လါယနူၤအါရံၤ ၇ သီ, ၂၀၂၄ နံၣ်, ခ့ၣ်အဲၣ်ယူၣ်-လီၢ်ခၢၣ်သး

ကညီဒီကလုၥ် တၢ်ထူၣ်ဖျဲးသုးမုၢ်ဒိၣ် သုးဝဲၤလီၢ်ခိၣ်သ့ၣ် ကသံၣ်ဝဲၤဒ့ ဒီး (BPHWT)  ထၢၣ်၀ံချၢဆူၣ်ချ့ကရူၢ်တဖၣ် ပၥ်ဖှိၣ်မၤသကိးတၢ် ဒီးရဲၣ်ကျဲၤအိးထီၣ်ဝဲ ၂ ၀ီတဝီ (Medic) တၢ်မၤလိအံၤ ဖဲ ၂၀၂၄ နံၣ် လါယနူၤအါရံၤ ၆ သီအနံၤန့ၣ် တၢ်မၤလိအံၤ ဝံၤဝဲဂ့ၤဂ့ၤဘၣ်ဘၣ်အဃိ တၢ်ရဲၣ်ကျဲၤမၤဝဲ တၢ်မၤလိပျၢ်အမူး ဖဲကညီဒီကလုၥ် တၢ်ထူၣ်ဖျဲးသုးမုၢ်ဒိၣ် သုးဝဲၤလီၢ်ခိၣ်သ့ၣ် န့ၣ်လီၤ.

လၢတၢ်မၤလိပျၢ်အမူးဘျီဝဲအံၤ ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ပၢပြးခိၣ်နၢ်တဖၣ်, သုးမုၢ်ဒိၣ် သုးခိၣ်သုးနၢ် ဒီးသုးဖိတဖၣ်, ကရ့ၣ်နံၣ် တၢ်ဃူတၢ်ဖိးကရူၢ် (KNSO) အခိၣ်အနၢ်တဖၣ်, ကၠိဖိသုးမုၢ်ဒိၣ် (ABSDF) သုးခိၣ်သုးနၢ် ဒီးသုးဖိတဖၣ်, (NGLP) စၢၤသွဲၣ်သီကၠိတဖိတဖၣ် ဟဲထီၣ်ဝဲလၢ မူးတၢ်ရဲၣ်တၢ်ကျဲၤအံၤန့ၣ်လီၤ. ဒီၣ်ကထၢၣ်ကိၤကိၤနဲၣ် ကတိၤအိးထီၣ်ဝဲ တၢ်မၤလိပျၢ်အမူး တၢ်ရဲၣ်တၢ်ကျဲၤဝံၤ ဒ်မူးတၢ်ရဲၣ်တၢ်ကျဲၤအိၣ်အသိး တၢ်လဲၤအီၤတဆီဘၣ်တဆီန့ၣ်လီၤ.

၂ ၀ီတဝီ (Medic) ကသံၣ်တၢ်မၤလိတဘျီအံၤ ကၠိဖိခဲလၢၥ် ဖျိထီၣ်ဝဲအဂၤ (၄၀) ဒီး ဖဲန့ၣ်အကျါ ပိၥ်ခွါပၣ်ဝဲ ၁၈ ဂၤ ဒီး ပိၥ်မုၣ်ပၣ်ဝဲ ၂၂ ဂၤန့ၣ်လီၤ. တၢ်ဟ့ၣ်လီၤဝဲ တၢ်မၤလိဖိသ့ၣ်တဖၣ် ဖျိကၠိအလံၥ်အုၣ်သး ဖဲမူးအပူၤအံၤန့ၣ်လီၤ.

လၢတၢ်မၤလိပျၢ်အမူးတဘျီအံၤ ခိၣ်နၢ်ဒိၣ်ထီတဖၣ် ဒ်အမ့ၢ် ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ နဲၣ်ရွဲၣ်ခိၣ်ကျၢၢ်သဃဲၤ (၂) ပဒိၣ်စီၤလးထိ, ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဆူၣ်ချ့မၤစၢၤဝဲၤကျိၤခိၣ် ပဒိၣ်စီၤဒဲမၢၣ်ခ့ၣ်, ကညီဒီကလုၥ်တၢ်ထူၣ်ဖျဲးသုးမုၢ်ဒိၣ် သုးဝဲၤလီၢ်ခိၣ်သ့ၣ် သုးဂ့ၢ်ဝီခိၣ်သဃဲၤ သုးခိၣ်ကျၢၢ်ဖိ မါဖါလိးဟ့, ကညီဒီကလုၥ် တၢ်ထူၣ်ဖျဲးသုးမုၢ်ဒိၣ် သုးဝဲၤလီၢ်ခိၣ်သ့ၣ် ကသ့ၣ်ဝဲၤဒ့ခိၣ် သုးခိၣ်ဒိၣ်စိ နီၢ်စ့ဒ့ကဲ, ကညီဒီကလုၥ်တၢ်ထူၣ်ဖျဲးသုးမုၢ်ဒိၣ် သုးက့နီၣ်ဂံၢ် (၇) သုးကသံၣ်ဝဲၤဒ့ခိၣ် သုးခိၣ်စိ စီၤအဲၣ်မှံၤ, ကရ့ၣ်နံၤတၢ်ဃူတၢ်ဖိးကရူၢ် (KNSO) စီၤမူလၤ တဖၣ် ဟဲထီၣ်မၤလၤကပီၤ ကတိၤဟ့ၣ်ဂံၢ်ဟ့ၣ်ဘါ ကၠိဖိမုၣ်ခွါ လၢအဖျိထီၣ်တၢ်မၤလိ တဖၣ်န့ၣ်လီၤ.