သုးမီၤစိရိၤအသုးတဖၣ် ဒီး သုးခိးကီၢ်ဆၢ (BGF) အသုးတဖၣ် မၤပျံၤမၤဖုးကမျၢၢ်, ဟံးန့ၢ်ဆူၣ် ကမျၢၢ်အဆၣ်ဖိကီၢ်ဖိ

၂၀၂၁ နံၣ် လါစဲးပထ့ဘၢၣ် ၂၄ သီ, ခ့ၣ်အဲၣ်ယူၣ်-လီၢ်ခၢၣ်သး
ချၢၣ်လွံၢ်ထူၣ်ကီၢ်ရ့ၣ်, ဆီထံးကီၢ်ဆၣ် ဟီၣ်ကဝီၤပူၤ ဖဲ ၁၃-၉-၂၀၂၁ နံၤ သုးမီၤစိရိၤအသုး ခလရ ၂၆၄, ခမရ ၂၀ ပၥ်ဖှိၣ်ထီၣ်အသး ဒီး ပၢၤကီၢ် ဂံၢ်ဘါခဲလၢၥ်ကအိၣ်ဝဲ ၁၇ ဂၤ ဒီး နုၥ်လီၤဝဲဆူ (အင်းကျိုက်ထမင်းရုံ အီပလါကိၤကၢ်) သဝီသ့ၣ်တဖၣ် ဒီး ဃ့ဝဲကရူၢ်တဘ့ၣ် ပှၤသးစၢ် (၃၀) ဂၤန့ၣ်လီၤ. သဝီသ့ၣ်တဖၣ် မ့တဟ့ၣ်လီၤ အပှၤသးစၢ်ဘၣ်န့ၣ် ကမၤကီမၤခဲဝဲ သဝီသ့ၣ်တဖၣ်အံၤန့ၣ်လီၤ.
မုၢ်တြီၢ်ကီၢ်ရ့ၣ်, ဒွဲၣ်လိကီၢ်ဆၣ် အဟီၣ်ကဝီၤပူၤ ဖဲ ၁၄-၉-၂၀၂၁ နံၤ သုးခိးကီၢ်ဆၢ (BGF) သုးရ့ၣ်-၁၀၁၃, သုးရ့ၣ်ခိၣ် စီၤစိနဲၣ် အပှၤ စီၤဃီၤခၠံၣ် လၢအအိၣ်ဝဲဖဲ ဖီထံခုၣ် သုးကလၢၤတဖၣ် တီၢ်ဝဲ လၢၢ်ဒ့သဝီဖိတဂၤ လၢအမံၤမ့ၢ်ဝဲ စီၤကၠဲၣ်အူၣ် ဒီး တီၢ်ဝဲ (၇) ထံၣ် လၢဖီထံခုၣ် သုးကလၢၤပူၤန့ၣ်လီၤ.
ဖဲ ၁၇-၉-၂၀၂၁ နံၤ မဲၤပြံးသုးကလၢၤ သုးခိးကီၢ်ဆၢ (BGF) သုးရ့ၣ်-၁၀၁၄, သုးရ့ၣ်ခိၣ် စီၤမီၣ်ခၠံး အပှၤ ဖါမီၣ်နံၣ် ဒိတီၢ်ဝဲ မဲၤပြံးဒိၣ်သဝီဖိခံဂၤ လၢအမ့ၢ်ဝဲ စီၤအ့ဖ့ၣ် ဒီး နီၣ်မုၣ်အဖါတံၢ် န့ၣ်လီၤ. ဖါမီၣ်နံၣ် ပဲၤအၢပဲၤသီဝဲသဝီဖိခံဂၤအံၤ လၢအမ့ၢ် ကညီတၢ်ထူၣ်ဖျဲး သုးမုၢ်ဒိၣ် အတၢ်မဲၥ်ချံ ဒီး ထိဝဲ စီၤအ့ဖ့ၣ် ခံဆံဃုထံၣ် ထူဝဲအသးနါပှၢ် ဒီး ခီၣ်ဖံးဖးဒိၣ် အထံၣ်တဆံ ဒီး ထိဃုၥ်ဝဲ နီၣ်မုၣ်အဖါတံၢ် ကအိၣ်အထံၣ်ခံဆံ ဃၣ်ဃၣ်န့ၣ်လီၤ. ဖါမီၣ်နံၣ် မၤဒၢၣ်ဝဲသဝီဖိခံဂၤအံၤဝံၤ က့ၤထီၣ်ဝဲဆူ မဲၤပြံးသုးကလၢၤပူၤ ဒီး ဟဲစိၥ်ဝဲ မ့ၣ်ပိၢ် ဒီး ပၥ်လီၤဝဲလၢ စီၤအ့ဖ့ၣ် အဟံၣ်ခီၣ်ထံး န့ၣ်လီၤ. ဖါမီၣ်နံၣ် မၤပိၢ်ထီၣ်စ့ၣ်ကီးဝဲ မ့ၣ်ပိၢ်တဖျၢၣ် လၢမဲၤပြံးဒိၣ်သဝီပူၤ န့ၣ်လီၤ.
ဖဲ ၁၈-၉-၂၀၂၁ နံၤ သုးခိးကီၢ်ဆၢ (BGF-၁၀၁၄) သုးရ့ၣ်ခိၣ် မီၣ်ခၠံး အပှၤ စီၤသးမ့ တီခိၣ်ရိၣ်မဲဝဲ ဒီး ဟးခိးဟုၣ်တၢ်လၢ သူးခံ တၢ်လီၢ်န့ၣ်လီၤ. စီၤသးမ့ ဒီး အပှၤတဖၣ် ဖီၣ်အီၣ်ဝဲ နိၣ်ထၣ်သဝီဖိ နီၢ်ဒါ အဆီအဘ့ၣ်တဆံ ဒီး ဟဲက့ၤလီၤဝဲဆူ ဖီထံခုၣ် နီၢ်ကပီၤဆှံ အကီၣ်ကျိးပူၤ ဒီး ဟံးန့ၢ်ဆူၣ်ကဒီးဝဲ နီၢ်ကပီၤဆှံ အဆီခံဘ့ၣ် န့ၣ်လီၤ. ဖဲ စီၤသးမ့ ဟံးအီၣ်ဆူၣ် ကမျၢၢ်ဖိအဆီအဆၢကတီၢ် တဲလီၤအသး လၢသါမ့ၢ်ဝဲဒၣ် ကညီဒီကလုၥ် တၢ်ထူၣ်ဖျဲးသုးမုၢ်ဒိၣ် န့ၣ်လီၤ.
လီၢ်ကဝီၤ လၢသုးခိးကီၢ်ဆၢ (BGF) ဒီး သုးမီၤစိရိၤအသုး အိၣ်တၢ်အလီၢ်တဖၣ် မၤတၢ်ထီဒါ ကမျၢၢ်ဖိခွဲးယၥ် မၤပျံၤမၤဖုး ကမျၢၢ်အကလုၥ်ကလုၥ်အဃိ ကမျၢၢ်ဖိသ့ၣ်တဖၣ် ဘၣ်အိၣ်လၢ တၢ်ပျံၤတၢ်ဖုးအပူၤ န့ၣ်လီၤ.