသီကီၢ်ဆၣ် လီၢ်ကဝီၤကမျၢၢ်လၢ ကရူၢ် (၁၂) ဘ့ၣ်အပူၤ ဒ်အမ့ၢ် ခ့ပူၤ, နီၢ်ယိးထၣ်, လၢၢ်မုၢ်ပျီ, စီၤမုၢ်ပျီ, ကီၤလူၢ်ဒၢ, ဖျးခိၣ်, ယဲၤမုၢ်ပျီ, ဃဲပၤ, ပ့က့, ဘီသ့ၣ်ထၣ်, ကလီၤထၣ် ဒီး တ့မုၢ်ဒၢ ကရူၢ်သ့ၣ်တဖၣ် ပၥ်ဖျါထီၣ်အသးလၢ တၢ်လီၢ် ၃ တီၤဒီး (၁) တတီၤန့ၣ် မ့ၢ်ဝဲ နီၢ်ယိးထၣ်, (၂) တီၤတတီၤန့ၣ်မ့ၢ်ဝဲ ထံဟီထၣ် ဒီး (၃) တီၤတတီၤန့ၣ်မ့ၢ်ဝဲဖဲ ဒ့ၣ်ပူၤနိၣ် ဟီၣ်ကဝီၤပူၤ န့ၣ်လီၤ.
လၢကမျၢၢ်တဖၣ် အတၢ်ပၥ်ဖျါထီၣ်သး တၢ်ဟူးတၢ်ဂဲၤတဘျီအံၤအပူၤန့ၣ် အဝဲသ့ၣ်တဖၣ် ဃ့ပၥ်ဖျါထီၣ်ဝဲ တၢ်ဂ့ၢ် (၃) ထံၣ် ဒ်အမ့ၢ် (၁) "ပယီၤသုးကဘၢၣ်ထီၣ်ကျဲလၢ ပဟီၣ်ကဝီၤပူၤန့ၣ် ခီဖျိလၢ ထံရူၢ်ကီၢ်သဲးတရှဲ, တၢ်အုၣ်ကီၤတအိၣ်အဃိ မ့ၢ်တၢ်ပိၥ်ထွဲ ကဲထီၣ်တ့ၢ်ဒီး ကဆဲးကဲထီၣ်ဒၣ်ဆူ သုးဂ့ၢ်ဝီ တၢ်ဒိၣ်စိ ဒုးယၤဂံၢ်ဘါ တၢ်ကတီၤသး လၢမၤဘၣ်ဒိ ပတၢ်အိၣ်မူ တၢ်ဘံၣ်တၢ်ဘၢ အဖီခိၣ် လ့ၤတက့ၤ ပတပျဲမၤဘၣ် ဒီး ပလိၣ်ဘၣ်လၢ ပခိၣ်ပနၢ် ကတြီစၢၤပှၤ တဲၥ်တဲၥ်"
(၂) "ပဟီၣ်ကဝီၤပူၤ ပယီၤသုးကလၢၤတဖၣ် ဟဲနုၥ်လီၤအိၣ်အါတလၢ အမဲၥ်ညါ ဟူးဂဲၤခးဝ့ၤဝီၤဃုၥ် ကျိဒိၣ်အဃိ ကဲထီၣ်တၢ်ကီတၢ်ခဲလၢ ပတၢ်အိၣ်ဆိး ဟူးဂဲၤဖံးအီၣ်မၤအီၣ် ဒီး တုၤဒၣ်လဲၣ် ကဲထီၣ်န့ၢ်ပှၤ တၢ်လီၤပျံၤ သးသမူတၢ်လီၤဘၣ်ယိၥ် အဖီခိၣ် အဝဲသ့ၣ်ကဘၣ်က့ၤလီၤ ဒီး အလီၢ်အိၣ်လၢ ပခိၣ်ပနၢ်တဖၣ် ကဆီၣ်သနံးစၢၤပှၤ"
(၃) "ပယီၤသုး အကဘီယူၤ ဟးဝ့ၤဝီၤလၢပဖီခိၣ် ဒီး အ (Drone) တဖၣ် ဟးဃုသ့ၣ်ညါ ဒိခူသူၣ် တၢ်ဂီၤအါမးအဃိ ကဲထီၣ်တၢ်ဘၣ်ဒိ ပတၢ်ဘံၣ်တၢ်ဘၢ ဒီး မ့ၢ်တၢ်လီၤဘၣ်ယိၥ် တၢ်လီၤပျံၤလၢပဂီၢ် အဖီခိၣ် ကဘၣ်ပတုၥ်ကွံၥ်ဝဲ ဒီး အလီၢ်အိၣ်လၢ ပခိၣ်ပနၢ်တဖၣ် ကဒီသဒၢစၢၤပှၤ" တၢ်ဂ့ၢ်သ့ၣ်တဖၣ် ဒီး လၢအဝဲသ့ၣ် အတၢ်ဟူးတၢ်ဂဲၤအပူၤ ကိးသဝီဃုၥ်စ့ၢ်ကီးဝဲ တၢ်ဂ့ၢ် ၃ ထံၣ် ဒ်အမ့ၢ် "၁. ပတၢ်လီၢ် ပယီၤဘၢၣ်ကျဲ -တြီတဲၥ်တဲၥ်, ၂. ကျဲလၢပယီၤသုးကမၤ-တသ့ဘၣ်, ၃. ထံရူၢ်ကီၢ်သဲးမၤရှဲဆိ-အကါဒိၣ်" သ့ၣ်တဖၣ်န့ၣ်လီၤ.
လီၢ်ကဝီၤကမျၢၢ် အတၢ်ဟူးတၢ်ဂဲၤ တၢ်ပၥ်ဖျါတၢ်ဘၣ်သး ဒီး တြီဆၢထီဒါဝဲ ပယီၤသုးမုၢ်ဒိၣ်တဖၣ် အတၢ်ဟဲနုၥ်လီၤ ဟူးဂဲၤမၤဘၣ်ဒိ ပှၤဂ့ၢ်ဝီခွဲးယၥ်လၢ မုၢ်တြီၢ်ကီၢ်ရ့ၣ် ဟီၣ်ကဝီၤပူၤ အတၢ်ရဲၣ်တၢ်ကျဲၤ ဒ်သိးအံၤန့ၣ် လၢ ၂၀၂၀ နံၣ် အတီၢ်ပူၤ ပသ့ၣ်ညါဘၣ်လၢ လီၢ်ကဝီၤကမျၢၢ်တဖၣ် ဟူးဂဲၤမၤဝဲ အိၣ် ၃ ဘျီလၢ အပၥ်ဃုၥ် ဒီး ဘျီဝဲအံၤန့ၣ်လီၤ.
ပသ့ၣ်ညါဘၣ် စ့ၢ်ကီးလၢ လီၢ်ကဝီၤ ကမျၢၢ်တၢ်ပၥ်ဖျါသး တၢ်ရဲၣ်တၢ်ကျဲၤ တဘျီအံၤန့ၣ် နီၢ်ယိးထၣ် ဟီၣ်ကဝီၤကမျၢၢ် (၃၉၈၁) ဂၤ, ထံဟီထၣ် ဟီၣ်ကဝီၤကမျၢၢ် (၁၀၉၇) ဂၤ, ဒ့ၣ်ပူၤနိၣ် ဟီၣ်ကဝီၤကမျၢၢ် (၅၇၂၁) ဂၤ ဒီး လီၢ်ကဝီၤကမျၢၢ် လၢဟဲပၥ်ဖှိၣ်ထီၣ်အသး ဖဲတၢ်ရဲၣ်တၢ်ကျဲၤတဘျီအံၤခဲလၢၥ် အိၣ်ဝဲ (၁၀၇၉၉) ဂၤန့ၣ်လီၤ.