လီၢ်ခၢၣ်သး
တၢ်ကရၢကရိသူၣ်ထီၣ် ဒီးဟ့ၣ်တၢ်သ့ၣ်ညါ တၢ်မၤကမံးတံၥ် တီခိၣ်ရိၣ်မဲ ဒီးရဲၣ်ကျဲၤမၤဝဲ တၢ်သိၣ်လိ (KNU Policy TOT) ဝံၤဝဲအဂ့ၢ်
၂၀၂၄ နံၣ်, လါဖ့ၤဘြူၤအါရံၤ ၂၈ သီ, ခ့ၣ်အဲၣ်ယူၣ်-လီၢ်ခၢၣ်သး
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ထံရူၢ်ကီၢ်သဲးဒီးရိၢ်ဖှိၣ်ကမံးတံၥ်ဖီလၥ် တၢ်ကရၢကရိသူၣ်ထီၣ် ဒီးဟ့ၣ်တၢ်သ့ၣ်ညါတၢ်မၤကမံးတံၥ် တီခိၣ်ရိၣ်မဲဒီးရဲၣ်ကျဲၤမၤဝဲ (KNU Policy TOT) တၢ်မၤလိတခါန့ၣ်လီၤ. တၢ်မၤလိအံၤ အတၢ်ပညိၣ်မ့ၢ်ဒ်သိး လီၢ်ခၢၣ်သး ဒီး ကီၢ်ရ့ၣ်ပူၤဝဲၤကျိၤဝဲၤဒ့ခိၣ်နၢ် ပှၤမၤသကိးတၢ်တဖၣ် ကသ့ၣ်ညါနၢ်ပၢၢ်, ကအိၣ်ဒီးတၢ်နၢ်ပၢၢ်တခါဃီ လၢ ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ အထံရူၢ်ကီၢ်သဲးတၢ်ဂဲၤလိၥ်, ထံရူၢ်ကီၢ်သဲး အတၢ်အိၣ်ဆၢထၢၣ် ဒီး ထံရူၢ်ကီၢ်သဲး အတၢ်ပညိၣ်ကွၢ်စိသ့ၣ်တဖၣ်န့ၣ်လီၤ. (KNU Policy TOT) တၢ်မၤလိတဘျီအံၤ တၢ်မၤအီၤလၢ ၁ လါအတီၢ်ပူၤ, ဒီးဖဲ ၂၀၂၄ နံၣ် လါဖ့ၤဘြူၤအါရံၤ ၂၄ သီအနံၤန့ၣ် တၢ်မၤလိအံၤဝံၤဝဲဒၣ်န့ၣ်လီၤ. တၢ်မၤလိဝံၤဝဲ တဟါဃီ ဖဲဟါလီၤခီ ၃ နၣ်ရံၣ်အဆၢကတီၢ်န့ၣ် တၢ်မၤဝဲတၢ်ပျၢ်ကွံၥ်တၢ်မၤလိအမူးန့ၣ်လီၤ.
တၢ်ပျၢ်ကွံၥ်တၢ်မၤလိမူး တၢ်ရဲၣ်တၢ်ကျဲၤတဘျီအံၤ ပှၤဟံးမူဒါကယၢကယဲမူးတဖၣ် မ့ၢ်ဝဲ သရၣ်စီၤဆၣ်လါမုၢ် ဒီး သရၣ်မုၣ်နီၢ်အဲၣ်ဖီဝါ သ့ၣ်တဖၣ်န့ၣ်လီၤ. တၢ်ရဲၣ်တၢ်ကျဲၤအံၤ ဘၣ်တၢ်တီခိၣ်ရိၣ်မဲအီၤလၢ လီၢ်ခၢၣ်သး ဘၣ်တၢ်တီခိၣ်ရိၣ်မဲအီၤလၢ တၢ်ကရၢကရိသူၣ်ထီၣ် ဒီးဟ့ၣ်တၢ်သ့ၣ်ညါဝဲၤဒ့ ပှၤဘၣ်မူဘၣ်ဒါ တဖၣ်န့ၣ်လီၤ. တၢ်ရဲၣ်တၢ်ကျဲၤအဆၢကတီၢ် ပှၤဘၣ်မူဘၣ်ဒါ ဒီးခိၣ်နၢ်တဖၣ် ဟံးန့ၢ်တၢ်လီၢ်ဝံၤ ပဒိၣ်စီၤလးထိ လၢအမ့ၢ် ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ နဲၣ်ရွဲၣ်ခိၣ်ကျၢၢ်သဃဲၤ (၂), ဒီးတဘျီဃီ မ့ၢ်စ့ၢ်ကီး တၢ်ကရၢကရိသူၣ်ထီၣ်ဒီးဟ့ၣ်တၢ်သ့ၣ်ညါတၢ်မၤကမံးတံၥ်ခိၣ် ကတိၤတူၢ်လိၥ်ဝဲ ခိၣ်နၢ်ပှၤဘၣ်မူဘၣ်ဒါ လၢအဟဲထီၣ်တၢ်ပျၢ်ကွံၥ် တၢ်မၤလိမူးတဘျီအံၤ တဖၣ်န့ၣ်လီၤ.
ဝံၤအလီၢ်ခံ ပှၤလၢအထီၣ်တၢ်မၤလိအကျါတဂၤ လၢအမ့ၢ် သရၣ်စီၤဆၢန့ၢ်စ့ ကတိၤဒုးသ့ၣ်ညါဝဲ တၢ်မၤလိကတီၢ် တၢ်ဂ့ၢ်တၢ်ကျိၤလၢ တၢ်မၤလိမၤဒိးအီၤတဖၣ်, တၢ်ဟူးတၢ်ဂဲၤတဖၣ် ဒ်သိးပှၤဟဲထီၣ်တၢ်မၤလိပျၢ်မူးတဖၣ် ကသ့ၣ်ညါထွဲဝဲအဂီၢ်န့ၣ်လီၤ. ဝံၤဒီး တၢ်ဟ့ၣ်လီၤဝဲ တၢ်မၤလိဝံၤလံၥ်အုၣ်သး ဆူပှၤမၤလိတၢ်ဖိတဖၣ်အအိၣ်န့ၣ်လီၤ. တၢ်ရဲၣ်တၢ်ကျဲၤအပူၤ ခိၣ်နၢ်ဒိၣ်ထီတဖၣ် ဒ်အမ့ၢ် ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ကရၢခိၣ် ပဒိၣ်စီၤကွဲၤထူဝ့ (မ့ၢ်ဝဲထံရူၢ်ကီၢ်သဲးဒီးရိၣ်ဖှိၣ်ကမံးတံၥ်ခိၣ်), လီၢ်ခၢၣ်သးပၢဆှၢတၢ်ကမံးတံၥ် ပဒိၣ်နီၢ်ဒါဒါ, လီၢ်ခၢၣ်သးထီဘိကမံးတံၥ် ပဒိၣ်စီၤသမ့ၣ်ထိ, ကညီဒီကလုၥ်တၢ်ထူၣ်ဖျဲးသုးမုၢ်ဒိၣ် သုးဝဲၤလီၢ်ခိၣ်သ့ၣ် ပၢဆှၢသုးဂ့ၢ်ဝီသဃဲၤ သုးခိၣ်ကျၢၢ်ဖိ မါဖါလိၣ်ဟ့, လီၢ်ခၢၣ်သးပၢဆှၢတၢ်ကမံးတံၥ် ပဒိၣ်စီၤအဲၣ်ကလုၥ်စ့, လီၢ်ခၢၣ်သးထီဘိကမံးတံၥ် ပဒိၣ်စီၤလၢၢ်နၢၣ် (မ့ၢ်စ့ၢ်ကီး လီၢ်ခၢၣ်သးကညီသးစၢ်ကရၢ ကရၢခိၣ်) တဖၣ် ကတိၤဟ့ၣ်ဂံၢ်ဟ့ၣ်ဘါဝဲ တၢ်မၤလိဖိတဖၣ်န့ၣ်လီၤ.
ဝံၤအလီၢ်ခံ တၢ်ကရၢကရိသူၣ်ထီၣ် ဒီးတၢ်ဟ့ၣ်တၢ်သ့ၣ်ညါတၢ်မၤကမံးတံၥ် သရၣ်စီၤဆၣ်လါမုၢ် ကတိၤစံးဘျူးစံးဖှိၣ်က့ၤဝဲ ခိၣ်နၢ်ဒီး ပှၤတၢ်မၤလိဖိတဖၣ်ဝံၤ တၢ်ပျၢ်ကွံၥ်ဝဲ တၢ်မၤလိပျၢ်အမူး တၢ်ရဲၣ်တၢ်ကျဲၤအံၤ လၢကညီဒီကလုၥ်အတၢ်သးဝံၣ် န့ၣ်လီၤ. တၢ်ပျၢ်တၢ်မၤလိမူး တၢ်ရဲၣ်တၢ်ကျဲၤတဘျီအံၤ ပှၤဟဲထီၣ်အိၣ်ဝဲ (၁၀၀) ဘျဲၣ်ဒီး ဖဲတၢ်ရဲၣ်တၢ်ကျဲၤအဆၢကတီၢ် ပှၤထီၣ်တၢ်မၤလိဖိ ဒီး ကညီသးစၢ်ကရၢ ပှၤမၤသကိးတၢ်တဖၣ် သးဝံၣ်ဆၢဂ့ၤဆၢဝါ, ဟ့ၣ်ဂံၢ်ဟ့ၣ်ဘါဝဲ ပှၤလၢအဟဲတဖၣ်န့ၣ်လီၤ.
တၢ်ဟူးတၢ်ဂဲၤလၢအဘၣ်ထွဲတဖၣ်
