ဘုသိၣ် ဒီး ဒွဲၣ်လိကီၢ်ဆၣ် ကမျၢၢ်လၢအကထိတဖၣ် ပၥ်ဖျါထီၣ်အတၢ်ဘၣ်သး လၢပယီၤသုးမုၢ်ဒိၣ် အသုးကလၢၤ လၢအအိၣ်ဖဲ ဟီၣ်ကဝီၤပူၤတဖၣ် ကဘၣ်ထုးကွံၥ်အသး

ဘုသိၣ် ဒီး ဒွဲၣ်လိကီၢ်ဆၣ် ကမျၢၢ်လၢအကထိတဖၣ် ပၥ်ဖျါထီၣ်အတၢ်ဘၣ်သး လၢပယီၤသုးမုၢ်ဒိၣ် အသုးကလၢၤ လၢအအိၣ်ဖဲ ဟီၣ်ကဝီၤပူၤတဖၣ် ကဘၣ်ထုးကွံၥ်အသး

လါယူၤလံ ၂၈ သီ ၂၀၂၀ နံၣ်

ဖဲလါယူၤလံထီၣ် ၂၈ သီ ၂၀၂၀ နံၣ်အနံၤ ဂီၤခီ ၇း၀၀ နၣ်ရံၣ် တုၤဟါခီ ၂း၀၀ နၣ်ရံၣ် အဆၢကတီၢ်န့ၣ် ဒွဲၣ်လိကီၢ်ဆၣ် ဒီး ဘုသိၣ်ကီၢ်ဆၣ် လီၢ်ကဝီၤကမျၢၢ် ဒူဖိသဝီဖိ လၢအကထိတဖၣ် ပၥ်ဖျါထီၣ်အသးလၢ တၢ်လီၢ်ခံတီၤ ဖဲပယီၤသုးကလၢၤအိၣ် ကျဲမုၢ်တိၤ တဖၣ်အမဲၥ်ညါ ဒီး ပၥ်ဖျါဃ့ထီၣ်ဝဲဒၣ် အတၢ်ဘၣ်သး တဖၣ် န့ၣ်လီၤ.
လီၢ်ကဝီၤ ဒူဖိသဝီဖိတဖၣ် မၤဝဲတၢ်ပၥ်ဖျါထီၣ် တၢ်ဘၣ်သး တၢ်ရဲၣ်တၢ်ကျဲၤတဘျီအံၤန့ၣ် အဝဲသ့ၣ်တဖၣ် ပၥ်ဖျါထီၣ်ဝဲ တၢ်ဂ့ၢ်ဒ်အမ့ၢ်
၁. ဖဲ ၂.၁.၂၀၂၀ နံၣ်အနံၤ ပယီၤသုးမုၢ်ဒိၣ် (စကခ-၈) စုတီၤဖီလၥ် ခမရ-၄၀၈ အသုးတဖၣ် ခးသံ ၀ၣ်သိခိၣ်သဝီဖိ တၢ်ဂ့ၢ်
၂. ဖဲ ၅.၃.၂၀၂၀ နံၣ်အနံၤ ပယီၤသုးမုၢ်ဒိၣ် (ရတခ) စုတီၤဖီလၥ် ခမရ-၃၃၈ အသုးတဖၣ် ခးသံဝဲ ဂၢၤပှၢ် ဖဲမဲၤဝ့ၤသဝီ ကျဲမုၢ်ခိၣ် တၢ်ဂ့ၢ်
၃. ဖဲ ၇.၅.၂၀၂၀ နံၣ်အနံၤ ပယီၤသုးမုၢ်ဒိၣ် (စကခ-၈) စုတီၤဖီလၥ် ခမရ-၄၁၀ အသုးတဖၣ် ခးလီၤကျိဖးဒိၣ်လၢ ၀ၣ်သိခိၣ်သဝီပူၤ ဒီး သဝီဖိတဖၣ် ဘၣ်ပျံၤဘၣ်ဖုး ဘၣ်သုးလီၢ်သုးကျဲ တၢ်ဂ့ၢ်
၄. ဖဲ ၉.၅.၂၀၂၀ နံၣ်အနံၤ ပယီၤသုးမုၢ်ဒိၣ် (စကခ-၈) စုတီၤဖီလၥ် ခမရ-၄၁၀ ခးသံဝဲ ကူဆံးသဝီဖိ တၢ်ဂ့ၢ်
၅. ဖဲ ၂.၆.၂၀၂၀ နံၣ်အနံၤ ပယီၤသုးမုၢ်ဒိၣ် (စကခ-၈) စုတီၤဖီလၥ် ခမရ-၄၀၅ ခးသံဝဲ ၀ၣ်သိထၣ်သဝီဖိ တၢ်ဂ့ၢ်
၆. ဖဲ ၁၆.၇.၂၀၂၀ နံၣ်အနံၤ ပယီၤသုးမုၢ်ဒိၣ် (စကခ-၈) စုတီၤဖီလၥ် ခမရ-၄၀၉ ခးသံဝဲ ပိၣ်လိထၣ်သဝီဖိ တၢ်ဂ့ၢ်
၇. ပယီၤသုးတဖၣ် ဟံးကျဲတၢ်ဘံၣ်တၢ်ဘၢ လဲၤက့ၤဖဲအသး ဒီး ဟးတလၢကွံၥ် တၢ်ပၥ်ပနီၣ်အလီၢ်အဃိ ကဲထီၣ်က့ၤတၢ်ပျံၤတၢ်ဖုး တၢ်လီၤဘၣ်ယိၢ်လၢ လီၢ်ကဝီၤထံဖိကီၢ်ဖိ ဒူသဝီကမျၢၢ်တဖၣ်အဂီၢ် တၢ်ဂ့ၢ်သ့ၣ်တဖၣ်
၈. ဒီး ပယီၤသုးမၤတရီတပါ နီၢ်----- (အကၤဖံသူ) လၢအသးနံၣ်အိၣ်ဝဲ ၁၆ နံၣ် တၢ်ဂ့ၢ်

ခဲလၢၥ်အိၣ်ဝဲ (၈) ထံၣ် ဒီး ပၥ်ဖျါထီၣ်စ့ၢ်ကီးဝဲလၢ "ပယီၤသုးမုၢ်ဒိၣ်တဖၣ် အတၢ်မၤအၢမၤသီ မၤသံမၤဝီ ဒီး မၤတရီတပါ မၤဆူၣ်မၤစိး ပဝဲဒၣ်လီၢ်ကဝီၤ ထံဖိကီၢ်ဖိကမျၢၢ်တဖၣ် ဒ်အံၤအဖီခိၣ် ပတသးမံနီတစဲးဘၣ် ဒီး အဝဲသ့ၣ်တဖၣ် ဃ့ထီၣ်ဝဲလၢ ပယီၤသုးကလၢၤလၢ အအိၣ်ဖဲ ဟီၣ်ကဝီၤပူၤ ဒ်အမ့ၢ် ခိၣ်သွံၣ်ထၣ် သုးကလၢၤ, မဲၤဝ့ၤသုးကလၢၤ, က့ၣ်ကိၣ်သုးကလၢၤ ဒီး ဝီၢ်မုၢ်သုးကလၢၤတဖၣ် ကထုးကွံၥ်အသးန့ၣ်လီၤ.

လၢလီၢ်ကဝီၤ ဒူဖိသဝီဖိတဖၣ် ပၥ်ဖျါထီၣ်အတၢ်ဘၣ်သး တၢ်ရဲၣ်တၢ်ကျဲၤအံၤန့ၣ် ဟဲကဲထီၣ်အသး ခီဖျိ ပယီၤသုးမုၢ်ဒိၣ် လၢအအိၣ်ဖဲ မုၢ်တြီၢ်ကီၢ်ရ့ၣ်ဟီၣ်ကဝီၤ, ကီၣ်ဆၣ် (၃) ဘ့ၣ်လၢၥ်အပူၤတဖၣ် မၤပျံၤမၤဖုး, မၤဆူးမၤဆါ, မၤအၢမၤသီ ဒီး မၤသံမၤဝီ လီၢ်ကဝီၤကမျၢၢ်ထံဖိကီၢ်ဖိတဖၣ် အၢအၢသီသီ အိၣ်ဒံးဝဲတပယူၥ်ဃီ တုၤမုၢ်မဆါတနံၤအံၤအဃိ လီၢ်ကဝီၤထံဖိကီၢ်ဖိ ကမျၢၢ်လၢဘုသိၣ်ကီၢ်ဆၣ်ဟီၣ်ကဝီၤ, ကရူၢ် (၆) ဘ့ၣ် ဒီး ဒွဲၣ်လိကီၢ်ဆၣ်ဟီၣ်ကဝီၤ ကရူၢ် (၄) ဘ့ၣ်, သဝီခဲလၢၥ် (၁၁၄) ဖျၢၣ်အပူၤ လီၢ်ကဝီၤကမျၢၢ် လၢအကထိတဖၣ် ပၥ်ဖျါထီၣ်အသး တၢ်လီၢ်ခံတီၤ စးထီၣ် (ကူဆံးပယီၤသုးကလၢၤ ဒီး ဆူလၥ်တကပၤ ဖဲပယီၤသုးကလၢၤအိၣ်ကျဲမုၢ်တိၤတဖၣ်) အမဲၥ်ညါ ဒီး ပၥ်ဖျါထီၣ်ဝဲ တၢ်ဘၣ်သး ဒီး ကိးသတြီထီၣ်ဝဲ တၢ်ဂ့ၢ်ဒ်အမ့ၢ် "ပကမျၢၢ်တၢ်ဟဲမၤသံ-ပတသးမံ, ပသဝီတၢ်ဒိၣ်စိပှၤ-ပတအဲၣ်ဘၣ်, ဘံၣ်ဘၢလၢပတၢ်အိၣ်မူ-မၤဃူဃူ, ဒီး ပဒ့ပီၤပတၢ်န့ၢ်သါ-မ့ၢ်ပတၢ်" သ့ၣ်တဖၣ်န့ၣ်လီၤ.

ဘၣ်ဃးဒီး ကမျၢၢ်တၢ်ပၥ်ဖျါထီၣ်သး တၢ်ရဲၣ်တၢ်ကျဲၤတဘျီအံၤဖီခိၣ် ပှၤလၢတီခိၣ်ရိၣ်မဲတၢ်တဖၣ် စံးဝဲဒ်အံၤန့ၣ်လီၤ.
"ပကွၢ်က့ၤလၢ ပဟီၣ်ကဝီၤပူၤအံၤ ပယီၤသုးမုၢ်ဒိၣ်တဖၣ် ဆီလီၤဝဲဒၣ် အသုးကလၢၤ ဘူးဘူးတံၢ်တံၢ် ဒီး ပဝဲဒၣ်လီၢ်ကဝီၤကမျၢၢ်သ့ၣ်တဖၣ် အိၣ်ဆိး, ဖံးအီၣ်မၤအီၣ် တၢ်အလီၢ်အကျဲ အိၣ်ဝဲအါမးလၢ တၢ်လီၢ်တဘျုးတီၤ ဒီး ပကွၢ်က့ၤအဝဲသ့ၣ်တဖၣ် အတၢ်ဟူးတၢ်ဂဲၤန့ၣ် မ့ၢ်တၢ်လီၤဘၣ်ယိၢ် အါထီၣ်ဝဲဒၣ်ကွ့ၢ်ကွ့ၢ် လၢပဝဲဒၣ် လီၢ်ကဝီၤဖိတဖၣ် အဂီၢ်န့ၣ်လီၤ. အခီၣ်ထံး ပဆိကမိၣ်လၢ ပခိၣ်ပနၢ်တဖၣ် မၤဝဲတၢ်ပတုၥ်တၢ်ခးဒီး လၢပဝဲဒၣ် လီၢ်ကဝီၤထံဖိကီၢ်ဖိကမျၢၢ်တဖၣ်အဂီၢ် တၢ်မုၥ်တၢ်ခုၣ်, တၢ်ဘံၣ်တၢ်ဘၢ ကအိၣ်ထီၣ်က့ၤဒီး ပကဖံးအီၣ်မၤအီၣ် လဲၤဘၣ်က့ၤဘၣ် လၢတၢ်သဘျ့အပူၤန့ၣ်လီၤ. ဘၣ်ဆၣ် ပကွၢ်က့ၤပယီၤသုးမုၢ်ဒိၣ်တဖၣ် အတၢ်အိၣ်သး လၢဆၢကတီၢ်ခဲအံၤန့ၣ် မၤပျံၤမၤဖုး, မၤဆူးမၤဆါ, မၤအၢမၤသီ ဒီး မၤသံမၤဝီ ပဝဲဒၣ်လီၢ်ကဝီၤ ပမျၢၢ်ထံဖိကီၢ်ဖိတဖၣ် အၢအၢသီသီ အိၣ်ဒံးဝဲအဖၢမုၢ် တုၤမုၢ်မဆါတနံၤညါအံၤန့ၣ်လီၤ. လၢတၢ်န့ၣ်အဃိ ပဝဲဒၣ် ဘုဒိၣ် ဒီး ဒွဲၣ်လိကီၢ်ဆၣ် လီၢ်ကဝီၤကမျၢၢ် ဒူဖိသဝီဖိတဖၣ် ပပၥ်ဖှိၣ်ထီၣ်ပသးလၢ တၢ်လီၢ်အါတီၤ ဒီး ပပၥ်ဖျါဃ့ထီၣ်ဝဲ ပဝဲဒၣ် လီၢ်ကဝီၤဖိတဖၣ် အတၢ်ဘၣ်သး ဒီး ပမၤဝဲတၢ်ပၥ်ဖျါတၢ်ဘၣ်သး တၢ်ကိးသတြီထီၣ် တၢ်ရဲၣ်တၢ်ကျဲၤ ဒ်အံၤန့ၣ်လီၤ."

လၢကမျၢၢ်အတၢ်ပၥ်ဖျါထီၣ် တၢ်ဘၣ်သး တၢ်ရဲၣ်တၢ်ကျဲၤတဘျီအံၤန့ၣ် ပသ့ၣ်ညါဘၣ်လၢ လီၢ်ကဝီၤကမျၢၢ် ဒူဖိသဝီဖိ လၢကရူၢ်အဘ့ၣ် (၁၀) အပူၤ ဒ်အမ့ၢ် ဒွဲၣ်လိကီၢ်ဆၣ် ဟီၣ်ကဝီၤ ကရူၢ်လၢအမ့ၢ် မၥ်ထီ, ထံသဘျုၣ်ထၣ်, လ့ဖိထၣ် ဒီး ကတၢတံး ကရူၢ် ဒီး ဘုသိၣ်ကီၢ်ဆၣ် ဟီၣ်ကဝီၤပူၤ ကရူၢ်လၢအမ့ၢ် မဲၤကျိ, မဲၤညူး, မဲၤခူၣ်, မဲၤမှဲ, ဒ့ဝါ ဒီး ကၠီပါ ကရူၢ်အပူၤ လီၢ်ကဝီၤကမျၢၢ် ထံဖိကီၢ်ဖိတဖၣ် ပၥ်ဖှိၣ်ထီၣ်အသး ခဲလၢၥ်ပှၤ (၄၆၅၀) ဂၤ လၢတၢ်လီၢ်ခံတီၤလၢၥ် ဖဲ ကတၢတံး ပယီၤသုးကလၢၤ ဒီး ကူဆံး ပယီၤသုးကလၢၤ ခံဖျၢၣ်အမဲၥ်ညါ န့ၣ်လီၤ.

ဘၣ်ထွဲဒီး ကမျၢၢ်အတၢ်ပၥ်ဖျါထီၣ် အတၢ်ဘၣ်သး တၢ်ရဲၣ်တၢ်ကျဲၤဒ်သိးအံၤန့ၣ် ဖဲပယီၤသုးခံဂၤ ခးသံဝဲ နီၢ်မုၣ်နီၤ လၢအတၢ်ကမၣ် တအိၣ်နီတမံၤဘၣ်တဂၤ အၢအၢသီသီ ဝံၤအလီၢ်ခံ ဖဲလါယူၤလံထီၣ် (၂၂) သီ ၂၀၂၀ နံၣ်အနံၤ စ့ၢ်ကီး ဒွဲၣ်လိကီၢ်ဆၣ် ဟီၣ်ကဝီၤပူၤ ကရူၢ်ဒ်အမ့ၢ် ခိၣ်သွံၣ်ထၣ်, လ့ခီၣ်ထံး, မဲၤဝ့ၤ, ဝီၢ်မုၢ် ဒီး မးလ့လၢၢ် ကရူၢ်အပူၤ လီၢ်ကဝီၤကမျၢၢ် (၁၅၂၄) ဂၤ ပၥ်ဖှိၣ်ထီၣ်အသးလၢ တၢ်လီၢ် ၄ တီၤ ဒ်အမ့ၢ် ခိၣ်သွံၣ်ထၣ် ပယီၤသုးကလၢၤမဲၥ်ညါ, ဝီၢ်မုၢ် ပယီၤသုးကလၢၤမဲၥ်ညါ, က့ကိၣ် ပယီၤသုးကလၢၤမဲၥ်ညါ ဒီး မဲၤဝ့ၤ ပယီၤသုးကလၢၤတဖၣ်မဲၥ်ညါ ဒီး ပၥ်ဖျါထီၣ်ဝဲ အတၢ်ဘၣ်သး ကိးသတြီထီၣ်သကိးဝဲလၢ "ပယီၤသုးတဖၣ် မၤအၢမၤသီ မၤသံမၤဝီ ပပှၤကလုၥ် ပလီၢ်ကဝီၤ ထံဖိကီၢ်ဖိကမျၢၢ်န့ၣ် လ့ၤတက့ၤ ပတသးမံဘၣ် ဒီး ပယီၤသုးကလၢၤလၢ အိၣ်ဖဲ လီၢ်ကဝီၤပူၤတဖၣ် ကဘၣ်ထုးကွံၥ်အသး ခဲလၢၥ်န့ၣ်လီၤ."