World Indigenous people day celebrated by Ler Doh Township civilian

လါအီကၢး ၉ သီ ၂၀၂၀ နံၣ်
အီကၢး (၉) သီ ၂၀၂၀ နံၣ် ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ကီၢ်ရ့ၣ်ချၢၣ်လွံၢ်ထူၣ်, လၢၢ်ဒိၣ်ကီၢ်ဆၣ် ဟီၣ်ဝီၤပှၤ ထူလံၤဖိသ့ၣ်တဖၣ် အိၣ်ဒီးတၢ်ရဲၣ်တၢ်ကျဲၤလၢ တၢ်မၤလၤကပီၤဝဲ ဟီၣ်ခိၣ်ဒီဖျၢၣ် ပှၤထူလံၤဖိမုၢ်နံၤ ဖဲဃိၣ်ဖိ (ကိး) ဘုရၥးလေးကုန်း န့ၣ်လီၤ.
တၢ်မၤလၤကပီၤ ဟီၣ်ခိၣ်ဒီဖျၢၣ် ပှၤထူလံၤဖိမုၢ်နံၤဘျီဝဲအံၤ ဒူသဝီကမျၢၢ်ဖိသ့ၣ်တဖၣ် ဟဲထီၣ်ဝဲ လၢတၢ်မၤလၤကပီၤ အမူး ပှၤနီၣ်ဂံၢ်ခဲလၢၥ် (၆၀၀) ဃၣ်ဃၣ်န့ၣ်လီၤ. တၢ်မၤလၤကပီၤ ဟီၣ်ခိၣ်ဒီဖျၢၣ် ပှၤထူလံၤဖိမုၢ်နံၤ ဘျီဝဲအံၤ ကီၢ်ရ့ၣ်ချၢၣ်လွံၢ်ထူၣ်, လၢၢ်ဒိၣ်ကီၢ်ဆၣ် ပှၤထူလံၤဖိ (ကမျၢၢ်ဒူသဝီဖိ) တဖၣ် အိၣ်ဒီးအတၢ်ပၥ်ဖျါ တၢ်ဘၣ်သးသ့ၣ်တဖၣ် န့ၣ်လီၤ.
တၢ်ပၥ်ဖျါ တၢ်ဘၣ်သးလၢ ပှၤထူလံၤဖိသ့ၣ်တဖၣ် ပၥ်ဖျါထီၣ်တဖၣ် မ့ၢ်ဝဲ-
(၁)    ပလိၣ်ဘၣ် ပှၤထူလံၤဖိ အတၢ်အိၣ်မူ တၢ်ဘံၣ်တၢ်ဘၢ
(၂)    ပလိၣ်ဘၣ် ပှၤထူလံၤဖိ အတၢ်ခွဲးတၢ်ယၥ်တၢ်တုၤသိးထဲသိး
(၃)    ပလိၣ်ဘၣ် တၢ်မုၥ်တၢ်ခုၣ် လၢအတီအတြၢ် သ့ၣ်တဖၣ်န့ၣ်လီၤ.
ပှၤဘၣ်မူဘၣ်ဒါတဖၣ် ကီၢ်ရ့ၣ်ချၢၣ်လွံၢ်ထူၣ်, လၢၢ်ဒိၣ်ကီၢ်ဆၣ် ဟီၣ်ကဝီၤပူၤအံၤ တၢ်မၤလၤကပီၤ ဟီၣ်ခိၣ်ဒီဖျၢၣ်ပှၤထူလံၤဖိ မုၢ်နံၤတဘျီအံၤ မ့ၢ်တၢ်အဆိကတၢၢ်တဘျီန့ၣ်လီၤ. လၢတၢ်ရဲၣ်တၢ်ကျဲၤတဘျီအံၤ ဘၣ်တၢ်တီခိၣ်ရိၣ်မဲအီၤလၢ လီၢ်ကဝီၤပှၤထူလံၤဖိ ခိၣ်နၢ်တဖၣ် ဒီး ဟီၣ်ကဝီၤ ပှၤဘၣ်မူဘၣ်ဒါ သ့ၣ်တဖၣ်န့ၣ်လီၤ. တၢ်မၤလၤကပီၤ ဟီၣ်ခိၣ်ဒီဖျၢၣ် ပှၤထူလံၤဖိမုၢ်နံၤအမူးအံၤ ဝံၤဝဲဖဲ မုၢ်ထူၣ် (၁၁း၃၀) မံးနံး အဆၢကတီၢ်န့ၣ်လီၤ.
တၢ်မၤလၤကပီၤ ဟီၣ်ခိၣ်ဒီဖျၢၣ် ပှၤထူလံၤဖိမုၢ်နံၤ တၢ်ရဲၣ်တၢ်ကျဲၤအံၤ ဒ်ထံကီၢ်တၢ်သိၣ်တၢ်သီ ဒီး လီၢ်ကဝီၤတၢ်သိၣ်တၢ်သီလၢ (Covid-19) အဂီၢ်အိၣ်အသိး တၢ်ကဒီသဒၢဝဲအဂီၢ် ပှၤတီခိၣ်ရိၣ်မဲတၢ်သ့ၣ်တဖၣ် ဟံးစုနဲၣ်ကျဲကမျၢၢ်သ့ၣ်တဖၣ်လၢ ကဘၣ်အိၣ်စိၤစုၥ်လိၥ်သး ၃ ခီၣ်ယီၢ်, ကဘၣ်သူဝဲ (Mask) ဒီး ကဘၣ်သ့အစု ဒ်သိးကဒီသဒၢ တၢ်စူးတၢ်ဆါ အဂီၢ်န့ၣ်လီၤ. ပှၤကမျၢၢ်သ့ၣ်တဖၣ် ဒ်ပှၤဘၣ်မူဘၣ်ဒါ တီခိၣ်ရိၣ်မဲအီၤအသိး ပထံၣ်ဘၣ်လၢ မၤထွဲဝဲ ဒ်အလီၢ်အိၣ်အသိး န့ၣ်လီၤ.