လါယနူၤအါရံၤ ၃၁ သီ ၂၀၂၄ နံၣ်, ခ့ၣ်အဲၣ်ယူၣ်-လီၢ်ခၢၣ်သး

ကညီတၢ်ပၢၢ်ဆၢ အိၣ်ဖျဲၣ်ထီၣ်မုၢ်နံၤ ဆၢက့ၤအလီၢ် ၇၅ နံၣ်န့ၣ် ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ချၢၣ်လွံၢ်ထူၣ်ကီၢ်ရ့ၣ် ကီၢ်ရ့ၣ်, ကီၢ်ဆၣ် ဒီး ဒူသဝီ တၢ်လီၢ်အါတီၤ ရဲၣ်ကျဲၤမၤလၤကပီၤဝဲ နံၤအိၣ်ဖျဲၣ်ဆၢက့ၤအမုၢ်နံၤအံၤန့ၣ်လီၤ. တၢ်ရဲၣ်တၢ်ကျဲၤအပူၤ ကီၢ်ရ့ၣ်ခိၣ်နၢ်တဖၣ်, ကီၢ်ဆၣ်ခိၣ်နၢ်, သုးရ့ၣ် သုးက့ ခိၣ်နၢ်တဖၣ် ဃုၥ်ဒီး ထံဖိကီၢ်ဖိကမျၢၢ်တဖၣ် ပၥ်ဖှိၣ်ထီၣ်သး ဒီးမၤလၤကပီၤသကိးဝဲဒၣ်န့ၣ်လီၤ.

တၢ်မၤလၤကပီၤ တၢ်ပၢၢ်ဆၢမုၢ်နံၤ ဆၢက့ၤအလီၢ် ၇၅ နံၣ် တၢ်ရဲၣ်တၢ်ကျဲၤဝံၤအလီၢ်ခံ ဖဲဟါလီၤခီ ၁ နၣ်ရံၣ် ၃၀ မံးနံးအဆၢကတီၢ်န့ၣ် သုးမီၤစိရိၤအသုးတဖၣ် ဟဲခးလီၤတၢ်ဒီးကဘီယူၤဒုးသုး ၂ ဘ့ၣ် လၢလၢၢ်ဒိၣ်ကီၢ်ဆၣ် ကွံလါသဝီ ဒီး ဆီထံးကီၢ်ဆၣ် ထံဝါထၣ်သဝီ တဖၣ်န့ၣ်လီၤ.

သုးမီၤစိရိၤအကဘီယူၤဒုးသုး ဟဲခးလီၤတၢ်တဘျီအံၤ ဟဲဝဲလၢကဘီယူၤ ၂ ဘ့ၣ်, ၁ ဘ့ၣ်န့ၣ် ခးလီၤဝဲကျိဖိ (အီၤလံၣ်ကၢ) ဒီးအဂၤတဘ့ၣ်န့ၣ် တ့ၢ်လီၤဝဲမ့ၣ်ပိၢ် တဖၣ်န့ၣ်လီၤ. မ့ၣ်ပိၢ်လၢအဝဲသ့ၣ်တ့ၢ်လီၤတဖၣ် တၢ်ထံၣ်ဘၣ်ဝဲလၢ အါတက့ၢ်မ့ၢ်ဝဲ မ့ၣ်ပိၣ်လၢအပိၢ်ဖးထီၣ်လၢကလံၤကျါ ဒီးသလၣ်လီၤအသးလၢ တၢ်လီၢ်ဖးလဲၢ် န့ၣ်လီၤ.
လၢကဘီယူၤခးလီၤတၢ်တဘျီအံၤအဃိ ကွံလါသဝီတၢ်ဟ့ၣ်ကသံၣ်ဒၢးဟးဂီၤကွံၥ်ဝဲ တကးဒံးဘၣ် တၢ်ဟ့ၣ်ကသံၣ်ဒၢး အတၢ်အီၣ်မ့ၤလီၢ် ၁ ဖျၢၣ် ဒီး အတၢ်ဟးလီၢ် ၁ ဖျၢၣ် ဟးဂီၤကွံၥ်ဝဲန့ၣ်လီၤ. ဒ်န့ၣ်အသိး လၢထံဝါထၣ်သဝီန့ၣ် ဟံၣ်ဟးဂီၤဝဲ (၂) ဖျၢၣ်ဒီးဘၣ်သံဝဲထိးတဒု န့ၣ်လီၤ.