လါယနူၤအါရံၤ ၂၂ သီ ၂၀၂၄ နံၣ်, ခ့ၣ်အဲၣ်ယူၣ်-လီၢ်ခၢၣ်သး

ဖဲ ၂၀၂၄ နံၣ် လါယနူၤအါရံၤ ၂၂ သီအနံၤ ဂီၤခီ (၈) နၣ်ရံၣ်အဆၢကတီၢ်န့ၣ် ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ လီၢ်ခၢၣ်သး ရဲၣ်ကျဲၤမၤဝဲ (၉) ဝီတဝီ တၢ်သူၣ်ထီၣ်စၢၤသွဲၣ်သီခိၣ်နၢ်တၢ်မၤလိကၠိ ကၠိပျၢ်အမူး အတၢ်ရဲၣ်တၢ်ကျဲၤန့ၣ်လီၤ. တၢ်ပျၢ်ကၠိမူးတၢ်ရဲၣ်တၢ်ကျဲၤအံၤ ဘၣ်တၢ်မၤအီၤဖဲ ခ့ၣ်အဲၣ်ယူၣ် လီၢ်ခၢၣ်သးဝဲၤလီၢ်ခိၣ်သ့ၣ် န့ၣ်လီၤ.

တၢ်သူၣ်ထီၣ်စၢၤသွဲၣ်သီ ခိၣ်နၢ်တၢ်မၤလိကၠိအံၤ တၢ်ပၥ်ပနီၣ်အိၣ်ဝဲဒၣ်လၢ ကီၢ်ရ့ၣ်သုးက့တဘ့ၣ်စုၥ်စုၥ် ကဘၣ်ဆှၢထီၣ်အပှၤကၠိဖိ ၅ ဂၤန့ၣ်လီၤ. ဒ်န့ၣ်အသိး ကညီသးစၢ်ကရၢ, ကညီပိၥ်မုၣ်ကရၢ, ကညီဒီကလုၥ် တၢ်ထူၣ်ဖျဲးသုးမုၢ်ဒိၣ်, ခ့ၣ်အဲၣ်ယူၣ်-လီၢ်ခၢၣ်သး စ့ၢ်ကီး ကဘၣ်ဆှၢထီၣ်အပှၤကၠိဖိ လၢကထီၣ်မၤလိသ့အသးလၢကၠိအံၤန့ၣ်လီၤ. တၢ်ကဘၣ်ဆှၢထီၣ်ကၠိဖိတဖၣ် ဒ်တၢ်ပၥ်ပနီၣ်အသးနံၣ်, အက့ၢ်အစီ တၢ်ပၥ်ပနီၣ်အသိးန့ၣ်လီၤ. လၢကၠိအံၤအပူၤ တၢ်သိၣ်လိကၠိဖိသ့ၣ်တဖၣ် လၢထံရူၢ်ကီၢ်သဲးဂ့ၢ်ဝီ, သုးဂ့ၢ်ဝီ, ကညီတၢ်စံၣ်စိၤတဲစိၤ ဒီး တၢ်မၤလိအဂုၥ်အဂၤအါမးန့ၣ်လီၤ. ကၠိဖိလၢအစံၣ်လီၤကၠိခဲအံၤတဖၣ် ဒ်တၢ်ပၥ်ပနီၣ်တၢ်ထီၣ်ကၠိအနၣ်ရံၣ်အိၣ်ဝဲအသိး မၤလိဘၣ်ဝဲပှဲၤပှဲၤလံအဃိ တၢ်မၤက့ၤဝဲတၢ်ပျၢ်ကၠိ အတၢ်ရဲၣ်တၢ်ကျဲၤန့ၣ်လီၤ.

လၢတၢ်မၤလိပျၢ်အမူးတဘျီအံၤ ပှၤလၢအကယၢကယဲမူးမ့ၢ်ဝဲ သရၣ်မုၣ်နီၢ်ဖီဂ့ၤခုၣ် ဒီး သရၣ်စီၤစူၣ်ခဲၣ် တဖၣ်န့ၣ်လီၤ. တချုးတၢ်ရဲၣ်တၢ်ကျဲၤ စးထီၣ်ဒံးဘၣ်န့ၣ် ကညီဒီကလုၥ်တၢ်ထူၣ်ဖျဲးသုးမုၢ်ဒိၣ် သုးဝဲၤလီၢ်ခိၣ်သ့ၣ် သုးခိၣ်စိ စီၤယဲဘိၤ ဟ့ၣ်တၢ်ကလုၢ်လၢ တၢ်ကဟ့ၣ်ထီၣ်တၢ်ယူးယီၣ်ဆူ ကညီဒီကလုၥ်အနီၣ်တယၢ် န့ၣ်လီၤ.


ဝံၤအလီၢ်ခံ မူးတၢ်ရဲၣ်တၢ်ကျဲၤ အပှၤပၢၤလီၢ်ဆ့ၣ်နီၤ, ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ နဲၣ်ရွဲၣ်ခိၣ်ကျၢၢ်သဃဲၤ (၂) ပဒိၣ်စီၤလးထိ ကတိၤအိးထီၣ်ဝဲမူးဝံၤ တၢ်ဟ့ၣ်လီၤဝဲ ဖျိကၠိအလံၥ်အုၣ်သးဆူ စၢၤသွဲၣ်သီခိၣ်နၢ်ကၠိဖိလၢအဖျိထီၣ်ကၠိတဖၣ်န့ၣ်လီၤ.

လၢတၢ်ပျၢ်ကၠိမူးအတၢ်ရဲၣ်တၢ်ကျဲၤတဘျီအံၤ ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ခိၣ်နၢ်တဖၣ် ဒ်အမ့ၢ် ကရၢခိၣ် ပဒိၣ်စီၤကွဲၤထူဝ့, လီၢ်ခၢၣ်သးပၢဆှၢတၢ်ကမံးတံၥ် ပဒိၣ်နီၢ်ဒါဒါ, လီၢ်ခၢၣ်သးထီဘိကမံးတံၥ် ပဒိၣ်စီၤကျၢၤစ့, ပဒိၣ်မါခဲနဒံၣ်, ပဒိၣ်စီၤသမ့ၣ်ထိ ဒီး သုးဝဲၤလီၢ်ခိၣ်သ့ၣ် သုးခိၣ်သုးနၢ် လၢအမ့ၢ် သုးခိၣ်ကျၢၢ်ဖိ စီၤတၢ်မျၢ်သီ, သုးခိၣ်ကျၢၢ်ဖိ စီၤဖီဒိၣ် တဖၣ် ကတိၤဟ့ၣ်ဂံၢ်ဟ့ၣ်ဘါဝဲ ကၠိဖိလၢအဖျိထီၣ်ကၠိတဖၣ် န့ၣ်လီၤ.

ကၠိပျၢ်အမူးတၢ်ရဲၣ်တၢ်ကျဲၤအံၤ တၢ်စးထီၣ်မၤအီၤဖဲ ဂီၤခီ ၈ နၣ်ရံၣ် ဒီး ဖဲမုၢ်ဆူၣ် ၁၂ နၣ်ရံၣ်န့ၣ် မူးအတၢ်ရဲၣ်တၢ်ကျဲၤဝံၤဝဲဒၣ်ဂ့ၤဂ့ၤဘၣ်ဘၣ်န့ၣ်လီၤ.