လီၢ်ခၢၣ်သး
ကညီသးစၢ်တဖၣ် တီခိၣ်ရိၣ်မဲ ဒီးရဲၣ်ကျဲၤမၤဝဲ ကညီသးစၢ် တၢ်ထံၣ်လိၥ်တၢၣ်ပီၣ်တဲသကိး အမူး
လါဒံၣ်စ့ဘၢၣ် ၅ သီ ၂၀၂၃ နံၣ်, ခ့ၣ်အဲၣ်ယူၣ်-လီၢ်ခၢၣ်သး
ကညီသးစၢ်သ့ၣ်တဖၣ် တီခိၣ်ရိၣ်မဲ ဒီးရဲၣ်ကျဲၤမၤဝဲ ကညီသးစၢ် တၢ်ထံၣ်လိၥ်တၢၣ်ပီၣ်တဲသကိး တကတီၢ် ဖဲ ၂၀၂၃ နံၣ် လါနိၣ်ဝ့ဘၢၣ် ၂၉ သီ တုၤ လါဒံၣ်စ့ဘၢၣ် ၁ သီအနံၤ လၢ ၃ သီ အတီၢ်ပူၤန့ၣ်လီၤ. ကညီသးစၢ် တၢ်ထံၣ်လိၥ်တၢၣ်ပီၣ်တဲသကိးအမူးအံၤ တၢ်မၤအီၤဖဲ ကညီဒီကလုၥ်ဂၢၤသး အဝဲၤလီၢ်ခိၣ်သ့ၣ် မုၣ်အ့ပူၤ တၢ်လီၢ်န့ၣ်လီၤ.
လၢသးစၢ်တၢ်ထံၣ်လိၥ်တၢၣ်ပီၣ်တဲသကိးအမူးတဘျီအံၤ ကညီသးစၢ်ကရၢ (KYO) ခိၣ်နၢ်တဖၣ် ဃုၥ်ဒီး ကညီသးစၢ် တၢ်ကရၢကရိ အဂၤတဖၣ် ခဲလၢၥ် ဟဲထီၣ်ဝဲ (၁၄) ဖု ဒီး ပှၤနီၣ်ဂံၢ်ခဲလၢၥ်အိၣ်ဝဲ ၈၅ ဂၤန့ၣ်လီၤ. ဒ်န့ၣ်အသိး ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ခိၣ်နၢ်တဖၣ် ဒ်အမ့ၢ် နဲၣ်ရွဲၣ်ခိၣ်ကျၢၢ်သဃဲၤ (၂) ပဒိၣ်စီၤလးထိ, လီၢ်ခၢၣ်သးထီဘိကမံးတံၥ် ပဒိၣ်စီၤကျၢၤစ့, လီၢ်ခၢၣ်သး ပၢဆှၢတၢ်ကမံးတံၥ် ပဒိၣ်စီၤအဲၣ်ကလုၥ်စ့, လီၢ်ခၢၣ်သးထီဘိကမံးတံၥ် ပဒိၣ် စီၤပိၣ်ပိၣ်ထူအီၣ်, ကညီဒီကလုၥ် တၢ်ထူၣ်ဖျဲးသုးမုၢ်ဒိၣ် သုးရိၣ်မဲခိၣ်ကျၢၢ်-၂ သုးခိၣ်ကျၢၢ်စိ စီၤဘီကၠီၣ်ဟဲ ဒီး ကညီဒီကလုၥ်ဂၢၤသးသုးမုၢ်ဒိၣ် သုးခိၣ်ကျၢၢ်ဖိ စီၤရှံလ့ၣ် တဖၣ် ဟဲထီၣ်ဝဲဒၣ်စ့ၢ်ကီးန့ၣ်လီၤ.
လၢတၢ်ထံၣ်လိၥ်တၢၣ်ပီၣ်တဲသကိး ၃ သီ အတီၢ်ပူၤအံၤ ကညီသးစၢ် တၢ်ကရၢကရိ ခၢၣ်စး လၢအဟဲထီၣ်တဖၣ် ပၥ်ဖျါထီၣ်ဝဲ အဝဲသ့ၣ် အတၢ်ကရၢကရိ တၢ်ဖံးတၢ်မၤ လၢမၤဝဲတဖၣ်, လၢ ၁၀ နံၣ်အတီၢ်ပူၤ ကညီသးစၢ် အတၢ်ဟူးတၢ်ဂဲၤ လၢတၢ်မၤတ့ၢ်အီၤတဖၣ် တၢ်ပှဲၢ်ထံသမံသမိး တၢၣ်ပီၣ်တဲသကိး ဒီး ဟ့ၣ်ကူၣ်ဟ့ၣ်ဖးသကိး, တၢ်ပဲၥ်ထံနီၤဖး တကီၢ်ခါထံရူၢ်ကီၢ်သဲးတၢ်အိၣ်သး ဒီး ခါဆူညါ ဒ်သိးကညီသးစၢ်တဖၣ် တၢ်ပၥ်ဖှိၣ်မၤသကိးတၢ် ကအိၣ်အါထီၣ်အဂီၢ် တၢ်တၢၣ်ပီၣ်တဲသကိး ဒီး ပၥ်လီၤဝဲ တၢ်ဖံးတၢ်မၤတၢ်နဲၣ်ကျဲ သ့ၣ်တဖၣ်န့ၣ်လီၤ.
တၢ်ဟူးတၢ်ဂဲၤလၢအဘၣ်ထွဲတဖၣ်
