ဖဲလါနိၣ်ဝ့ဘၢၣ် ၂၇ သီ ၂၀၂၃ နံၣ် လါနီလါပှဲၤ (တန်ဆေၥင်မုန်းလပြည့်) အနၤန့ၣ် တၢ်ရဲၣ်ကျဲၤမၤဝဲ တၢ်ဒွဲၣ်ပနဲထူၣ်ကဖၣ်သၣ်ကမဲၤ (တန်ဆေၥင်တိုင် မီးထွန်းဆုတေၥင်းပွဲ) အတၢ်ရဲၣ်တၢ်ကျဲၤ ဖဲ ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ လီၢ်ခၢၣ်သး ဝဲၤလီၢ်ခိၣ်သ့ၣ် မဲးဝါးကျိ တၢ်လီၢ်န့ၣ်လီၤ.

တၢ်ဒွဲၣ်ပနဲထူကဖၣ်သၣ်ကမဲၤ တၢ်ရဲၣ်တၢ်ကျဲၤအံၤ သရၣ်စီၤဆၣ်လါမုၢ် ဒီး သရၣ်မုၣ်နီၣ်ဘွ့ၣ်ပစီၤသီ သ့ၣ်တဖၣ် ဟံးမူဒါ ဒ်ပှၤကယၢကယဲမူးတဖၣ်အသိး ဒီး ခိၣ်နၢ်, ကၠိဖိ, သးစၢ် ဒီး ဒူဖိသဝီဖိတဖၣ် ခဲလၢၥ် (၂၅၀) ဘျဲၣ် ဟဲဝဲဒၣ်လၢ တၢ်ရဲၣ်တၢ်ကျဲၤတဘျီအံၤန့ၣ်လီၤ.

တၢ်ဒွဲၣ်ပနဲ ထူကဖၣ်သၣ်ကမဲၤမူး တၢ်ရဲၣ်တၢ်ကျဲၤအံၤ တၢ်မၤအီၤအတၢ်ပညိၣ် ဒီး တၢ်ကတိၤအိးထီၣ်န့ၣ် ဘၣ်တၢ်တဲဖျါထီၣ်အီၤလၢ ခ့ၣ်အဲၣ်ယူၣ်-ကညီ ဒီကလုၥ်စၢဖှိၣ်ကရၢ နဲၣ်ရွဲၣ်ခိၣ်ကျၢၢ်သဃဲၤ (၂) ပဒိၣ်စီၤလးထိ န့ၣ်လီၤ. တၢ်ရဲၣ်တၢ်ကျဲၤအံၤအပူၤ ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ခိၣ်နၢ်တဖၣ် ဒ်အမ့ၢ် နဲၣ်ရွဲၣ်ခိၣ်ကျၢၢ်သဃဲၤ (၁) ပဒိၣ်စီၤသီသံၣ်ဘှဲ, ဝံစိၥ်တီဆှၢဒီးတၢ်ဆဲးကျိးကျဲဝဲၤကျိၤခိၣ် ပဒိၣ်စီၤကျၢၤစ့, ကညီဒီကလုၥ် တၢ်ထူၣ်ဖျဲးသုးမုၢ်ဒိၣ် သုးဝဲၤလီၢ်ခိၣ် သ့ၣ် သုးဂ့ၢ်ဝီခိၣ်သဃဲၤ သုးခိၣ်ကျၢၢ်ဖိ စဖါလိၣ်ဟ့ ဒီး ကညီဒီကလုၥ် စၢဖှိၣ်ကရၢ လီၢ်ခၢၣ်သးထီဘိကမံးတံၥ် လၢအမ့ၢ်စ့ၢ်ကီး ကညီသးစၢ်ကရၢ လီၢ်ခၢၣ်သး ကရၢခိၣ် ပဒိၣ်စီၤလၢၢ်နၢၣ် တဖၣ် ကတိၤဟ့ၣ်ဂံၢ်ဟ့ၣ်ဘါဝဲ သူၣ်ဘီၣ်သးစၢ် ဒီးကမျၢၢ်လၢ အဟဲထီၣ်လၢ တၢ်ရဲၣ်တၢ်ကျဲၤဘျီဝဲအံၤအပူၤန့ၣ်လီၤ.

ဝံၤအလီၢ်ခံ စၢၤသွဲၣ်သီကၠိဖိ ဒီး ကညီသးစၢ်ကရၢ (KYO) သးစၢ်တဖၣ် မၤဝဲတၢ်သူၣ်ဝံၣ်သးဆၢအမူး ဝံၤတၢ်မၤဝဲ တၢ်ဒွဲၣ်ထီၣ်ပနဲ ဒီးတၢ်ထူကဖၣ်သၣ်ကမဲၤ အတၢ်ရဲၣ်တၢ်ကျဲၤန့ၣ်လီၤ. ဝံၤအလီၢ်ခံ ဒ်သိးသးစၢ်တဖၣ် တၢ်ရ့လိၥ်မုၣ်လိၥ်သး ကအိၣ်အါထီၣ်အဂီၢ် ကညီသးစၢ်ကရၢ နဲၣ်ရွဲၣ်သဃဲၤ (၂) သရၣ်စီၤအဲၣ် ထံကီၢ် တီခိၣ်ရိၣ်မဲဒီး ရဲၣ်ကျဲၤမၤဝဲ သးစၢ်တၢ်ရ့လိၥ်မုၥ်လိၥ် အတၢ်ရဲၣ်တၢ်ကျဲၤန့ၣ်လီၤ.