Notice
လီၢ်ခၢၣ်သး
တၢ်မၤ၀ဲတၢ်ဘိးဘၣ်ရၤလီၤ ကီၢ်သူလ့ၤ ယူးနံးကိၣ် တၢ်ရဲၣ်တၢ်ကျဲၤအဂ့ၢ်
လါယူၤလံ ၁၀ သီ ၂၀၂၄ နံၣ်, ခ့ၣ်အဲၣ်ယူၣ်-လီၢ်ခၢၣ်သး
ဖဲ ၂၀၂၄ နံၣ် လါယူၤလံ ၁၀ သီအနံၤန့ၣ် ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ရဲၣ်ကျဲၤမၤ၀ဲ တၢ်ဘိးဘၣ်ရၤလီၤဒုးသ့ၣ်ညါ ဘၣ်ထွဲဒီး တၢ်ဒုးအိၣ်ထီၣ်၀ဲ ကီၢ်သူလ့ၤယူးနံးကိၣ် (Kawthoolei Unicode) အဂ့ၢ်အကျိၤန့ၣ်လီၤ.
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ တီခိၣ်ရိၣ်မဲဒီး ရဲၣ်ကျဲၤဒုးအိၣ်ထီၣ်၀ဲ ကီၢ်သူလ့ၤ ယူးနံးကိၣ်အံၤ အတၢ်ပညိၣ်မ့ၢ် ဒ်သိး ၀ဲၤကျိၤ၀ဲၤဒ့တဖၣ်, ကညီတ၀ၢတၢ်ကရၢကရိတဖၣ် ဒီး ကညီကလုၥ်ကဒဲကဒဲ အဘၢၣ်စၢၤ တၢ်ဆဲးကျိးဆဲးကျၢလိၥ်သးလၢအီၣ်လဲ (online) ပူၤ ကသ့ဂ့ၤထီၣ်အဂီၢ် ဒီး တၢ်ဒိလံၥ်လဲၢ်လၢကညီကျိၥ် အက့ၢ်အဂီၤကဒ်သိးလိၥ်သးအဂီၢ် တကးဒံးဘၣ် လၢ အီၣ်လဲအဖီခိၣ် တၢ်စိးကါသူ၀ဲ ကညီကျိၥ်ကသ့ဘၣ်လီၢ်ဘၣ်စးအါထီၣ်အဂီၢ် န့ၣ်လီၤ.
တကးဒံးဘၣ် ကီၢ်သူလ့ၤယူးနံးကိၣ်အံၤ ဖဲတၢ်စိးကါသူ၀ဲ (Artificial Intelligence) လၢတၢ်ဃုတၢ်ဂ့ၢ်တၢ်ကျိၤ ကန့ၢ်အဂီၢ်, တၢ်ဃုန့ၢ်တၢ်ဂ့ၢ်တၢ်ကျိၤ လၢ (Google) ပူၤအဂီၢ်, တၢ်ကျိၥ်ထံ ကလုၥ်ဂၤအကျိၥ်ဆူ ကညီကျိၥ်ကန့ၢ်အဂီၢ် ဒီး ပှၥ်ယဲၤသန့ (Website) အပူၤ တၢ်စိးကါသူ၀ဲ ကညီကျိၥ် ကသ့ကန့ၢ်ဂ့ၤဂ့ၤဘၣ်ဘၣ်အဂီၢ် တၢ်ဒုးအိၣ်ထီၣ်၀ဲ ကီၢ်သူလ့ၤ ယူးနံးကိၣ်အံၤန့ၣ်လီၤ. လၢန့ၣ်အမဲၥ်ညါ လၢတကီၢ်ခါ တၢ်သူ၀ဲ (Computer) အစိၤအံၤ တၢ်သူ၀ဲ ကညီကျိၥ်ကအါထီၣ်အဂီၢ် ဒီး ကညီကျိၥ်အံၤ ကလဲၤထီၣ်လဲၤထီၣ် ဂုၤထီၣ်ပသီထီၣ်အဂီၢ် ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဂုၥ်ကျဲးစၢး ထဲးဂံၢ်ထဲးဘါ၀ဲသပှၢ်ပှၢ် ဒီး ဒ်သိးကလဲၤထီၣ်ဂုၤထီၣ်ပသီထီၣ်ဒိၣ်ထီၣ်အဂီၢ် တၢ်ကဂုၥ်ကျဲးစၢးအီၤ ကွ့ၢ်ကွ့ၢ်န့ၣ်လီၤ.
တကီၢ်ခါခဲအံၤ ကီၢ်သူလ့ၤ ယူးနံးကိၣ်န့ၣ် တၢ်သူအီၤန့ၢ်ဒၣ်ထဲ ကညီစှီၤကျိၥ်တမံၤဧိၤဒံးန့ၣ်လီၤ. ဘၣ်ဆၣ် ခါဆူညါတၢ်ရဲၣ် တၢ်ကျဲၤတၢ်တိၥ်ပၥ်အိၣ်၀ဲဒၣ်လၢ တၢ်ကဒုးအိၣ်ထီၣ်ဒံး၀ဲ ယူးနံးကိၣ် လၢကညီပှိၢ်ကျိၥ်အဂီၢ် ဒ်အမ့ၢ် ပှိၢ်မုၢ်ထီၣ် ဒီး ပှိၢ်မုၢ်နုၥ်ကျိၥ်တဖၣ်န့ၣ်လီၤ.
နမ့ၢ်အဲၣ်ဒိးသ့ၣ်ညါအါထီၣ် ကီၢ်သူလ့ၤယူးနံးကိၣ် အဂ့ၢ်အကျိၤန့ၣ် နုၥ်လီၤဃုဖးလၢ (Link) လၢတၢ်ပၥ်ဖျါလၢတၢ်ဖီလၥ်န့ၣ် သ့၀ဲဒၣ်န့ၣ်လီၤ. တၢ်ဒိလိလံၥ်, တၢ်ဟံးန့ၢ် (Font), တၢ်ဟံးန့ၢ် (Keyboard) ဒီးတၢ်ဆီတလဲလံၥ် (Converter) တဖၣ် နုၥ်လီၤလၢ (Link) ပူၤဒီး (download) န့ၢ်သ့၀ဲ န့ၣ်လီၤ.
တၢ်ဟူးတၢ်ဂဲၤလၢအဘၣ်ထွဲတဖၣ်
