တၢ်မၤလၤကပီၤ ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ မုၢ်နံၤဆၢက့ၤအလီၢ် (၇၇) ဝီတဝီ ဖဲခ့ၣ်အဲၣ်ယူၣ် လီၢ်ခၢၣ်သး ဝဲၤလီၢ်ခိၣ်သ့ၣ်

၂၀၂၄ နံၣ်, လါဖ့ၤဘြူၤအါရံၤ ၅ သီ, ခ့ၣ်အဲၣ်ယူၣ်-လီၢ်ခၢၣ်သး

၂၀၂၄ နံၣ် လါဖ့ၤဘြူၤအါရံၤ ၅ သီအနံၤန့ၣ် မ့ၢ်ဝဲ ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ အိၣ်ဖျဲၣ်ထီၣ်ဆၢက့ၤအလီၢ် (၇၇) နံၣ်အနံၤန့ၣ်လီၤ. ခ့ၣ်အဲၣ်ယူၣ် နံၣ်အိၣ်ဖျဲၣ်ဆၢက့ၤအလီၢ် (၇၇) နံၣ်အမုၢ်နံၤအံၤ တၢ်မၤဝဲ တၢ်မၤလၤကပီၤအမူး ဖဲခ့ၣ်အဲၣ်ယူၣ်လီၢ်ခၢၣ်သးန့ၣ်လီၤ. လၢမၤလၤကပီၤမူး တၢ်ရဲၣ်တၢ်ကျဲၤတဘျီအံၤ ပှၤလၢဟံးမူဒါ ကယၢကယဲမူးန့ၣ် မ့ၢ်ဝဲ သရၣ်မုၣ် နီၢ်အဲၣ်ဖီဝါ ဒီးသရၣ်မုၣ် နီၢ်ဆှံမူ သ့ၣ်တဖၣ်န့ၣ်လီၤ.

တၢ်မၤလၤကပီၤအမူးတဘျီအံၤန့ၣ် တၢ်စးထီၣ်အီၤလၢ တၢ်ဟ့ၣ်ထီၣ်တၢ်ယူးယီၣ်ဆူ ကညီဒီကလုၥ်နီၣ်တယၢ်ဝံၤ လီၢ်ခၢၣ်သးထီဘိကမံးတံၥ် ပဒိၣ်စီၤကျၢၤစ့ ကတိၤအိးထီၣ် မူးအတၢ်ရဲၣ်တၢ်ကျဲၤန့ၣ်လီၤ. ဝံၤအလီၢ်ခံ ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ကရၢခိၣ် ပဒိၣ်စီၤကွဲၤထူဝ့ ကတိၤဟ့ၣ်ဂံၢ်ဟ့ၣ်ဘါဝဲခိၣ်နၢ်, သိၣ်ဒူဒီး ကမျၢၢ်ထံဖိကီၢ်ဖိတဖၣ် ဒ်န့ၣ်အသိး ကညီဒီကလုၥ်စၢဖှိၣ်ကရၢ အိၣ်ထီၣ်အဂ့ၢ် အတၢ်စံၣ်စိၤတဲစိၤတဖၣ် သရၣ်စီၤဆၣ်လါမုၢ် ဖးဖျါထီၣ်ဝဲဒၣ်န့ၣ်လီၤ.

လၢန့ၣ်အမဲညါ ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ လီၢ်ခၢၣ်သးပၢဆှၢတၢ်ကမံးတံၥ် ပဒိၣ်နီၢ်ဒါဒါ, ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ လီၢ်ခၢၣ်သးထီဘိကမံးတံၥ် ပဒိၣ်စီၤသမ့ၣ်ထိ, ကညီဒီကလုၥ်တၢ်ထူၣ်ဖျဲးသုးမုၢ်ဒိၣ် သုးဝဲၤလီၢ်ခိၣ်သ့ၣ် သုးခိၣ်ဒိၣ်ဂီၢ်ဂ့ၢ် စီၤအီၣ်စံၣ်, ကညီသးစၢ်ကရၢ စီၤအိၣ်ကၤ ဒီး ကညီပိၥ်မုၣ်ကရၢ နီၢ်ခၠ့ၣ်ကလၤစိ သ့ၣ်တဖၣ် ကတိၤဟ့ၣ်ဂံၢ်ဟ့ၣ်ဘါတၢ် လၢမူးတၢ်ရဲၣ်တၢ်ကျဲၤတဘျီအံၤန့ၣ်လီၤ. တၢ်ကတိၤဟ့ၣ်ဂံၢ်ဟ့ၣ်ဘါ တၢ်ရဲၣ်လီၤကျဲၤလီၤ ဝံၤအလီၢ်ခံ တၢ်ဖးဖျါထီၣ်ဝဲ လံၥ်ဟ့ၣ်ယုၢ်တဖၣ်ဝံၤ တၢ်ပျၢ်ကွံၥ်မူးအတၢ်ရဲၣ်တၢ်ကျဲၤအံၤလၢ ကညီဒီကလုၥ်အတၢ်သးဝံၣ်န့ၣ်လီၤ.

တၢ်မၤလၤကပီၤ မူးအတၢ်ရဲၣ်တၢ်ကျဲၤအဆၢကတီၢ် (ကရင်အနုသုခုမအသင်း-KAA) စ့ၢ်ကီး ဟ့ၣ်တၢ်အတၢ်ဆၢဂ့ၤဆၢဝါ ခီဖျိတၢ်သူၣ်ဝံၣ်သးဆၢ တဖၣ်န့ၣ်လီၤ. မူးအံၤပှၤဟဲထီၣ်ဝဲ (၁၅၀) ဘျဲၣ်ဂၤန့ၣ်လီၤ.