ကီၢ်သူလ့ၤတၢ်ပၢတၢ်ပြးအဟီၣ်ကဝီၤပူၤ ဒ်သိးတၢ်ပၢတၢ်ပြးဒီးတၢ်တီခိၣ်ရိၣ်မဲ တၢ်ဖံးတၢ်မၤတဖၣ် ကလဲၤသးဘၣ်ဂ့ၢ်ဘၣ်ဝီ ဂ့ၤဒိၣ်ထီၣ်အဂီၢ် ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ကီၢ်ရ့ၣ် ဒီး ကီၢ်ဆၣ်ပတီၢ် ခိၣ်နၢ်တဖၣ် တၢ်မၤန့ၢ်အဝဲသ့ၣ် လၢတၢ်မၤဂ့ၤထီၣ်ကံၢ်စီ တၢ်မၤလိတခါ ဖဲ ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ လီၢ်ခၢၣ်သး ကျိၣ်ယီၤလ့န့ၣ်လီၤ. တၢ်မၤလိအံၤ တၢ်စးထီၣ်မၤအီၤဖဲ ၂၀၂၃ နံၣ် လါအီးကထိဘၢၣ် ၃၀ သီတုၤ လါနိၣ်ဝ့ဘၢၣ် ၁၁ သီ, တၢ်မၤလိယံၥ်ဝဲ ၂ နွံန့ၣ်လီၤ. တၢ်မၤလိအံၤအပူၤ ကလံၤစိးကီၢ်ရ့ၣ် ၄ ဘ့ၣ် လၢအမ့ၢ်ဝဲ ဒူသထူၣ်ကီၢ်ရ့ၣ်, ဒူပျၥ်ယၥ်ကီၢ်ရ့ၣ်, ဖၣ်အၣ်ကီၢ်ရ့ၣ် ဒီး ဘျံးဒဝဲၢ်ကီၢ်ရ့ၣ် ခိၣ်နၢ်ခၢၣ်သးသ့ၣ်တဖၣ် ခဲလၢၥ်ဟဲထီၣ်ဝဲ (၄၀) ဂၤန့ၣ်လီၤ.

တၢ်မၤလိအံၤ ဘၣ်တၢ်တီခိၣ်ရိၣ်မဲ ရဲၣ်ကျဲၤအီၤလၢ တၢ်မၤလဲၤထီၣ်လဲၤထီ တၢ်ပၢတၢ်ပြးအကံၢ်အစီ တၢ်မၤကမံးတံၥ် လၢဘၣ်တၢ်ကရၢကရိထီၣ်အီၤဖဲ ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ လီၢ်ခၢၣ်သးခီကရဲး (၁၇) ဝီတဝီ၀ံၤအလီၢ်ခံန့ၣ်လီၤ. ကမံးတံၥ်အံၤ တီခိၣ်ရိၣ်မဲဝဲ ဒီး School of Governance and Public Administration (SGPA) အခိၣ်အနၢ် ပှၤသ့ပှၤဘၣ်တဖၣ် ပၥ်ဖှိၣ်မၤသကိးတၢ်ဒီး ရဲၣ်ကျဲၤဝဲ တၢ်မၤလိအံၤန့ၣ်လီၤ. ဘၣ်ထွဲဒီးတၢ်မၤလိအံၤအဖီခိၣ် ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ကရၢခိၣ် ပဒိၣ်စီၤကွဲၤထူဝ့ စံးဝဲဒၣ်လၢ "ပကညီတၢ်ပၢၢ်ဆၢ အတၢ်ပညိၣ်န့ၣ် မ့ၢ်ဒ်သိး ပကညီကလုၥ်ကဒိးန့ၢ်ဘၣ်က့ၤ တၢ်ပၢလီၤသးခွဲးယၥ် အဂီၢ်န့ၣ်လီၤ. အဃိ ပနီၢ်ကစၢ်ဒၣ်ဝဲန့ၣ် ပမ့ၢ်အိၣ်ဒီး တၢ်ပၢတၢ်ပြးအကံၢ်အစီမးဒီး ပကစံၣ်ညီတီနံက့ၤ ပထံရူၢ်ကီၢ်သဲးအဘူၣ်အတီ, ပှၤဂံၢ်ဝီတၢ်ခွဲးတၢ်ယၥ်, ဒီးမုၢ်ကျိၤဝဲၤကွၥ်တၢ်ဖံးတၢ်မၤတဖၣ် ကသ့ဝဲဒၣ်န့ၣ်လီၤ."

တၢ်မၤဝဲ တၢ်ပျၢ်ကွံၥ်တၢ်မၤလိအမူး ဖဲ ၂၀၂၃ နံၣ် လါနိၣ်ဝ့ဘၢၣ် ၁၁ သီဟါခီအဆၢကတီၢ်န့ၣ်လီၤ. ဖဲတၢ်မၤဝဲတၢ်မၤလိပျၢ်အမူးအဆၢကတီၢ် တၢ်မၤလဲၤ ထီၣ်လဲၤထီ တၢ်ပၢတၢ်ပြးအကံၢ်အစီ တၢ်မၤကတံးတံၥ် ပှၤပၢၤလီၢ်ဆ့ၣ်နီၤ ပဒိၣ်စီၤလးထိ စံးဝဲဒၣ်လၢ "တၢ်မၤလိဒ်အံၤတကလုၥ်အံၤ ဒ်သိးကီၢ်ရ့ၣ်ဒီးကီၢ်ဆၣ် ပှၤပၢတၢ်သ့ၣ်တဖၣ် ကိးဂၤကထီၣ်မၤလိဘၣ်ဝဲအဂီၢ် ခါဆူညါတၢ်ကဆဲးရဲၣ်ကျဲၤမၤဒံးဝဲ တၢ်မၤလိအံၤန့ၣ်လီၤ."