ကေအဲန်ယူ ဒူးပလာယာခရိုင်(၁၆)ကြိမ်မြောက် ကွန်ကရက်အပြီး ခရိုင်သစ်တောဌာန ပထမအကြိမ်အစည်းအဝေးတွင် ဒူးပလာယာခရိုင်အတွင်းရှိ သစ်တောများ မပြုန်းတီးရေးနှင့် သစ်ပင်အသစ်စိုက်ပျိုးခြင်းများ တိုးချဲ့ဆောင်ရွက်သွားမည်ဖြစ်ကြောင် ခရိုင်သစ်တော အတွင်းရေးမှူး ပဒိုစောနေကော်သော မှပြောသည်။

ခရိုင်သစ်တောဌာန အစည်းအဝေးကို ဒူးပလာယာခရိုင် သစ်တောဌာနရုံးတွင် မတ်လ ၃ ရက်နေ့မှ ၄ ရက်နေ့အထိကျင်းပခဲ့သည်။

အစည်းအဝေးတွင် ကျေးရွာဘုံပိုင်သစ်တောများ တိုးချဲ့ရေး သစ်တောများမပြုန်းတီးရေးနှင့် သစ်ပင်အသစ်စိုက်ပျိုးခြင်းများ တိုးချဲ့ဆောင်ရွက်ရေး၊ သစ်တောကြိုးဝိုင်းဧရိယာများ ပြန်လည်တိုင်းထွာရေး၊သစ်တောကြိုဝိုင်းအတွင်း ဝင်ရောက်နေထိုင်သည့် ဒေသခံပြည်သူများအတွက် လယ်ယာခြံမြေယာယီလုပ်ကိုင်ခွင့်များစီစဉ်ပေးခြင်း၊တောရိုင်းတိရိစ္ဆာန်များ ထိန်းသိမ်းကာကွယ်ရေး တို့ကို အဓိကဆွေးနွေးခဲ့ကြသည်။

ဒေသခံပြည်သူများ အတွက် အမှန်တစ်ကယ်လိုအပ်သည့် အခြေခံအဆောက်အဦးများဖြစ်သည့် နေအိမ်များ၊စာသင်ကျောင်းများ၊ ဘာသာရေးအဆောက်အဦးများအတွက် အမှန်တစ်ကယ်လိုအပ်သည့် သစ်များကို ခရိုင်သစ်တောဌာနသို့ တင်ပြပြီး စနစ်တစ်ကျထုတ်ယူနိုင်ရေးတို့ကို ပါဆွေးနွေးခဲ့သည်။

ခရိုင်သစ်တောဌာန အနေဖြင့် စီးပွားဖြစ် ဖြစ်စေ တရားမဝင်သစ်ထုတ်လုပ်ငန်းဖြစ်စေ စသည်တို့ကို လုံးဝခွင့်မပြုထားကြောင်းနှင့် ကေအဲန်ယူ သစ်တောဥပဒေအတိုင် ဆောင်ရွက်နေကြောင်း သိရသည်။ ကေအဲန်ယူ-ကရင်အမျိုးသားအစည်းအရုံး၏ သစ်တောမူဝါဒများ၊ပော်လစီများ၊သစ်တောမပြုန်းတီးရေး၊တောရိုင်းတိရိစ္ဆာန်ထိန်းသိမ်း ကာကွယ်စောင့်ရှောက်ရေး တို့ကိုလည်း ဒေသခံပြည်သူများ ပိုမိုသိရှိလာအောင်ဆောင် ရွက်သွားမည်ဖြစ်ကြောင်းလည်း သိရသည်။

ခရိုင်သစ်တောဌာန အနေဖြင့် ၂ဝ၁၉ ခုနှစ်အတွင်း ကျေးရွာပိုင်ဘုံသစ်တော(၃၉)ခု ဧကပေါင်း(၆၈၄ဝ၆.၂၇၇၃ )ဧက ကိုတိုးချဲနိုင်ခဲ့သည်။

သစ်တောကြိုးဝိုင်းပေါင်း(၂၉)ခုရှိပြီး စာရင်းအတိအကျကောက်ယူနိုင်ခဲ့သည် သစ်တောကြိုးဝိုင်း(၁၉)ခုစာရင်းအရ ဧက(၂၈၃၄၁၁၆.၆၉၃)ရှိကြောင်းသိရသည်။

ဘေးမဲ့သစ်တောကြိုးဝိုင်း(၃)ခုရှိပြီး မက္ကသာဘေးမဲ့သစ်တောကြိုးဝိုင်း(၉၃၃၅၉-ဧက)၊ဆေးတောင်ဘေးမဲသစ်တောကြိုးဝိုင်း(၁၂၀၃၂၆-ဧက) ၊ခွီခို့ဘေးမဲ့သစ်တောကြိုးဝိုင်း(၈၁၄၅၉-ဧက)နှင့် ဖါးဝီး ပရဆေးသစ်တောကြိုးဝိုင်း(၂၆၆၅.၉၁-ဧက) တို့ကို ထိန်းသိမ်းစောင့်ရှောက်နေပြီး ဘေးမဲကြိုးဝိုင်းများအတွင်နေထိုင်သည့် ဆင်၊ကျား၊ဝက်ဝံ၊ကျားသစ်၊ကြံံ့သူတော်၊ပြောင်၊ဂျီ၊ဒေါင်း စသည့် တောရိုင်းတိရိစ္ဆာန် မျိုးစိတ်ပေါင်း ခန့်မှန်း(၁ဝဝ)ကျော်တို့ကိုပါ ထိန်းသိမ်းစောင့်ရှောက်နေကြောင်းသိရသည်။

ရေအရင်းမြစ်များမရှားပါရေး၊ ရှားပါးတိရိစ္ဆာန်များမျိုးမတုန်းစေရေး၊သဘာဝပါတ်ဝန်းကျင် မထိခိုက်စေးရေး၊သစ်တောများမပြုန်းတီးရေး၊သစ်တောများတိုးပွားလာရေး၊သစ်ခိုးထုတ်မှုများအားထိရောက်စွာ အရေးယူနိုင်ရေးတို့ အတွက် ဒေသခံပြည်သူများမှလည်း ခရိုင်သစ်တောဌာန နှင့်အတူ ပူးပေါင်းပါဝင်ဖို့ လိုအပ်ကြောင်း သိရသည်။

ကေအဲန်ယူ-ကရင်အမျိုးသားအစည်းအရုံး ဒူးပလာယာခရိုင် ဖွဲ့စည်းပုံ၏ နယ်မြေအုပ်ချုပ်ရေးစနစ်တွင် စည်းရုံးရေးနှင့်ပြန်ကြားရေးဌာန၊ ကျန်းမာရေးနှင့်ကယ်ဆယ်ရေး ပြန်လည်ထူထောင်ရေးဌာန၊ ပညာရေးနှင့်ယဉ်ကျေးမှုဌာန၊ လယ်ယာစိုက်ပျိုးရေးဌာန၊ သစ်တောဌာန၊ အခွန်နှင့်ဘဏ္ဍာရေးဌာန ၊ သယ်ယူပို့ဆောင်ရေးနှင့်လမ်းပန်းဆက်သွယ်ရေးဌာန၊ မွေးမြူရေးနှင့်ရေလုပ်ငန်းဌာန၊ ကရင်အမျိုးသားရဲတပ်ဖွဲ့ဌာန(KNPF) တို့ရှိသည်။

တရားစီရင်ရေးကော်မတီ၊စည်းကမ်းကြီးကြပ်ထိန်းသိမ်းရေးကော်မတီ၊ စစ်ကော်မတီ၊ဘဏ္ဍာရေးကော်မတီ တို့လည်းရှိကြပြီး ဒူးပလာယာခရိုင်အတွင်းရှိ ထိန်းချုပ်နယ်မြေမှ ပြည်သူများကို ဝန်ဆောင်မှုပေးနေသော လုပ်ငန်းများ ဆောင်ရွက်လျှက်ရှိသည်။