ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ လီၢ်ခၢၣ်သး တၢ်ဟ့ၣ်တၢ်သ့ၣ်ညါဒီးသူၣ်ထီၣ်ဆီလီၤဝဲၤဒ့ တၢ်မၤကမံးတံၥ်တဖၣ် တီခိၣ်ရိၣ်မဲဒီး ရဲၣ်ကျဲၤမၤဝဲ တၢ်မၤလိ လၢကီၢ်ရ့ၣ်ပၢၤကီၢ်သုးခိၣ်သုးနၢ်တဖၣ်အဂီၢ် တကတီၢ် ဖဲလါနိၣ်ဝ့ဘၢၣ် ၁၄ သီတုၤ ၁၈ သီလၢ ၅ သီအတီၢ်ပူၤန့ၣ်လီၤ. တၢ်မၤလိအံၤ တၢ်ဟ့ၣ်ခီဟ့ၣ်နီၤဝဲ တၢ်ဂ့ၢ်ခိၣ်တီ လၢအမ့ၢ် ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဂံၢ်ခီၣ်ထံးကျဲသနူ ဒီး တၢ်သူၣ်ထီၣ်ဆီလီၤ, တကီၢ်ခါထံရူၢ်ကီၢ်သဲးတၢ်အိၣ်သး ဒီး ကညီတၢ်ပၢၢ်ဆၢ တၢ်စံၣ်စိၤတဲစိၤသ့ၣ်တဖၣ်န့ၣ်လီၤ.

တၢ်မၤလိအံၤ ဘၣ်တၢ်သိၣ်လိနဲၣ်ယုၤအီၤလၢ ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢခိၣ်နၢ်တဖၣ်, တၢ်ဟ့ၣ်တၢ်သ့ၣ်ညါဒီးသူၣ်ထီၣ်ဆီလီၤဝဲၤဒ့ ခိၣ်နၢ်တဖၣ်န့ၣ် လီၤ. တၢ်မၤလိအံၤ ဘၣ်တၢ်ရဲၣ်ကျဲၤမၤအီၤဖဲ ကညီဒီကလုၥ် ပၢၤကီၢ်သုးဝဲၤလီၢ်ခိၣ်သ့ၣ်န့ၣ်လီၤ.

ဖဲတၢ်မၤလိအဆၢကတီၢ် ပဒိၣ်စီၤသမ့ၣ်ထိ လၢအမ့ၢ်ဝဲ ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ လီၢ်ခၢၣ်သးထီဘိကမံးတံၥ် ဟ့ၣ်ခီဟ့ၣ်နီၤဝဲ ကီၢ်ပယီၤ တၢ်စံၣ်စိၤတဲစိၤ ဒီး ကညီတၢ်ပၢၢ်ဆၢတၢ်စံၣ်စိၤတဲစိၤ, သရၣ်စီၤဆၣ်လါ မုၢ်ဟ့ၣ်ခီဟ့ၣ်နီၤဝဲ ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ခီၣ်တဃၥ်ကျဲသနူဒီး တၢ်မၤရဲၣ်ကျဲၤတဖၣ်, ပဒိၣ်စီၤပိၣ်ပိၣ်ထူအီၣ် လၢအမ့ၢ် ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ လီၢ်ခၢၣ်သးထီဘိကမံးတံၥ် ဟ့ၣ်ခီဟ့ၣ်နီၤဝဲ ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ တၢ်သူၣ်ထီၣ်တၢ်ဘျၢသဲစးခိၣ်သ့ၣ် ဒီး ကီၢ်ပယီၤ တၢ်သူၣ်ထီၣ်တၢ်ဘျၢသဲစးခိၣ်သ့ၣ်, သရၣ်ဝ့ၤယၤမ့သ့ ဟ့ၣ်ခီဟ့ၣ်နီၤဝဲ ဂံၢ်ခီၣ် ထံးဖဲၣ်ဒရၢၣ်သနူ ဒီး တၢ်သူထီၣ်ထံကီၢ်အရူၢ်အသဲးတဖၣ် (Nation Building and State Building),ပဒိၣ်စီၤလးထိ လၢအမ့ၢ် ခ့ၣ်အဲၣ်ယူၣ်-ကညီဒီကလုၥ် စၢဖှိၣ်ကရၢ နဲၣ်ရွဲၣ်ခိၣ်ကျၢၢ်သဃဲၤ (၂) ဟ့ၣ်ခီဟ့ၣ်နီၤဝဲ တကီၢ်ခါထံရူၢ်ကီၢ်သဲးတၢ်အိၣ်သး ဒီး တၢ်သူၣ်ထီၣ်ဖဲၣ်ဒရၢၣ်ကီၢ်စၢဖှိၣ် အဂ့ၢ်အဝီတဖၣ်န့ၣ်လီၤ.

လၢန့ၣ်အမဲၥ်ညါ ကညီဒီကလုၥ်ပၢၤကီၢ်သုးအပူၤ မူဒါလီၢ်လၤလၢအလီၤဟိတဖၣ် တၢ်ဃုထၢမၤပှဲၤက့ၤအီၤဝံၤ ဒ်သိး ခ့ၣ်အဲၣ်ယူၣ်-ကညီကလုၥ်စၢဖှိၣ်ကရၢ တၢ်ပၢဟီၣ်ကဝီၤပူၤ သဲစးတၢ်ဒိၣ်စိ ကအိၣ်ထီၣ်အဂီၢ် ကညီဒီကလုၥ်ပၢၤကီၢ်သုး အတၢ်မၤခါဆူညါသ့ၣ်တဖၣ် တၢ်တၢၣ်ပီၣ်တၢၣ်ပီ ဒီး ပၥ်လီၤစ့ၢ်ကီးအီၤန့ၣ်လီၤ.